ក្រុមគ្រួសារក្មេងស្រីរងគ្រោះដោយការរំលោភសេពសន្ថវៈពីសំណាក់អតីតមន្ត្រីនគរបាលនៅខេត្តព្រះសីហនុ នៅតែទទូចរកយុត្តិធម៌ពិត ខណៈពួកគេស្វែងរកកិច្ចអន្តរាគមន៍ជាង១០ឆ្នាំមកហើយ ទោះបីជាសំណុំរឿងនេះត្រូវបានតុលាការគ្រប់លំដាប់ថ្នាក់កាត់សេចក្ដីឱ្យគ្រួសារពួកគេឈ្នះក៏ដោយ ប៉ុន្តែជនប្រព្រឹត្តនៅតែមានសេរីភាពនៅឡើយ។
ការលើកឡើងនេះ ក្រោយឪពុកកុមារីរងគ្រោះអះអាងថា កាលកូនស្រីគាត់ទើបមានអាយុ១១ឆ្នាំ ត្រូវជនល្មើសឈ្មោះ កង សុផាត អតីតមន្ត្រីនគរបាលខេត្តព្រះសីហនុចាប់រំលោភ កាលពីថ្ងៃទី១៥ ខែសីហា ឆ្នាំ២០១០។ លោកថា គិតមកដល់ខែវិច្ឆិកា ឆ្នាំ២០២១នេះ គឺជាង១០ឆ្នាំមកហើយ ប៉ុន្តែជនល្មើសនៅមានសេរីភាព បើទោះបីជាអតីតមន្ត្រីនគរបាលរូបនោះធ្លាប់ត្រូវបានតុលាការចេញដីកាបង្គាប់ឱ្យចាប់ខ្លួនដាក់ពន្ធនាគារក៏ដោយ។
ឪពុកជនរងគ្រោះ លោក យ៉ង ប៊ុនលី និយាយប្រាប់ វីអូឌី នៅថ្ងៃទី២៣ ខែវិច្ឆិកានេះថា បើទោះបីជាសាលាដំបូងខេត្តព្រះសីហនុ សាលាឧទ្ធរណ៍ និងតុលាការកំពូល កាត់ក្ដីឱ្យគ្រួសារលោកឈ្នះរឿងក្ដីនេះក៏ដោយ ប៉ុន្តែការឈ្នះនោះមានតែលើក្រដាសប៉ុណ្ណោះ ខណៈជនល្មើសនៅតែមានសេរីភាព ហើយសំណងដែលគ្រួសារលោកទាមទារក៏នៅមិនទាន់ទទួលបានអ្វីនោះដែរ។
លោក យ៉ង ប៊ុនលី បន្តថា៖ «ខ្ញុំដាក់បណ្ដឹងទៅអង្គភាពប្រឆាំងអំពើពុករលួយ ៣ដង និងដាក់ទៅក្រសួងយុត្តិធម៌ ៤ដង ខ្ញុំដាក់ទៅខុទ្ទកាល័យសម្ដេច ហ៊ុន សែន ម្ដង។ ក្រសួងយុត្តិធម៌ និងខាងអង្គភាពប្រឆាំងអំពើពុករលួយ តបមកវិញថានឹងចាត់ការឱ្យយើង ហើយស្ងាត់ច្រៀបរហូតដល់ឥលូវ»។
លោកបន្តអំពាវនាវថា៖ «ខ្ញុំសុំលើកដៃសំពះអង្វរនិងអំពាវនាវដល់ក្រសួងពាក់ព័ន្ធទាំងអស់តាំងពីថ្នាក់លើដល់ថ្នាក់ក្រោម និងសម្ដេចតេជោ សូមជួយរកយុត្តិធម៌ឱ្យកូនស្រីខ្ញុំបាទផង ព្រោះរឿងនេះ ខ្ញុំរង់ចាំយុត្តិធម៌អស់ជាង១០ឆ្នាំហើយ ឈ្នះតែក្រដាសទេ សំណងក៏អត់បាន មនុស្សក៏អត់ជាប់ឃុំ»។
ជាមួយគ្នានេះដែរ នារីរងគ្រោះនិយាយទាំងរដាក់រដុបលាយឡំភាពភ័យខ្លាច បានស្នើឱ្យសមត្ថកិច្ចនិងស្ថាប័នពាក់ព័ន្ធស្វែងរកយុត្តិធម៌ពិត ដោយមិនគួរបណ្ដោយឱ្យជនប្រព្រឹត្តនៅមានសេរីភាពនោះទេ។
នាងបន្តថា៖ «សូមឱ្យថ្នាក់លើជួយរកយុត្តិធម៌ឱ្យខ្ញុំផង កុំឱ្យជនល្មើសចេញក្រៅឃុំមករកខ្ញុំទៀត ខ្ញុំភ័យខ្លាចគ្រប់ពេលឃើញនិងឮឈ្មោះគាត់»។
ស្នងការនគរបាលខេត្តព្រះសីហនុ លោក ជួន ណារិន្ទ មានប្រសាសន៍នៅថ្ងៃពុធនេះថា៖ «ករណីនេះតាំងពីឆ្នាំ២០១២ម្ល៉េះ ខ្ញុំមកទទួលការងារជាស្នងការនៅឆ្នាំ២០១៥ ខ្ញុំបានសើរើរៀបចំរកដីកាតាមចាប់ខ្លួនតាំងពីនោះមក។ សាម៉ីខ្លួន [ជនបង្ក] បាត់ដំណឹងឈឹង ហើយយើងក៏មិនទុកចោលដែរ យើងនៅតែតាមដានស្វែងរកយកមកអនុវត្តទៅតាមផ្លូវច្បាប់ ដោយមិនលើកលែង ប៉ុន្តែមនុស្សនេះបាត់មិនមានវត្តមាននៅក្នុងខេត្ត និងខាងពាក់ព័ន្ធ ក៏យើងសហការដែរ»។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ អ្នកស្រី ជៀប សុធារី មានប្រសាសន៍ថា ជនរងគ្រោះមិនទាន់ទទួលបានយុត្តិធម៌ ដោយសារតែខាងសមត្ថកិច្ចធ្លាប់លើកឡើងថា រកជនប្រព្រឹត្តឈ្មោះ កង សុផាត នោះអត់ឃើញ ហើយមិនដឹងថាអតីតមន្ត្រីនគរបាលរូបនោះនៅទីណាប្រាកដ។
អ្នកស្រីបន្តថា៖ «ខ្ញុំការពាររហូតដល់សវនាការ ដល់តុលាការកំពូលសព្វគ្រប់អស់ហើយ ប៉ុន្តែសំខាន់គេរកជនបង្កអត់ឃើញ។ យើងមិនដឹងមកដល់ពេលនេះ គាត់នៅស្រុកខ្មែរ ឬនៅណា ក៏មិនដឹង ហើយក៏ឈឺចិត្តដែរ ដោយមិនដឹងជនបង្កនៅទីណា។ ការអនុវត្តទោសព្រហ្មទណ្ឌក៏អត់បាន សំណងរដ្ឋប្បវេណីក៏អត់បាន ព្រោះការអនុវត្តសំណងរដ្ឋប្បវេណីក្នុងនីតិវិធីតុលាការ ឱ្យស្វែងរកទ្រព្យសម្បត្តិគ្រួសារជនបង្ក ដើម្បីប្ដឹងទាមទារឱ្យខាងភាគីជនល្មើសលក់ទ្រព្យសម្បត្តិដែលជាកម្មសិទ្ធិ ដើម្បីសងសំណងរដ្ឋប្បវេណីទៅលើជនរងគ្រោះ។ ប៉ុន្តែគាត់ គ្រួសារជនរងគ្រោះទៅរកហើយ អាជ្ញាធរបាននិយាយថា ទ្រព្យសម្បត្តិរបស់ជនបង្ក គេផ្ទេរលក់ដូរអស់ហើយ»។
អ្នកគ្រប់គ្រងនៅអង្គការហាការ លោក រដ្ឋ បុណ្យស័ក្តិ មានប្រសាសន៍ថា ក្រោយមានហេតុការណ៍អាក្រក់កើតឡើងនោះ ជនរងគ្រោះបានមកស្នាក់នៅជាមួយអង្គការរបស់លោក ហើយខាងអង្គការក៏បានផ្ដល់នូវការជួយឧបត្ថម្ភផ្សេងៗ ជាពិសេសសេវាអប់រំនិងផ្លូវចិត្ត ទាំងអំឡុងពេលស្នាក់នៅជាមួយអង្គការ និងពេលជនរងគ្រោះត្រលប់ទៅរស់នៅជាមួយគ្រួសារវិញផងដែរ។
លោកបន្តថា៖ «ខាងយើងចំណាយពេលច្រើនក្នុងការផ្ដល់សេវាទៅគាត់ សេវាអប់រំផង សេវាសុខភាពផង និងកសាងទំនាក់ទំនងជាមួយគ្រួសារ និងសហគមន៍របស់គាត់ឡើងវិញ។ ក្រៅពីហ្នឹងមក យើងបានធ្វើការផ្ដល់ប្រឹក្សាយោបល់ផ្នែកផ្លូវចិត្តដល់គាត់ដែរ អំឡុងពេលគាត់ស្នាក់នៅជាមួយអង្គការ។ កាលនោះយើងមានដៃគូសហការជាមួយគ្រួសារថែទាំ ដែលយើងផ្ដល់សេវាគាំទ្រដល់ការថែទាំ ការស្ដារឡើងវិញរបស់កុមារ ដើម្បីឱ្យគាត់បន្សាំជាសះស្បើយឡើងវិញ ត្រលប់ទៅរស់នៅជាមួយគ្រួសារដើមគាត់វិញ»។
សំណុំរឿងព្រហ្មទណ្ឌរំលោភសេពសន្ថវៈអនីតិជនប្រព្រឹត្តនៅក្រុងព្រះសីហនុ កាលពីថ្ងៃទី១៥ ខែសីហា ឆ្នាំ២០១០នោះ ត្រូវបានតុលាការកំពូលសម្រេចប្រកាសសាលក្រមកាត់ទោសឱ្យជនត្រូវចោទ ឈ្មោះ កង សុផាត ជាអតីតមន្ត្រីនគរបាលនៃស្នងការដ្ឋាននគរបាលខេត្តព្រះសីហនុ ជាប់ពន្ធនាគាររយៈពេល៥ឆ្នាំ និងពិន័យប្រាក់ចំនួន៤០លានរៀលទៅឱ្យកុមារីរងគ្រោះ។
ដោយឡែក កាលពីថ្ងៃទី២៣ ខែវិច្ឆិកា ឆ្នាំ២០១៦ តំណាងអយ្យការអមសាលាដំបូងខេត្តព្រះសីហនុ លោក ហួត វិចិត្រ បានចេញដីកាបង្គាប់មន្ត្រីនគរបាលយុត្តិធម៌ចាប់ខ្លួនឈ្មោះ កង សុផាត ថែមទៀតផង ប៉ុន្តែមកដល់ពេលបច្ចុប្បន្ន អតីតមន្ត្រីនគរបាលរូបនោះនៅមិនទាន់ត្រូវបានចាប់ខ្លួននៅឡើយ៕