លោកនាយករដ្ឋមន្ត្រី ហ៊ុន សែន ព្រមានចាត់វិធានការច្បាប់លើមន្ត្រីទាំងឡាយណាដែលពាក់ព័ន្ធការរំលោភដីព្រៃលិចទឹក ពិសេសនៅតំបន់បឹងទន្លេសាប ព្រមានដកហូតទ្រព្យសម្បត្តិរបស់ពួកគេដាក់ជាសម្បត្តិរដ្ឋ។
ការបញ្ជានេះ ធ្វើឡើងបន្ទាប់ពីលោក បានលើកឡើងចំឈ្មោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន ដោយថាបានទន្ទ្រានដីព្រៃលិចទឹកនៅតំបន់បឹងទេន្លេសាបក្នុងខេត្តកំពង់ឆ្នាំង ជាង២ពាន់ហិកតា ដើម្បីយកមកធ្វើជាកម្មសិទ្ធិផ្ទាល់ខ្លួន។
លោកនាយករដ្ឋមន្ត្រី ហ៊ុន សែន បានសារជាសំឡេងពិសេសមួយ នៅថ្ងៃទី២៨ វិច្ឆិកា នេះ បានបញ្ជាឱ្យប្រធានអង្គភាពប្រឆាំងអំពើពុករលួយ លោក ឱម យិនទៀង , រដ្ឋមន្ត្រីក្រសួងរៀបចំដែនដី នគរូបនីកម្ម និងសំណង់ លោក ជា សុផារ៉ា និងជាប្រធានគណៈកម្មាធិការដោះស្រាយវិវាទដីធ្លី បើកកិច្ចប្រជុំជាបន្ទាន់ ជាមួយក្រសួង រួមទាំងអ្នកពាក់ព័ន្ធផ្សេងៗទៀត ដើម្បីទប់ស្កាត់ជាបន្ទាន់ ចំពោះករណីទន្ទ្រានដីព្រៃលិចទឹកនៅតំបន់បឹងទន្លេសាបទាំងអស់ ជាពិសេសខេត្តកំពង់ឆ្នាំង។
លោកនាយករដ្ឋមន្ត្រី ហ៊ុន សែន ថ្លែងបន្តថា បើស្រាវជ្រាវរកឃើញមន្ត្រី ដែលលួចទន្ទ្រានដីព្រៃលិចទឹកនៅតំបន់បឹងទន្លេសាបយកមកធ្វើជាកម្មសិទ្ធិផ្ទាល់ខ្លួន ត្រូវចាប់មន្ត្រីនោះបញ្ជូនទៅតុលាការផ្តន្ទាទោសតាមច្បាប់ និងដកហូតដីនោះ ព្រមទាំងទ្រព្យសម្បត្តិរបស់ពួកគេយកមកធ្វើជាសម្បត្តិរដ្ឋវិញ។
លោកព្រមានដូចនេះថា៖ «ខ្ញុំសុំឱ្យអ្នកដែលចេញទៅអនុវត្តចាត់វិធានការដោយម៉ឺងម៉ាត់បំផុត គឺការចាប់ខ្លួនតែម្តងសម្រាប់ផ្តន្ទាទោសតាមច្បាប់ ហើយឈានទៅរឹបអូសមិនត្រឹមតែដីធ្លីនៅនឹងកន្លែងទេ ទ្រព្យសម្បត្តិដែលពួកគេមានដែលបានមកពីដីធ្លីដែលពួកគេបំផ្លាញនេះត្រូវតែធ្វើការដកហូត។ ដូច្នេះហើយអង្គភាពប្រឆាំងអំពើពុករលួយត្រូវតែចេញធ្វើសកម្មភាពដើម្បីស្រាវជ្រាវដែលមានពាក់ព័ន្ធជាមួយអ្នកណាផ្សេងទៀត យើងមិនអាចអត់ឱនបានទេ» ។
លោកមានប្រសាសន៍បន្ថែមថា៖ «នៅពេលដែលយើងខិតខំប្រយុទ្ធជាមួយនឹងកូវីដ-១៩ បែរជាមានមន្ត្រីរបស់យើងមួយចំនួនធ្វើសកម្មភាព[ទន្ទ្រានដីព្រៃលិចទឹក]ដោយគ្មានការទទួលខុសត្រូវ គ្មានការក្រែងរអែងចំពោះច្បាប់របស់ប្រទេសជាតិ។ អ្នកទាំងនេះមិនសាកសមធ្វើជាមន្ត្រីតទៅទៀតទេ ពួកគេដេកគុកប្រសើរជាងនៅជាមន្ត្រី ហើយសុំកុំនិយាយថា ធ្វើការជូនបក្ស ជូនរដ្ឋយូរហើយ បែរជារដ្ឋ ឬក៏គណបក្សមិនយោគយល់។ យើងគ្មានការយោគយល់ណាសម្រាប់អំពើទុច្ចរិតបែបនេះសម្រាប់មន្ត្រីរបស់យើងនោះទេ»។
យ៉ាងនេះក្តី មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា រឿងមន្ត្រីរដ្ឋាភិបាលមួយចំនួនដែលទន្រ្ទានដីរដ្ឋយកធ្វើជាកម្មសិទ្ធិមិនមែនទើបតែកើតឡើងនៅពេលដែលលោកនាយករដ្ឋមន្ត្រីប្រកាសពេលនេះទេ ។ ប៉ុន្តែលោកថា មន្ត្រីដែលខិលខូចតែងតែគប់គិតគ្នាជាប្រព័ន្ធ ដើម្បីយកដីរដ្ឋធ្វើជាកម្មសិទ្ធិបែបនេះ ។
លោកជំរុញទៅរដ្ឋាភិបាលត្រូវពង្រឹងការគ្រប់គ្រងស្ថាប័នរដ្ឋនៅតាមផ្នែកនីមួយឱ្យបានរឹងមាំ កុំឱ្យរង់ចំាតែស្តាប់បញ្ជាប្រមុខរដ្ឋាភិបាលឱ្យចុះបង្ក្រាបទើបនាំគ្នាដុតដៃ ដុតជើង ចាប់ជនល្មើសមកផ្តន្ទាទោសតាមច្បាប់នោះ។
លោកមានប្រសាសន៍ថា៖ «នៅក្នុងសង្គមយើងបច្ចុប្បន្ននេះ វាទាល់តែនាយករដ្ឋមន្ត្រីស្រែកទៅបានមន្ត្រីមួយចំនួននាំគ្នាដុតដៃ ដុតជើង ជារឿងមួយដែលគួរឱ្យសោកស្តាយ ហើយគួរតែកែលម្អប្រព័ន្ធច្បាប់ឱ្យបានរឹងមាំ ដើម្បីចាត់វិធានការច្បាប់លើមន្ត្រីខិលខូច កុំឱ្យចាំតែលោកនាយករដ្ឋមន្ត្រីស្រែកបានចាត់វិធានការចឹង វាមានស្ថាប័នតែមិនមានអ្នកធ្វើការ»។
បឹងទន្លេសាប គ្របដណ្តប់ជាប់ខេត្តចំនួន៥នៅកម្ពុជា រួមមានខេត្តកំពង់ឆ្នាំង ពោធិ៍សាត់ សៀមរាប កំពង់ធំ និងបាត់ដំបង។
មិនមានការបញ្ជាក់ច្បាស់លាស់ណាមួយ អំពីទំហំនៃការបាត់បង់ព្រៃលិចទឹកនៅតំបន់បឹងទន្លេសាបរហូតទល់ពេលបច្ចុប្បន្ននោះទេ ប៉ុន្តែបើផ្អែកតាមរូបភាពផ្កាយរណបរបស់អង្គការអភិរក្សព្រៃឈើដែលមានឈ្មោះថា Global Forest Watch កាលពីឆ្នាំ២០១៩ បានឱ្យដឹងថា តំបន់ការពារបឹងទន្លេសាបក្នុងប្រទេសកម្ពុជា បានបាត់បង់ព្រៃឈើប្រមាណ ១៦ ៨០០ហិកតា ចាប់ពីចន្លោះឆ្នាំ២០០១ និងឆ្នាំ២០០៨៕
