គណបក្សបេះដូងជាតិ នៅរសៀលថ្ងៃសុក្រនេះ បានដាក់ពាក្យប្ដឹងផ្លូវការទៅតុលាការកំពូល ជំទាស់នឹងសេចក្ដីសម្រេចរបស់ក្រសួងមហាផ្ទៃ ដោយទាមទារចុះបញ្ជីគណបក្សឡើងវិញ ដើម្បីបានសិទ្ធិចូលរួមប្រកួតការបោះឆ្នោតខាងមុខ។
គណបក្សបេះដូងជាតិ នាពេលថ្មីៗនេះ ត្រូវបានក្រសួងមហាផ្ទៃគំរាមប្ដឹងទៅតុលាការដើម្បីចាត់វិធានការផ្លូវច្បាប់ និងបដិសេធការសុំចុះបញ្ជីគណបក្សនយោបាយ។ វិធានរបស់ក្រសួងមហាផ្ទៃ បានសម្អាងហេតុថា ស្ថាបនិកគណបក្សបេះដូងជាតិ មានចេតនា «ទុច្ចរិត» ក្លែងស្នាមមេដៃសមាជិក ក្នុងការបំពេញបែបបទសុំចុះបញ្ជីគណបក្សនយោបាយ។
មេធាវីការពារក្ដីឱ្យគណបក្សបេះដូងជាតិ លោក សំ សុគង់ ឱ្យដឹងថា ក្រុមមេធាវីបានដាក់ពាក្យបណ្ដឹងទៅតុលាការកំពូលហើយ នៅម៉ោង២រសៀលនេះ ដើម្បីជំទាស់ទៅនឹងសេចក្ដីសម្រេចរបស់ក្រសួងមហាផ្ទៃ។
មេធាវីរូបនេះឱ្យដឹងទៀតថា ការប្ដឹងនេះ កូនក្ដីរបស់លោកសុំឱ្យតុលាការកំពូលទម្លាក់ចោលការចោទប្រកាន់របស់ក្រសួងមហាផ្ទៃ ដើម្បីបើកផ្លូវឱ្យកូនក្ដីបានចុះបញ្ជីគណបក្សរបស់ខ្លួនឡើងវិញ។
លោក សំ សុគង់ បញ្ជាក់ថា ការប្ដឹងជំទាស់នេះ ដោយសារកូនក្ដីរបស់លោកមានគោលដៅចូលរួមបោះឆ្នោតនៅឆ្នាំ២០២២ និង២០២៣ខាងមុខ តាមលក្ខខណ្ឌច្បាប់ និងគ្មានចេតនាទុច្ចរិតដូចការចោទប្រកាន់របស់ក្រសួងមហាផ្ទៃទេ។
មួយវិញទៀត លោកថា កូនក្ដីបានគោរពតាមការណែនាំរបស់ក្រសួងមហាផ្ទៃ ដែលក្រសួងបានស្នើកែតម្រូវឯកសារពាក់ព័ន្ធរហូតដល់ទៅ៣ដង ខណៈការប្ដឹងរកកិច្ចអន្តរាគមន៍ផ្លូវច្បាប់ពីតុលាការកំពូល តបទៅតាមមាត្រា២៥នៃច្បាប់ស្ដីពី «វិសោធនកម្មនៃច្បាប់គណបក្សនយោបាយ»។
លោក សំ សុគង់ បញ្ជាក់បន្ថែមថា ការបដិសេធចុះបញ្ជីគណបក្សបេះដូងជាតិ ក្រោមហេតុផលស្នាមមេដៃមិនត្រឹមត្រូវនោះ គឺមិនអនុលោមទៅតាមច្បាប់ស្ដីពីគណបក្សនយោបាយនោះទេ។
លោកថា៖ «ច្បាប់គណបក្សនយោបាយ ទាក់ទងនឹងអង្គច្បាប់ហ្នឹង ឱ្យពិនិត្យតែភាពត្រឹមត្រូវឬភាពគ្រប់គ្រាន់នៃឯកសារ។ អ៊ីចឹងការពិនិត្យស្នាមមេដៃនោះ ជារឿងដាច់ដោយឡែក មិនពាក់ព័ន្ធនឹងការដាក់ពាក្យសុំ [ចុះបញ្ជីគណបក្សនយោបាយ] នោះទេ»។
អ្នកនាំពាក្យតុលាការកំពូល អ្នកស្រី ម៉ៅ ធីតា មិនទាន់អត្ថាធិប្បាយរឿងនេះទេ។
អ្នកស្រីថា៖ «ចាំខ្ញុំឆែកមើលរឿងនេះសិន ដោយសារខាងខ្ញុំដឹងព័ត៌មានហ្នឹងដែរ តែចាំឱ្យខាងខ្ញុំឆែកឱ្យជាក់ស្ដែងសិន»។
ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័គ ធ្លាប់ប្រាប់ VOD នៅដើមសប្ដាហ៍នេះថា ការក្លែងស្នាមមេដៃជាបទល្មើសព្រហ្មទណ្ឌ ហើយថា ក្រសួងក៏នឹងត្រៀមខ្លួនចូលបំភ្លឺជុំវិញពាក្យបណ្ដឹងរបស់គណបក្សបេះដូងជាតិនេះ ដើម្បីតតាំងគ្នាតាមផ្លូវច្បាប់។
រដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងលិខិតមួយដាក់ជូនលោកនាយករដ្ឋមន្ត្រី ហ៊ុន សែន កាលពីពេលថ្មីៗនេះថា តាមការធ្វើកោសលវិច័យទៅលើស្នាមមេដៃចំនួន៤ ៧៨១មេដៃ ដែលគណបក្សបេះដូងជាតិ ផ្ញើទៅក្រសួង ដើម្បីសុំចុះបញ្ជីគណបក្ស បានរកឃើញមានភាពមិនប្រក្រតីមួយចំនួន ដូចជា ស្នាមមេដៃខ្លះខុសទៅនឹងស្នាមមេដៃក្នុងអត្តសញ្ញាណបណ្ណ និងស្នាមមេដៃមួយចំនួនទៀតខូចគុណភាព មិនអាចធ្វើកោសលវិច័យបានជាដើម។
ពាក់ព័ន្ធនឹងករណីនេះ គណបក្សបេះដូងជាតិ ធ្លាប់បានលើកឡើងក្នុងសេចក្ដីថ្លែងការណ៍ចុះថ្ងៃទី២២ ខែវិច្ឆិកា ថាខ្លួនមានការសោកស្ដាយដែលក្រសួងមហាផ្ទៃបដិសេធការសុំចុះបញ្ជីគណបក្សរបស់ខ្លួន ហើយថែមទាំងចោទប្រកាន់យ៉ាងអយុត្តិធម៌។ គណបក្សនេះ អះអាងថា ស្នាមមេដៃដែលខ្លួនបានដាក់ជូនទៅក្រសួងមហាផ្ទៃ មានចំនួនតែ៤ ៦១៨នាក់ មិនមែនចំនួន៤ ៧៨១នាក់ ដូចការអះអាងរបស់ក្រសួងមហាផ្ទៃនោះទេ។ មួយវិញទៀត គណបក្សនេះថា ការរកឃើញភាពមិនប្រក្រតីនៃស្នាមមេដៃ គួរតែក្រសួងណែនាំពីកំហុសឆ្គង ដើម្បីកែសម្រួលទៅតាមលក្ខន្តិកៈ៕