ក្រសួងការបរទេសបានឱ្យដឹងថា នាយករដ្ឋមន្ត្រីឡាវថ្មី លោក ផនខាំ វីផាវ៉ាន់ (Phankham Viphavanh) មកបំពេញទស្សនកិច្ចផ្លូវការនៅកម្ពុជា រយៈពេល២ថ្ងៃ ចាប់ពីថ្ងៃទី២៩ ដល់ថ្ងៃទី៣០ ខែវិច្ឆិកា ឆ្នាំ២០២១ ហើយការមកបំពេញទស្សនកិច្ចផ្លូវការនេះធ្វើឡើងតាមការអញ្ជើញរបស់លោកនាយករដ្ឋមន្ត្រី ហ៊ុន សែន។
បើតាមក្រសួងការបរទេសកម្ពុជា កាលពីថ្ងៃសៅរ៍ បញ្ជាក់ថា ក្នុងអំឡុងពេលនៃដំណើរទស្សនកិច្ចនៅកម្ពុជានេះ លោក ហ៊ុន សែន និងលោក ផនខាំ វីផាវ៉ាន់ នឹងមានកិច្ចប្រជុំពិភាក្សាលើទំនាក់ទំនងនិងកិច្ចសហប្រតិបត្តិការទ្វេភាគី រួមទាំងការស្ដារសង្គម-សេដ្ឋកិច្ចឡើងវិញ ក្រោយវិបត្តិនៃជំងឺកូវីដ-១៩ បញ្ហាតំបន់ និងអន្តរជាតិនានា ដែលជាចំណាប់អារម្មណ៍និងក្តីបារម្ភរួម។
ក្រសួងការបរទេសមានសុទិដ្ឋិនិយមថា ដំណើរទស្សនកិច្ចផ្លូវការរបស់លោកនាយករដ្ឋមន្រ្តីឡាវនៅកម្ពុជា អំឡុងពេលដែលកម្ពុជាកំពុងបើកប្រទេសឡើងវិញ នឹងរួមចំណែកក្នុងការបន្តពង្រឹងបន្ថែមទៀតនូវចំណងមិត្តភាពជាប្រពៃណីដ៏យូរអង្វែង សាមគ្គីភាពជាភាតរភាព ភាពជាអ្នកជិតខាងល្អ ដៃគូយុទ្ធសាស្រ្តគ្រប់ជ្រុងជ្រោយនិងយូរអង្វែង និងកិច្ចសហប្រតិបត្តិការដ៏ជិតស្និទ្ធរវាងប្រទេសទាំងពីរ ក៏ដូចជាជំរុញកិច្ចសហប្រតិបត្តិការនៅក្នុងក្របខណ្ឌអាស៊ាន ដើម្បីសន្តិភាព ស្ថិរភាព និងវិបុលភាពនៅក្នុងតំបន់និងពិភពលោក។
លោក ផនខាំ វីផាវ៉ាន់ ជានាយករដ្ឋមន្រ្តីថ្មីរបស់ឡាវដែលទើបឡើងកាន់តំណែងកាលពីខែមីនា ឆ្នាំ២០២១នេះ បន្តពីលោក ថងលួន ស៊ីសូលីត។
កម្ពុជា-ឡាវ ជាប្រទេសមានព្រំប្រទល់ជាប់គ្នាប្រវែងជាង៥០០គីឡូម៉ែត្រ។ ឡាវ ក៏ជាប្រទេសមួយដែលបានចុះកិច្ចព្រមព្រៀងក្នុងការផ្គត់ផ្គង់ថាមពលអគ្គិសនីមកកាន់កម្ពុជា ពោលគឺសម្រាប់ខេត្តព្រះវិហារ និងខេត្តស្ទឹងត្រែង ផងដែរ៕
