កូវីដ-១៩, ព័ត៌មានជាតិ, អភិបាលកិច្ច

រដ្ឋាភិបាលហាមឃាត់អ្នកដំណើរឆ្លងកាត់ប្រទេស១០នៅទ្វីបអាហ្វ្រិកចូលមកកម្ពុជា

លោក សេង ថៃ
| ៣០ វិច្ឆិកា ២០២១
ម៉ោង ០៩:៣៩

វ៉ាក់សាំងកូវីដ-១៩ (ស៊ីណូវ៉ាក់ – Sinovac) ដែលបានបញ្ជាទិញពីចិន ចំនួន១,៥លានដូស មកដល់ព្រលានយន្តហោះភ្នំពេញអន្តរជាតិ រាជធានីភ្នំពេញ នាព្រឹកថ្ងៃទី២៦ ខែមីនា ឆ្នាំ២០២១។ (ជន ចាន់រ៉ែន)

រដ្ឋាភិបាលកម្ពុជាកាលពីយប់មិញនេះ បានចេញសេចក្ដីសម្រេចហាមឃាត់អ្នកដំណើរ ឬអ្នកដែលបានឆ្លងកាត់ប្រទេសចំនួន១០នៅទ្វីបអាហ្រ្វិក ឬអ្នកមានប្រវត្តិធ្វើដំណើរទៅប្រទេសទាំង១០ ក្នុងអំឡុងពេល៣សប្ដាហ៍មុនពេលធ្វើដំណើរចូលប្រទេសកម្ពុជា។

យោងតាមសេចក្ដីប្រកាសព័ត៌មានរបស់ក្រសួងសុខាភិបាលដែលចេញផ្សាយកាលពីយប់ថ្ងៃទី២៩ ខែវិច្ឆិកា បានលើកឡើងថា ការហាមឃាត់នេះ គឺរាប់ទាំងអ្នកធ្វើដំណើរតាមផ្លូវអាកាស ផ្លូវគោក និងផ្លូវទឹក ដើម្បីទប់ស្កាត់ការឆ្លងចូលកម្ពុជានូវមេរោគកូវីដ-១៩ ប្រភេទ អូមីក្រុង (Omicron)។ ការហាមឃាត់នេះនឹងត្រូវចាប់អនុវត្តក្រោយពី៤៨ម៉ោង បន្ទាប់ពីចេញសេចក្តីប្រកាសព័ត៌មាននេះ រហូតដល់មានការជូនដំណឹងជាថ្មី។

ប្រទេសទាំង១០នោះ រួមមាន ប្រទេស Botswana, Eswatini, Lesotho, Mozambigue, Namibia, South Africa, Zimbabwe, Malawi, Angola និងប្រទេស Zambia ជាដើម។

កាលពីថ្ងៃសៅរ៍មុន ក្រសួងសុខាភិបាលបានអំពាវនាវនិងក្រើនរម្លឹកដល់ប្រជាពលរដ្ឋខ្មែរឱ្យមានការប្រុងប្រយ័ត្ននិងការពារខ្លួនពីការឆ្លងជំងឺកូវីដ-១៩ ប្រភេទថ្មី (B.1.1.529) ដែលក្រុមបច្ចេកទេសរបស់អង្គការសុខភាពពិភពលោកបានកំណត់ឈ្មោះថ្មីនៃវីរុសនេះថា «អូមីក្រុង (Omicron)»។

វីរុសកូវីដ-១៩បំប្លែងខ្លួនថ្មី អូមីក្រង់ (Omicron) ដែលមានសមត្ថភាពចម្លងខ្លាំងជាងវីរុសកូវីដ-១៩ប្រភេទ Delta ត្រូវបានរកឃើញដំបូងគេ នៅក្នុងប្រទេសអាហ្វ្រិកខាងត្បូង កាលពីថ្ងៃទី២៣ ខែវិច្ឆិកា ឆ្នាំ២០២១៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។