ក្រុមអ្នកគាំទ្រអតីតគណបក្សសង្គ្រោះជាតិប្រចាំសហរដ្ឋអាមេរិក (CNRP-USA) អំពាវនាវដល់លោក សម រង្ស៊ី និងក្រុមអ្នកគាំទ្ររបស់លោក ឱ្យបញ្ឈប់ការយកឈ្មោះ និងរូបភាពរបស់លោក កឹម សុខា ទៅប្រើប្រាស់ដើម្បីបំភ័ន្ត និងបិទបាំងទង្វើទុច្ចរិតរបស់ខ្លួនតទៅទៀត។
តាមរយៈសេចក្តីថ្លែងការណ៍ចេញផ្សាយកាលពីថ្ងៃទី២៦ ខែវិច្ឆិកា ឆ្នាំ២០២១ ដែលវីអូឌីទទួលបាននៅថ្ងៃនេះ បានកត់សម្គាល់ថា នាពេលកន្លងមក និងពេលថ្មីៗនេះ លោក សម រង្ស៊ី និងក្រុមអ្នកគាំទ្រគាត់ នៅតែបន្តប្រព្រឹត្តច្រំដែល និងគគ្លើនដោយបានប្រើប្រាស់ឈ្មោះ និងរូបភាពរបស់លោក កឹម សុខា និងពាក្យស្លោកថា «សម រង្ស៊ី និងកឹម សុខា ជាមនុស្សតែមួយ» សម្រាប់បំភ័ន្ត និងបិទបាំងទង្វើទុច្ចរិតដើម្បីកេងចំណេញប្រយោជន៍បុគ្គល និងបក្ខពួករបស់ខ្លួនជាបន្តបន្ទាប់។
សេចក្តីថ្លែងការណ៍បានចោទប្រកាន់ថា លោក សម រង្ស៊ី និងក្រុមគាំទ្ររបស់លោក បានចាកចេញទៅបង្កើតចលនាខុសច្បាប់ លើកបន្តុបតួនាទីខ្លួនឯង បានប្រមាថព្រះមហាក្សត្រ និងពេលថ្មីៗនេះបានប្រកាសគាំទ្រគណបក្សនយោបាយផ្សេង ដែលបញ្ចាក់ឲ្យឃើញកាន់តែច្បាស់ នូវទង្វើប្រាសចាក និងដើរផ្ទុយពីស្មារតីដើម នៃការរួបរួមជាមួយលោក កឹម សុខា តទៅទៀតហើយ។
គួរកត់សម្គាល់ថា សេចក្តីថ្លែងការណ៍នេះ បានធ្វើឡើង ខណៈគណបក្ស «ភ្លើងទៀន» អតីតគណបក្សសមរង្ស៊ី នឹងធ្វើសមាជនៅព្រឹកថ្ងៃសៅរ៍នេះ ដោយមានអ្នកចូលរួមពីសមាជិក-សមាជិកា ព្រមទាំងថ្នាក់ដឹកនាំគណបក្សគ្រប់លំដាប់ថ្នាក់។ សេចក្តីប្រកាសព័ត៌មានរបស់គណបក្សភ្លើងទៀនបានបញ្ជាក់ថា ការរៀបចំសមាជសាមញ្ញគណបក្សនេះ គឺអនុលោមតាមលក្ខន្តិកៈគណបក្ស និងដើម្បីកំណត់យុទ្ធសាស្ត្រនយោបាយសំខាន់ៗសម្រាប់គណបក្ស។
វីអូឌីនៅមិនទាន់អាចទាក់ទងសុំការឆ្លើយតបពីលោក សម រង្ស៊ី និងលោក អេង ឆៃអ៊ាង អតីតអនុប្រធានគណបក្សសង្គ្រោះជាតិបាននៅឡើយទេគិតត្រឹមថ្ងៃសៅរ៍នេះ៕
