មេដឹកនាំបក្សកាន់អំណាច បង្ហាញជំហរជាថ្មីទៀតពីការប្រើវិធានបិទខ្ទប់ការប៉ុនប៉ងវិលត្រលប់មកប្រឡូកក្នុងឆាកនយោបាយវិញ ចំពោះក្រុមអ្នកនយោបាយដែលលោកហៅថា «ជ្រុលនិយម» បើទោះបីមានការគាបសង្កត់ពីអន្តរជាតិក៏ដោយ ក្រោមហេតុផលដើម្បីការពារស្ថិរភាពនយោបាយសម្រាប់ប្រទេស។
ការថ្លែងរបស់លោកនាយករដ្ឋមន្ត្រី ហ៊ុន សែន នេះ ធ្វើឡើងក្នុងពិធីសម្ពោធដាក់ឱ្យប្រើប្រាស់ស្ពានមិត្តភាពកម្ពុជា-ចិន «ស្ទឹងត្រង់-ក្រូចឆ្មារ» នាថ្ងៃអង្គារនេះ។
ក្នុងពិធីនោះ លោកនាយករដ្ឋមន្ត្រី ហ៊ុន សែន ថ្លែងថា ប្រទេសប្រជាធិបតេយ្យដែលគាំទ្ររបបរដ្ឋប្រហារយោធា ទម្លាក់សម្ដេចព្រះនរោត្ដម សីហនុ អំឡុងឆ្នាំ១៩៧០ និងគាំទ្រអាសនៈខ្មែរក្រហម នៅអង្គការសហប្រជាជាតិ រយៈ១២ឆ្នាំ ដោយថា បើទោះបីប្រទេសលោកសេរីទាំងនោះបានដឹងថា របបខ្មែរក្រហមបានកាប់សម្លាប់ពលរដ្ឋខ្មែរក៏ដោយ។
បញ្ហានេះ លោកគូសបញ្ជាក់ថា ប្រទេសទាំងនោះមិនបានបង្ហាញពីការសោកស្ដាយណាមួយពីកំហុសរបស់ពួកគេដែលរុញកម្ពុជាឱ្យធ្លាក់ក្នុងសង្គ្រាមស៊ីវិលនោះឡើយ ខណៈលោកថា លោកបានយកជីវិតធ្វើជាដើមទុន ដើម្បីរំដោះប្រទេសជាតិចេញពីរបបកាប់សម្លាប់នោះ រហូតមកដល់បច្ចុប្បន្ន។
លោកថា៖ «សូមបញ្ជាក់ជូនឱ្យហើយ ក្នុងតម្លៃណាក៏ដោយ ហ៊ុន សែន មិនឱនក្បាលទទួលយកការគាបសង្កត់ណាមួយដែលនាំទៅដល់អស្ថិរភាពនិងបាត់សន្តិភាពរបស់ប្រទេសទេ។ ហ៊ុន សែន សូមប្រកាសជាថ្មីម្តងទៀតនៅស្រុកកំណើតរបស់ខ្លួន ទោះបីអូសបន្លាយអាណត្តិរបស់ខ្ញុំប៉ុន្មានអាណត្តិតទៅទៀតក៏ដោយ ស្រេចក្បាលចិត្តខ្ញុំ […] អ៊ីចឹងទុកឱ្យខ្ញុំលេងជាមួយពួកអាជ្រុលនិយមនោះ»។
យ៉ាងណា លោកបន្តកោតសរសើរប្រទេសចិនដែលបានផ្ដល់វ៉ាក់សាំងប្រឆាំងកូវីដ-១៩ និងជំនួយផ្សេងៗតបតាមការចង់បានរបស់កម្ពុជា ដែលថា ការណ៍នេះខុសពីប្រទេសមួយចំនួន។
អនុប្រធានអតីតគណបក្សសង្គ្រោះជាតិ លោកស្រី មូរ សុខហួរ បានច្រានចោលការលើកឡើងរបស់លោកនាយករដ្ឋមន្ត្រីនេះ ដោយថា ការចូលរួមក្នុងជីវភាពនយោបាយជាសិទ្ធិដែលត្រូវបានការពារដោយរដ្ឋធម្មនុញ្ញរបស់កម្ពុជា និងច្បាប់អន្តរជាតិមួយចំនួនទៀត។
មួយវិញទៀត លោកស្រី សុខហួរ ថាគណបក្សសង្គ្រោះជាតិក៏មិនមែនជាក្រុមជ្រុលនិយមដែរ ព្រោះគណបក្សនេះកើតចេញពីការបោះឆ្នោតមានពលរដ្ឋជាងពាក់កណ្ដាលប្រទេសផ្ដល់ទំនុកចិត្ត។
លោកស្រីថា៖ «បើសិនជាពួកខ្ញុំជ្រុលនិយម ខ្ញុំយល់ឃើញថា ពលរដ្ឋជាងពាក់កណ្ដាលនគរចេះវិនិច្ឆយជ្រើសរើសអ្នកតំណាងរបស់លោកហើយ»។
យ៉ាងនេះក្ដី លោកស្រី មូរ សុខហួរ យល់ឃើញថា មានតែការផ្សះផ្សាជាតិឡើងវិញទេ ទើបអាចបញ្ចៀសនូវវិបត្តិសង្គមទៅថ្ងៃអនាគតបាន។
អ្នកវិភាគសង្គម លោក គឹម សុខ មើលឃើញថា សារព្រមានរបស់នាយករដ្ឋមន្ត្រីហាក់បានបង្កប់នូវភាពភ័យខ្លាចបាត់បង់អំណាច ដរាបណាអតីតដៃគូប្រកួតនៅមានលទ្ធភាពត្រលប់មកប្រឡូកក្នុងឆាកនយោបាយឡើងវិញ។
លោកថា៖ «ការផ្ដល់ឱកាសឱ្យក្រុមប្រឆាំងមួយធ្វើសកម្មភាពនយោបាយនៅកម្ពុជាហ្នឹង មិនមែនព្រោះតែស្ថិរភាពនយោបាយដូចដែលលោក ហ៊ុន សែន និយាយទេ តែវាជាអស្ថិរភាពអំណាចរបស់លោក ហ៊ុន សែន និងកូនប្រុសរបស់គាត់។ ម្ល៉ោះហើយទើបលោក ហ៊ុន សែន ប្រកាសប្រើជីវិតចុងក្រោយរបស់គាត់ហ្នឹងសម្អាតក្រុមអ្នកប្រឆាំង ដើម្បីសម្អាតផ្លូវទៅកាន់អំណាចរបស់កូនប្រុសគាត់»។
អតីតគណបក្សសង្គ្រោះជាតិ ត្រូវបានតុលាការកំពូលរំលាយផាត់ចេញពីឆាកនយោបាយចាប់ពីចុងឆ្នាំ២០១៧មក ក្រោយពីគណបក្សនេះដណ្ដើមបានអាសនៈជិតទាន់គណបក្សកាន់អំណាច។
សាលដីកានោះជាការបើកផ្លូវឱ្យរឹបអូសយកអាសនៈក្នុងសភាចំនួន៥៥ និងឃុំ-សង្កាត់ចំនួន៥ ០០៧ យកទៅចែកគណបក្សផ្សេង ហើយមន្ត្រីអតីតបក្សនេះចំនួន១១៨រូបត្រូវបានហាមធ្វើនយោបាយរយៈពេល៥ឆ្នាំ ខណៈប្រធានគណបក្សនេះ គឺលោក កឹម សុខា កំពុងជាប់បណ្ដឹងនៅតុលាការនិងហាមធ្វើនយោបាយនៅឡើយ។
ប្រតិកម្មរបស់នាយករដ្ឋមន្ត្រីនេះ បន្ទាប់ពីសហរដ្ឋអាមេរិកដាក់ទណ្ឌកម្មមន្ត្រីយោធាជាន់ខ្ពស់កម្ពុជា ពីររូបបន្ថែមទៀត រួមមាន លោក ចៅ ភិរុណ និងលោក ទៀ វិញ ដោយចោទថាបានប្រើប្រាស់តួនាទីរបស់ខ្លួនប្រព្រឹត្តអំពើពុករលួយ ពាក់ព័ន្ធនឹងគម្រោងសាងសង់និងកែលម្អកំពង់ផែកងទ័ពជើងទឹករាម នៅក្រុងព្រះសីហនុ។
គិតត្រឹមខែវិច្ឆិកា ឆ្នាំ២០២១នេះ មន្ត្រីជាន់ខ្ពស់យោធាកម្ពុជា ៤រូប និងឧកញ៉ាម្នាក់ ត្រូវបានសហរដ្ឋអាមេរិកដាក់ទណ្ឌកម្មក្រោមច្បាប់នេះ ក្នុងនោះ រួមមាន លោក ហ៊ីង ប៊ុនហៀង មេបញ្ជាការរងកងយោធពលខេមរភូមិន្ទ និងជាមេបញ្ជាការនៃបញ្ជាការដ្ឋានអង្គរក្សរបស់លោកនាយករដ្ឋមន្ត្រី ហ៊ុន សែន, លោក គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងឧកញ៉ា ទ្រី ភាព។ ក្រៅពីនេះ សហរដ្ឋអាមេរិកក៏បានដាក់ទណ្ឌកម្មក្រុមហ៊ុនរដ្ឋចិន UDG នៅខេត្តកោះកុងផងដែរ៕
