អ្នកជំនាញសិទ្ធិមនុស្សរបស់អង្គការសហប្រជាជាតិUN ចំនួន៥រូប នៅតែបង្ហាញក្តីកង្វល់ចំពោះបញ្ហាសិទ្ធិមនុស្ស ដែលអាជ្ញាធររាជធានី-ខេត្តបញ្ជាឱ្យពលរដ្ឋខ្មែរ ចាម និងវៀតណាមរាប់រយគ្រួសាររុះរើផ្ទះបណ្តែតទឹកនៅតាមដងទន្លេ ដោយគ្មានការផ្តល់សំណងសមរម្យ។
ក្តីកង្វល់នេះ ធ្វើឡើងបន្ទាប់ពីរដ្ឋបាលរាជធានីភ្នំពេញ និងអាជ្ញាធរខេត្តកណ្តាល បានជូនដំណឹងអំពីការបញ្ជាឱ្យរុះរើផ្ទះបណ្តែតទឹកក្នុងរយៈពេលប្រាំពីរថ្ងៃ ដែលធ្វើឱ្យប៉ះពាល់ដល់ប្រជាពលរដ្ឋប្រមាណ ៧០០គ្រួសារចំពោះតែនៅក្នុងរាជធានីភ្នំពេញ ខណៈជនជាតិវៀតណាមមិនបានបញ្ជាក់អំពីតួលេខ ដែលត្រូវបានផ្លាស់ទីលំនៅ ហើយជនជាតិខ្មែរ និងវៀតណាមទាំងនោះមិនទទួលបានសំណងជាដើម។
ទំព័រហ្វេសប៊ុករបស់អង្គការសហប្រជាជាតិបានឱ្យដឹងកាលពីថ្ងៃសុក្រថា អ្នកជំនាញសិទ្ធិមនុស្សរបស់អង្គការសហប្រជាជាតិចំនួនប្រាំរូប បានបង្ហាញនូវការព្រួយបារម្ភអំពីកង្វះនៃការពិគ្រោះយោបល់ជាមួយប្រជាពលរដ្ឋ ការជូនដំណឹងសមស្រប ការផ្តល់នូវជម្រើស នៃការស្នាក់នៅ ឬដំណោះស្រាយដែលមានប្រសិទ្ធភាពស្របតាមច្បាប់ ដើម្បីការពារជនជាតិភាគតិច និងសិទ្ធិរបស់មនុស្សគ្រប់រូប ក្នុងការទទួលបានលំនៅឋានសមរម្យ អាហារគ្រប់គ្រាន់ និងសុខភាព។
ហ្វេសប៊ុករបស់អ្នករាយការណ៍ពិសេសលើកឡើងថា៖ «អ្នកជំនាញរបស់អង្គការសហប្រជាជាតិបានសាកសួរ ជាពិសេសអំពីមូលដ្ឋានគតិយុត្តនៃការបញ្ជាអោយរុះរើនេះ និងអំពីការគាំទ្រ និងជំនួយអ្វីខ្លះដែលត្រូវបានផ្តល់ជូនដល់គ្រួសារ ដែលភាគច្រើនត្រូវបានទុកចោលដោយគ្មានផ្ទះសម្បែងបន្ទាប់ពីមានការវាយកម្ទេច និងរុះរើ»។
វីអូឌី មិនអាចសុំការបំភ្លឺពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី អភិបាលខេត្តកណ្តល លោក គង់ សោភ័ណ្ឌ និងអ្នកនាំពាក្យនៃអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន បានទេនៅថ្ងៃអាទិត្យនេះ ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថាក្នុងច្បាប់ជាតិ និងបទដ្ឋានអន្តរជាតិចែងថា មនុស្សគ្រប់រូបត្រូវការរស់រានមានជីវិត មានទីលំនៅសមរម្យ និងត្រូវមានដំណោះស្រាយប្រកបដោយតម្លាភាព និងយុត្តិធម៌ជាដើម។
លោក សំអាត បញ្ជាក់ថា មុននឹងបញ្ជាឱ្យប្រជាពលរដ្ឋខ្មែរ ចាម និងជនជាតិវៀតណាម រុះរើផ្ទះបណ្តែតទឹកនៅតាមដងទន្លេសាបចេញនោះ អាជ្ញាធរពាក់ព័ន្ធគួរបង្ហាញតួលេខប៉ះពាល់ជាក់លាក់ និង រកទីជម្រក ឬផ្តល់សំណងសមរម្យដល់ពួកគេ ដើម្បីកុំឱ្យមានការរិះគន់ពីមជ្ឈដ្ឋានជាតិ និងអន្តរជាតិបែបនេះ ។
លោកមានប្រសាសន៍ថា៖ «ត្រូវធ្វើការសិក្សាឱ្យបានច្បាស់លាស់ ប្រសិនបើប្រជាពលរដ្ឋដែលរស់នៅស្របច្បាប់ បានន័យថា ខ្ញុំអត់និយាយអន្តោប្រវេសន៍ខុសច្បាប់ទេ និយាយតែអ្នករស់នៅដោយស្របច្បាប់នៅកម្ពុជា អាជ្ញាធរ រដ្ឋាភិបាលគាត់ត្រូវមានកាតព្វកិច្ចដែរ។ បើពួកគាត់គ្មានផ្ទះ គ្មានសម្បែង តើឱ្យពួកគាត់ទៅរស់នៅឯណា? អញ្ចឹងត្រូវគិតគូផ្តល់ដីសង្គមកិច្ចដល់ពួកគាត់ក្នុងការតាំងទីលំនៅ»។
កាលពីពាក់កណ្តាលខែមិថុនា ឆ្នាំ២០២១ អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ លោក កែវ វណ្ណថន មានប្រសាសន៍ថា សមត្ថកិច្ចជំនាញបានសហការជាមួយអាជ្ញាធរមូលដ្ឋាន ដើម្បីស្រាវជ្រាវករណីជនអន្តោប្រវេសន៍ ជាពិសេសជនជាតិវៀតណាមដែលកំពុងរស់នៅលើផ្ទះបណ្តែតទឹក និងសំណង់មិនរៀបរយតាមដងទន្លេក្នុងរាជធានីភ្នំពេញ។
អ្នកនាំពាក្យរូបនេះអះអាងថា បើរកឃើញជនអន្តោប្រវេសន៍រស់នៅមិនស្របច្បាប់ ក្រុមការងារជំនាញនឹងអនុវត្តតាមច្បាប់អន្តោប្រវេសន៍ ដោយបណ្តេញពួកគេចេញទៅប្រទេសកំណើតវិញ។
ទោះជាយ៉ាងណា លោក កៅ វណ្ណថន មិនបានបញ្ជាក់ពីចំនួនជនអន្តោប្រវេសន៍ដែលកំពុងរស់នៅខុសច្បាប់ថាមានចំនួនប៉ុន្មាននៅឡើយទេ ដោយថា ក្រុមការងារជំនាញកំពុងស្រាវជ្រាវ ប៉ុន្តែដល់ពេលបច្ចុប្បន្នមន្ត្រីជំនាញក៏នៅមិនទាន់បានបង្ហាញលទ្ធផលជាក់លាក់នៅឡើយ។
កាលពីថ្ងៃទី២ ខែមិថុនា ឆ្នាំ២០២១ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយប្រាប់ទៅប្រជាពលរដ្ឋដែលរស់លើផ្ទះបណ្តែតទឹកតូចធំ បែចិញ្ចឹមត្រី និងសំណង់មិនរៀបរយតាមដងទន្លេក្នុងរាជធានីភ្នំពេញ ត្រូវរុះរើចេញពីយ៉ាងយូរ១សប្តាហ៍តែប៉ុណ្ណោះ បើពុំដូច្នេះទេ អាជ្ញាធរនឹងចាត់វិធានការរដ្ឋបាលឬវិធានការច្បាប់។
សេចក្តីជូនដំណឹងដដែលបញ្ជាក់ថា ការរស់នៅនិងប្រកបមុខរបរលើផ្ទៃទឹកទន្លេនេះ ធ្វើឱ្យផលប៉ះពាល់ដល់ប្រព័ន្ធអេកូឡូស៊ី មានចរន្តទឹកហូរ គោករាក់ ពិសេសការប្រើប្រាស់ចំណីសម្រាប់ចិញ្ចឹមត្រី និងការបញ្ចេញកាកសំណល់ ការបន្ទោបង់ពាសវាលពាសកាលក្នុងទន្លេ ធ្វើឱ្យខូចខាតធ្ងន់ធ្ងរដល់ជីវចម្រុះក្នុងទឹក ខូចគុណភាពទឹក បំពុលបរិស្ថាន ប៉ះពាល់សោភ័ណភាពរាជធានីភ្នំពេញ ព្រមទាំងប៉ះពាល់សុខភាពប្រជាពលរដ្ឋដែលប្រើប្រាស់ទឹកផងដែរ៕
