នាវាចម្បាំងអាមេរិកមួយគ្រឿងត្រូវបានប្រទះឃើញបើកឆ្លងកាត់ច្រកសមុទ្រតៃវ៉ាន់ (Taiwan Strait) ជាថ្មីម្ដងទៀត នៅថ្ងៃអង្គារនេះ ខណៈអាមេរិកចាត់ទុកថាជាសកម្មភាពដែលពួកគេត្រូវធ្វើឡើងជាប្រចាំ។
ទោះជាយ៉ាងណា សកម្មភាពខាងលើនេះបានបង្កឱ្យចិនមានការខឹងសម្បារ ដោយពួកគេលើកឡើងថា អាមេរិកកំពុងតែព្យាយាមធ្វើឱ្យមានភាពតានតឹងបន្ថែមទៀតនៅក្នុងតំបន់។
ទីភ្នាក់ងារសារព័ត៌មាន Reuters បានស្រង់ការលើកឡើងរបស់កងទ័ពជើងទឹកសហរដ្ឋអាមេរិកដែលបានថ្លែងថា ការបើកឆ្លងកាត់ច្រកសមុទ្រតៃវ៉ាន់របស់នាវាចម្បាំងរបស់ខ្លួន ប្រភេទ Arleigh Burke ឈ្មោះ Milius គឺធ្វើឡើងជាប្រចាំនិងធម្មតាលើដែនទឹកអន្តរជាតិ ស្របតាមច្បាប់អន្តរជាតិ។
កងទ័ពជើងទឹកដដែលបានបន្ថែមថា៖ «ការបើកនាវាឆ្លងកាត់ច្រកសមុទ្រតៃវ៉ាន់នេះ គឺជាការបង្ហាញអំពីការប្ដេជ្ញាចិត្តរបស់សហរដ្ឋអាមេរិក ចំពោះឥណ្ឌូ-ប៉ាស៊ីហ្វិកប្រកបដោយសេរីនិងបើកចំហ ខណៈដែលយោធាសហរដ្ឋអាមេរិកអាចធ្វើការហោះហើរ បើកបរនាវា និងធ្វើប្រតិបត្តិការបាននៅគ្រប់ទីកន្លែងទាំងអស់ដែលច្បាប់អន្តរជាតិអនុញ្ញាត»។
កាលពីខែមុន យោធាចិនក៏ធ្លាប់បានថ្កោលទោសសហរដ្ឋអាមេរិក និងកាណាដា ចំពោះការបញ្ជូននាវាចម្បាំងតាមច្រកសមុទ្រតៃវ៉ាន់ ដោយពួកគេលើកឡើងថា ប្រទេសទាំងពីរនេះកំពុងគំរាមកំហែងដល់សន្តិភាពនិងស្ថិរភាពក្នុងតំបន់។
គួរបញ្ជាក់ថា ប្រទេសចិននៅតែបន្តអះអាងថា កោះតៃវ៉ាន់គឺជាទឹកដីរបស់ខ្លួន ហើយបាននិងកំពុងព្យាយាមដាក់សម្ពាធយោធាមួយចំនួន រួមមាន សកម្មភាពពីសំណាក់កងទ័ពអាកាសរបស់ខ្លួនម្តងហើយម្តងទៀតនៅក្នុងដែនអាកាសតៃវ៉ាន់។
ទាក់ទិននឹងករណីនេះ សហរដ្ឋអាមេរិកធ្លាប់បានឱ្យដឹងកាលពីពេលកន្លងទៅថា ខ្លួននឹងគិតគូរអំពីការការពារកោះតៃវ៉ាន់ និងមានការប្តេជ្ញាចិត្តដើម្បីការពារកោះដែលចិនអះអាងថាជាទឹកដីរបស់ខ្លួនមួយនេះផងដែរ៕
