មន្ត្រីជាន់ខ្ពស់នៃក្រសួងសុខាភិបាលកម្ពុជា ថ្លែងថា ក្រសួងនៅមិនទាន់មានជាវិធានការថ្មីដើម្បីឆ្លើយតបទៅនឹងការរកឃើញវីរុសបំប្លែងថ្មី «អូមីក្រុង» នៅតាមបណ្ដាប្រទេសមួយចំនួនលើពិភពលោកនៅឡើយ ខណៈក្រសួងកំពុងបន្តតាមដានវាយតម្លៃទៅលើហានិភ័យនៃវីរុសនេះបន្ថែមទៀតជាមុនសិន។
តាមរយៈសេចក្ដីជូនព័ត៌មានកាលពីថ្ងៃទី២៧ ខែវិច្ឆិកា កន្លងទៅ ក្រសួងសុខាភិបាលលើកឡើងថា ស្ថានភាពនៃការចម្លងវីរុសកូវីដ-១៩ នៅបណ្ដាប្រទេសលើសកលលោកនិងនៅក្នុងតំបន់មានការវិវត្ត ខណៈមានការរកឃើញវីរុសបំប្លែងខ្លួនថ្មីៗជាបន្តបន្ទាប់។ ក្រសួងបន្ថែមថា ករណីនេះគឺជាការព្រួយបារម្ភរបស់ពិភពលោកអំពីការកើនឡើងនៃការចម្លងវីរុសបំប្លែងខ្លួនថ្មីនេះ។
បើតាមក្រសួងសុខាភិបាល នាពេលថ្មីៗនេះ មានការលេចចេញនូវវីរុសកូវីដ-១៩បំប្លែងថ្មី B.1.1.529 ដែលហៅថា «អូមីក្រុង (Omicron)» ដោយអង្គការសុខភាពពិភពលោកបានរកឃើញនៅបណ្ដាប្រទេសមួយចំនួន ហើយអ្នកបច្ចេកទេសរបស់អង្គការអន្តរជាតិមួយនេះសម្ដែងការព្រួយបារម្ភពីលទ្ធភាពនៃការចម្លងរហ័សរបស់វាផងដែរ។
អគ្គនាយកបច្ចេកទេសនៃក្រសួងសុខាភិបាលកម្ពុជា លោកវេជ្ជបណ្ឌិត ហុក គឹមចេង ថ្លែងប្រាប់ វីអូឌី នៅថ្ងៃទី២៩ ខែវិច្ឆិកានេះ ថាគណៈកម្មការអន្តរក្រសួងក៏បានពិភាក្សាគ្នាលើការវាយតម្លៃលើវីរុសបំប្លែងថ្មីនេះដែរ ហើយក្រសួងក៏មានការប្រុងប្រយ័ត្នទៅលើការគ្រប់គ្រងអ្នកដំណើរផងដែរ។
យ៉ាងណា លោកថា ក្រសួងមិនទាន់មានការចេញជាគោលការណ៍អ្វីថ្មីសម្រាប់ទប់ទល់លើវីរុសថ្មីនេះនៅឡើយ ហើយក៏មិនទាន់មានគោលការណ៍បិទជើងហោះហើរពីប្រទេសដែលរកឃើញវីរុសបំប្លែងថ្មីនោះដែរ ក្រៅពីវិធានការដែលក្រសួងបានបង្ហោះសេចក្ដីជូនព័ត៌មានកាលពីថ្ងៃទី២៧ ខែវិច្ឆិកាកន្លងទៅ។
លោក ហុក គឹមចេង មានប្រសាសន៍ថា៖ «អាហ្នឹង [វិធានការបិទជើងហោះហើរពីប្រទេសដែលមានករណីឆ្លងវីរុសបំប្លែងថ្មី អូមីក្រុង ចូលមកកម្ពុជា] គឺនៅ! យើងតាមដានមើលទាំងអស់គ្នា។ ហើយយើងក៏មិនទាន់មានចេញជាវិធានការអីថ្មីទេ គឺយើងកំពុងតែតាមដានវាយតម្លៃទៅលើហានិភ័យនៃវីរុសហ្នឹងបន្តទៅទៀតសិន។ អាហ្នឹងអត់ទាន់ៗមានអីថ្មីទេ»។
អង្គការសហប្រជាជាតិ (UN) ប្រចាំនៅកម្ពុជា នៅថ្ងៃនេះ ក៏បានសរសេរសារនៅលើបណ្ដាញសង្គម ដោយក្រើនរម្លឹកដល់កម្ពុជា ក្នុងន័យឱ្យត្រៀមខ្លួនសម្រាប់ការកើនឡើងជាគំហុកជាយថាហេតុនូវករណីជំងឺកូវីដ-១៩។
ប្រភពដដែលបានស្រង់ការលើកឡើងរបស់ប្រធានអង្គការសុខភាពពិភពលោកប្រចាំកម្ពុជា លោកស្រី Li Ailan ដោយមានប្រសាសន៍ថា កម្ពុជាគួរតែបារម្ភអំពីវីរុសបំប្លែងខ្លួនថ្មី «អូមីក្រុង» ដែលទើបរកឃើញថ្មីៗនេះ បើទោះបីជាកម្ពុជាសម្រេចបានអត្រានៃការចាក់វ៉ាក់សាំងកូវីដ-១៩ ខ្ពស់ក៏ដោយ។
លោកស្រីវេជ្ជបណ្ឌិត Li Ailan បន្តថា៖ «បុគ្គលគ្រប់រូបគួរតែត្រៀមខ្លួនសម្រាប់ការកើនឡើងជាគំហុកជាយថាហេតុនៃករណីជំងឺកូវីដ-១៩ ហើយយើងគួរតែបន្តរៀនសូត្រនិងកែតម្រូវវិធានការឆ្លើយតបរបស់យើង»។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន លើកឡើងថា មេរោគបំប្លែង «អូមីក្រុង» នេះ កំពុងធ្វើឱ្យពិភពលោកមានការភ័យខ្លាចជាថ្មី។ យ៉ាងណា លោកស្រីថា កម្ពុជាអាចតាមដានមើលពីស្ថានភាពប្រទេសជិតខាងសិន មុននឹងពិចារណាថាតើគួរបិទការទទួលអ្នកដំណើរពីប្រទេសដែលមានករណីឆ្លងវីរុសបំប្លែងថ្មីនេះឬយ៉ាងណា ដោយសារកម្ពុជាមិនមានការហោះហើរផ្ទាល់ពីតំបន់អាហ្រ្វិកនិងអឺរ៉ុបទេ ពោលគឺគ្រាន់តែទទួលអ្នកដំណើរបន្តពីប្រទេសជិតខាង។
លោកស្រី ឆាយ ស៊ីវលីន ថា៖ «យើងអាចរង់ចាំបន្តិច ចាំមើលប្រទេសជិតខាង! ការស្កេនរបស់គេហ្នឹងមានវិធានការយ៉ាងណា? ដោយសារយើងជាប្រទេសមួយដែលយើងអត់មានយន្តហោះហោះពីតំបន់ឆ្ងាយៗមកទេ សុទ្ធតែត្រូវការឆ្លងកាត់ប្រទេសជិតខាងមកទេ។ អ៊ីចឹងយើងអាចចាំមើលបន្តិច! ប៉ុន្តែការប្រយ័ត្នប្រយែង ការតាមដានចំពោះព័ត៌មាន ក៏ដូចជាវិធានសុវត្ថិភាពអី ត្រូវតែមានការរឹតបន្តឹង»។
ប្រធានសមាគមគ្រូពេទ្យគុណធម៌កម្ពុជា លោក អ៊ូច វុទ្ធី មានប្រសាសន៍ថា វិធានការលើវីរុសថ្មីនេះ រដ្ឋាភិបាលត្រូវកត់សម្គាល់ជនបរទេសដែលចេញចូលកម្ពុជាឱ្យបានម៉ត់ចត់ ដូចជា ជនបរទេសដែលមិនបានចាក់វ៉ាក់សាំង ត្រូវធ្វើចត្តាឡីស័កនូវរយៈពេលច្បាស់លាស់ណាមួយ។ លោកបន្តថា ត្រូវពិនិត្យតាម Rapid test និង PCR ព្រមទាំងត្រូវមានភាពតឹងរ៉ឹងលើប៉ាស្ព័រវ៉ាក់សាំង ដើម្បីកាត់បន្ថយហានិភ័យ។ លោកថា បើមិនដូច្នេះទេ កម្ពុជាអាចនឹងមានហានិភ័យពីករណី «អូមីក្រុង» មិនខាន។
លោក អ៊ូច វុទ្ធី បន្តថា៖ «បើសិនជាយើងចេះតែបណ្ដែតបណ្ដោយ ហើយមិនពិនិត្យមើលនូវជនបរទេសទាំងនោះទេ យើងមិនបានមើលដិតដល់ អាហ្នឹងបានន័យថា យើងអាចនឹងយកមេរោគហ្នឹងចូលប្រទេសយើងទៀតហើយ។ ព្រោះឥលូវនេះ យើងកំពុងតែបើកទូលាយ ហើយប្រជាជនយើងកំពុងតែសប្បាយរីករាយក្នុងការដែលរកទទួលទាន។ បើសិនជាបិទខ្ទប់ដូចមុនទៀត មួយៗស្រែករកពុទ្ធោគ្រប់គ្នាហើយ»។
យ៉ាងណា លោកថា ក្រសួងសុខាភិបាលក៏បានរៀបចំការត្រួតពិនិត្យលើជនបរទេសដែលចេញចូលប្រទេសតាមជើងហោះហើរបានច្បាស់លាស់ផងដែរ។
សេចក្ដីប្រកាសព័ត៌មានរបស់ក្រសួងសុខាភិបាល កាលពីថ្ងៃទី២៧ ខែវិច្ឆិកា បានអំពាវនាវនិងក្រើនរំឭកសាធារណជនឱ្យបន្តអនុវត្តវិធានការសំខាន់ៗដូចជា ការពាក់ម៉ាស់ឱ្យបានត្រឹមត្រូវ អនាម័យដៃដោយលាងសម្អាតញឹកញាប់ ការរក្សាគម្លាតសុវត្ថិភាពបុគ្គល១ម៉ែត្រកន្លះឡើង ការកែលម្អខ្យល់ចេញចូលនៃទីធ្លា ចាក់ថ្នាំបង្ការជំងឺកូវីដ-១៩ឱ្យបានគ្រប់ដូស និងរាយការណ៍ជូនអាជ្ញាធរមូលដ្ឋានអំពីករណីសង្ស័យនូវរោគសញ្ញានៃជំងឺជាដើម ដើម្បីការពារនិងទប់ស្កាត់បានទាន់ពេលវេលានូវការចម្លងវីរុសប្រភេទថ្មីនេះ៕
