ប្រមុខរដ្ឋាភិបាល លោក ហ៊ុន សែន បញ្ជាក់ថាកម្ពុជា ប្រកាសផ្តល់ជំនួយជាថវិកាចំនួន១៣លានដុល្លារសហរដ្ឋអាមេរិក និងវ៉ាក់សាំងប្រឆាំងកូវីដ-១៩ ប្រភេទស៊ីណូវ៉ាក់ចំនួន៥០ម៉ឺនដូស ព្រមទាំងរថយន្តពីរគ្រឿងជូនភាគីឡាវ អំឡុងពេលនាយករដ្ឋមន្ត្រីប្រទេសជិតខាងមួយនេះមកបំពេញទស្សនកិច្ចផ្លូវការនៅកម្ពុជា។
ទំព័រហ្វេសប៊ុករបស់នាយករដ្ឋមន្ត្រី ហ៊ុន សែន នៅរសៀលថ្ងៃទី២៩ខែវិច្ឆិកានេះ បានឱ្យដឹងថា ក្នុងជំនួបរវាងមេដឹកនាំកម្ពុជា ជាមួយនាយករដ្ឋមន្ត្រីថ្មីនៃសាធារណរដ្ឋប្រជាធិបតេយ្យប្រជាមានិតឡាវ លោក ផនខាំ វីផាវ៉ាន់ (Phankham Viphavanh) ភាគីទាំងពីរបានជជែកគ្នាច្រើនអំពីកិច្ចសហប្រតិបត្តិការ និងការពង្រឹងពង្រីកចំណងមិត្តភាពរវាងគ្នានិងគ្នា។
ជាមួយគ្នានេះ កម្ពុជាក៏បានប្រកាសផ្តល់ជំនួយចំនួន១៣លានដុល្លារ ព្រមទាំងវ៉ាក់សាំងប្រឆាំងកូវីដ-១៩ ប្រភេទស៊ីណូវ៉ាក់ និងជំនួយសម្ភារៈមួយចំនួនទៀត ដល់ភាគីឡាវផងដែរ។
ហ្វេសប៊ុកលោកហ៊ុន សែន សរសេរថា៖ «សម្តេចតេជោ ហ៊ុន សែន ក៏បានប្រកាសផ្ដល់ជំនួយចំនួន១៣លានដុល្លារដល់ប្រទេសឡាវ ដែលក្នុងនោះ៣លាន ដុល្លារជាថវិការបស់រាជរដ្ឋាភិបាលកម្ពុជា និង១០លានដុល្លារទៀត គឺជាថវិការបស់ក្រុមហ៊ុនឯកជន។ ជាមួយគ្នានេះ កម្ពុជា ក៏បានសម្រេចប្រកាសផ្ដល់ជំនួយវ៉ាក់សាំងស៊ីណូវ៉ាក់ ចំនួន ៥០ ម៉ឺនដូស និងរថយន្តពីរគ្រឿងថែមទៀតជូនប្រទេសឡាវ ដើម្បីប្រយុទ្ធប្រឆាំងនឹងកូវីដ-១៩ផងដែរ»។
កាលពីថ្ងៃទី២៧ខែវិច្ឆិកា ក្រសួងការបរទេសបានចេញសេចក្តីប្រកាសព័ត៌មានឱ្យដឹងថានាយករដ្ឋមន្ត្រីឡាវថ្មី លោក ផនខាំ វីផាវ៉ាន់ (Phankham Viphavanh) មកបំពេញទស្សនកិច្ចផ្លូវការនៅកម្ពុជា រយៈពេល ២ថ្ងៃ គឺចាប់ពីថ្ងៃទី២៩ ដល់ថ្ងៃទី៣០ ខែវិច្ឆិកា ឆ្នាំ២០២១ តាមការអញ្ជើញរបស់លោកនាយករដ្ឋមន្ត្រី ហ៊ុន សែន។
ទំព័រហ្វេស៊ប៊ុកលោកហ៊ុន សែន ឱ្យដឹងថា ក្នុងជំនួបជាមួយនាយករដ្ឋមន្ត្រីឡាវនៅរសៀលថ្ងៃចន្ទនេះ លោក ផនខាំ វីផាវ៉ាន់ បានស្នើកម្ពុជាចំនួន៨ ចំណុច ដើម្បីពង្រឹងកិច្ចសហប្រតិបត្តិការ តាមរយៈ ការផ្លាស់ប្ដូរទស្សនកិច្ចរវាងគ្នាទៅវិញទៅមក ដោយជំរុញនិងបញ្ចប់ការងារដែលបានព្រមព្រៀងគ្នាកន្លងមក។ លើសពីនេះ បន្តពិភាក្សាគ្នាធ្វើយ៉ាងណាឱ្យបញ្ចប់កិច្ចព្រមព្រៀង ក៏ដូចជាកិច្ចសហប្រតិបត្តិការ ក្នុងភាពជាដៃគូគ្រប់ជ្រុងជ្រោយ និង ជំរុញបន្តកិច្ចប្រជុំតាមរយៈយន្តការដែលមានស្រាប់។ បន្ថែមពីនេះ ជំរុញឲ្យគណៈកម្មការចម្រុះព្រំដែនបន្តធ្វើការតាមគោលដៅដែលថ្នាក់ដឹកនាំបានសម្រេច ព្រមទាំងចំណុចមួយចំនួនទៀត។
ជាការឆ្លើយតប លោក ហ៊ុន សែន ក៏បានគាំទ្រចំណុចទាំងឡាយ ដែលនាយករដ្ឋមន្ត្រីឡាវ បានលើកឡើង ហើយលោកក៏ស្នើនូវចំណុចមួយចំនួនទៅភាគីឡាវវិញដូចជា គួរពិចារណាឱ្យប្រជាជនទាំងពីរអាចធ្វើដំណើរទៅវិញទៅមក ពីព្រោះវិស័យជាវិស័យដែលបំពេញឲ្យគ្នាទៅវិញទៅមកជាដើម។
លោក ផនខាំ វីផាវ៉ាន់ ជានាយករដ្ឋមន្រ្តីថ្មីរបស់ឡាវ ដែលទើបឡើងកាន់តំណែងកាលពីខែមីនា ឆ្នាំ២០២១នេះ បន្តពីលោក ថងលួន ស៊ីសូលីត។
បើតាមលោកនាយករដ្ឋមន្ត្រីហ៊ុន សែន មើលឃើញថា ដំណើរទស្សនកិច្ចផ្លូវការរបស់នាយករដ្ឋមន្រ្តីឡាវ នៅកម្ពុជាក្នុងអំឡុងពេលដែលកម្ពុជាកំពុងបើកប្រទេសឡើងវិញ នឹងរួមចំណែកក្នុងការបន្តពង្រឹងបន្ថែមទៀតនូវចំណងមិត្តភាពជាប្រពៃណីដ៏យូរអង្វែង សាមគ្គីភាពជាភាតរភាព ភាពជាអ្នកជិតខាងល្អ ដៃគូយុទ្ធសាស្រ្ត គ្រប់ជ្រុងជ្រោយនិងយូរអង្វែង។ ជាងនេះទៀត ដើម្បីពង្រឹងនូវកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ ក៏ដូចជាជំរុញកិច្ចសហប្រតិបត្តិការនៅក្នុងក្របខណ្ឌអាស៊ានដើម្បីសន្តិភាព ស្ថិរភាព និងវិបុលភាពនៅក្នុងតំបន់ និងពិភពលោក៕
