ប្រជាសហគមន៍រាប់រយនាក់ មកពីស្រុកចំនួន២ នៃខេត្តកំពង់ស្ពឺ បានប្រមូលផ្ដុំគ្នានៅមុខស្នងការដ្ឋាននគរបាលខេត្ត ខណៈតំណាងរបស់ពួកគេ៧នាក់ត្រូវបានសមត្ថកិច្ចកោះហៅឱ្យឆ្លើយបំភ្លឺនៅថ្ងៃអង្គារនេះ ក្រោយពីតំណាងទាំងនោះបាននាំគ្នាតវ៉ាប្រឆាំងអាជ្ញាធរឈូសឆាយដីព្រៃសហគមន៍។
ពលរដ្ឋម្នាក់ អ្នកស្រី ខន ឃន ដែលចូលរួមការប្រមូលផ្ដុំនេះ អះអាងថា ប្រជាសហគមន៍ប្រហែល៦០០នាក់ មកពី៣ឃុំ នៃស្រុកឱរ៉ាល់ និងស្រុកថ្ពង បានប្រមូលផ្ដុំគ្នានៅមុខស្នងការដ្ឋាននគរបាលខេត្តកំពង់ស្ពឺនេះ ដើម្បីគាំទ្រតំណាងពលរដ្ឋ៧នាក់ដែលត្រូវចូលបំភ្លឺ់។
អ្នកស្រីបន្តថា កាលពីអំឡុងខែតុលា ឆ្នាំ២០២១នេះ អ្នកភូមិរាប់រយនាក់បាននាំគ្នាតវ៉ាជាបន្តបន្ទាប់ប្រឆាំងក្រុមអាជ្ញាធរដែលបានដាក់គ្រឿងចក្រឈូសឆាយដីព្រៃសហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» ស្ថិតនៅភូមិពោធិ៍មាស ឃុំត្រពាំងជោ ស្រុកឱរ៉ាល់ ដើម្បីបែងចែកទៅឱ្យគ្រួសារកងទ័ពចំនួន៤១គ្រួសារ។
អ្នកស្រីបន្តថា ក្រោយពីក្រុមពលរដ្ឋផ្ទុះការតវ៉ានេះ ខាងសមត្ថកិច្ចបានកោះហៅតំណាងពលរដ្ឋ៧នាក់ រួមមាន លោក ឃន សារិទ្ធិ, លោក សឹង សុខុម, លោក ឡោ សុលី, លោក ឆន ធា និងតំណាងពលរដ្ឋផ្សេងទៀត ក្រោមការចោទប្រកាន់ថាបានជេរប្រមាថជាសាធារណៈ និងបំផ្លិចបំផ្លាញទ្រព្យសម្បត្តិអ្នកដទៃ។
អ្នកស្រីបន្ថែមថា៖ «តំណាងរបស់ពួកយើងអត់បានធ្វើអ្វីខុសផង ហើយក៏មិនបានជេរប្រមាថអ្នកណាផង។ ប្រជាពលរដ្ឋគេមកគាំទ្រអ៊ីចឹងហើយ ពីព្រោះកាលទៅតវ៉ាហ្នឹង យើងទៅទាំងអស់គ្នា រាប់រយដូចគ្នា ដល់ពេលកោះហៅតែ៥ទៅ៦នាក់ ម៉េចកើត? យើងមិនបានធ្វើអីខុសផង យើងគ្រាន់តែនាំគ្នាទៅតវ៉ា ដើម្បីការពារព្រៃធម្មជាតិហ្នឹង ទុកសម្រាប់កូនចៅជំនាន់ក្រោយ និងការពារសត្វព្រៃនៅទីហ្នឹងទុក។ អ៊ីចឹងយើងគិតថា អ្វីដែលពួកយើងធ្វើនេះ វាអត់ខុសផង»។
តំណាងពលរដ្ឋម្នាក់ លោក សឹង សុខ ដែលរងបណ្ដឹងនៅស្នងការដ្ឋាននគរបាលខេត្ត និយាយថា ករណីសមត្ថកិច្ចកោះហៅរូបលោកនិងតំណាងពលរដ្ឋផ្សេងទៀតទៅឆ្លើយបំភ្លឺនេះ ជារឿងអយុត្តិធម៌មួយសម្រាប់ពួកគាត់ និងជាការគំរាមកំហែងបំបាក់ស្មារតីប្រជាពលរដ្ឋមិនឱ្យហ៊ានចេញតវ៉ាប្រឆាំងការឈូសឆាយដីព្រៃសហគមន៍បន្តទៀត។
លោកបន្ថែមថា៖ «ព្រៃសហគមន៍ឧត្ដមស្រែខ្ពស់ ដែលប្រជាពលរដ្ឋខំការពារ១០ទៅ២០ឆ្នាំនោះ ស្រាប់តែមានគ្រឿងចក្រទៅឈូសឆាយដោយគ្មានការជូនដំណឹង គ្មានការផ្ដល់ព័ត៌មានពីខាងណា។ អ៊ីចឹងប្រជាពលរដ្ឋយើងដែលខំការពារត្រូវដេញចេញសិនហើយ ដល់យើងដេញចេញ ស្រាប់តែមានលិខិតកោះហៅពីស្នងការថា យើងហ្នឹងបំផ្លិចបំផ្លាញទ្រព្យសម្បត្តិអ្នកដទៃ និងជេរប្រមាថជាសាធារណៈ។ អ៊ីចឹងវាអយុត្តិធម៌ណាស់ បានជាប្រជាពលរដ្ឋគាត់មិនសុខចិត្ត។ អ្នកដែលខំការពារ អ្នកដែលខំថែរក្សា បែរជាមានការចោទប្រកាន់! ដល់អ្នកបំផ្លិចបំផ្លាញ អត់មានទោសទៅវិញ»។
ស្នងការនគរបាលខេត្តកំពង់ស្ពឺ លោក សម សាមួន មានប្រសាសន៍ថា សមត្ថកិច្ចពិតជាបានកោះហៅពលរដ្ឋទាំង៧នាក់មកឆ្លើយបំភ្លឺនៅថ្ងៃនេះមែន ក្រោយទទួលបានពាក្យបណ្ដឹង ប៉ុន្តែត្រូវបានពន្យារពេលវិញ ដោយសារអ្នកកាន់សំណុំរឿងនេះសុំច្បាប់។ យ៉ាងណា ស្នងការរូបនេះសុំមិនប្រាប់ឈ្មោះដើមបណ្ដឹងនិងបទចោទនោះ។
លោកបន្ថែមថា៖ «ចង់ដឹងថាចោទពីបទអី សួរទៅខាងប្រជាពលរដ្ឋទៅ កុំឱ្យខ្ញុំនិយាយអី ពីព្រោះនគរបាលត្រូវតែឈរលើយុត្តិធម៌។ កាលណាមានគេប្ដឹង យើងត្រូវទទួលបណ្ដឹងគេ ហើយស្រាវជ្រាវឱ្យឃើញថាវាយ៉ាងម៉េចៗ ដើម្បីកសាងសំណុំរឿងដាក់ទៅតុលាការ អាហ្នឹងភារកិច្ចនគរបាលមានតែប៉ុណ្ណឹង»។
មន្ត្រីសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជាប្រចាំខេត្តកោះកុង និងកំពង់ស្ពឺ លោក ញ៉ិល ភាព យល់ថា ករណីសមត្ថកិច្ចកោះហៅតំណាងពលរដ្ឋទៅឆ្លើយបំភ្លឺនេះ ជារឿងមិនត្រឹមត្រូវ និងជាការគំរាមកំហែងកុំឱ្យពលរដ្ឋហ៊ានតវ៉ា។
មន្ត្រីសង្គមស៊ីវិលរូបនេះបន្តថា កន្លងមក រដ្ឋាភិបាលឬអាជ្ញាធរតែងតែប្រើប្រាស់រូបភាពបែបនេះ ឬប្រើប្រព័ន្ធតុលាការ ដើម្បីគំរាមកំហែងដល់ប្រជាសហគមន៍និងសកម្មជនបរិស្ថាន មិនឱ្យសកម្មក្នុងការការពារព្រៃឈើឬព្រៃសហគមន៍។ លោកថា ប្រសិនបើរដ្ឋាភិបាលឬអាជ្ញាធរនៅតែធ្វើបែបនេះ ព្រៃឈើសហគមន៍និងព្រៃឈើនៅកម្ពុជាប្រឈមនឹងការបាត់បង់យ៉ាងឆាប់រហ័សនៅពេលខាងមុខ។
លោកបន្ថែមថា៖ «ហើយធ្វើនេះ គឺផ្ទុយពីរដ្ឋធម្មនុញ្ញ! យើងដឹងហើយថា រដ្ឋធម្មនុញ្ញយើងបានចែងយ៉ាងច្បាស់ថា ពលរដ្ឋគ្រប់រូបមានសិទ្ធិយ៉ាងសកម្ម ដើម្បីការពារផលប្រយោជន៍ស្របច្បាប់ និងផលប្រយោជន៍ធនធានធម្មជាតិទាំងអស់ហ្នឹង»។
កាលពីអំឡុងខែតុលា ឆ្នាំ២០២១ អាជ្ញាធរបានដាក់គ្រឿងចក្រឈូសឆាយដីព្រៃទំហំ២៦២ហិកតា ស្ថិតនៅភូមិពោធិ៍មាស ឃុំត្រពាំងជោ ស្រុកឱរ៉ាល់ ដើម្បីបែងចែកទៅឱ្យគ្រួសារកងទ័ពចំនួន៤១គ្រួសារ ប៉ុន្តែត្រូវបានផ្អាកវិញ ក្រោយពីប្រជាពលរដ្ឋផ្ទុះការតវ៉ាជាបន្តបន្ទាប់ ដោយពួកគេអះអាងថា ដីព្រៃដែលអាជ្ញាធរធ្វើសកម្មភាពឈូសឆាយនោះជាដីព្រៃរបស់សហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ»។
ប៉ុន្តែកាលនោះ អភិបាលខេត្តកំពង់ស្ពឺ លោក វ៉ី សំណាង ប្រាប់ វីអូឌី ថាដីដែលអាជ្ញាធរឈូសឆាយនោះ មិនស្ថិតក្នុងដីព្រៃសហគមន៍ឡើយ។ លោកបានចោទពលរដ្ឋដែលនាំគ្នាតវ៉ានោះថាជាក្រុមបក្សប្រឆាំង ហើយថា ការតវ៉ានោះមានការញុះញង់ពីមេខ្យល់និងក្រុមអង្គការសង្គមស៊ីវិលមួយចំនួន។
លោក វ៉ី សំណាង ក៏បានព្រមានចាត់វិធានការច្បាប់ចំពោះអ្នកតវ៉ា និងអ្នកដែលលោកថាបានញុះញង់ឱ្យពលរដ្ឋតវ៉ានោះផងដែរ។
បើតាមពលរដ្ឋ ដើមឡើយ សហគមន៍ «ឧត្ដមស្រែខ្ពស់» ហៅ «ព្រៃមេត្តាធម្មជាតិ» មានផ្ទៃដីទំហំជាង២ ៨០០ហិកតា ប៉ុន្តែក្រោយមកត្រូវបានរដ្ឋាភិបាលកាត់ទៅឱ្យក្រុមហ៊ុនឯកជន និងក្រុមទាហានជាបន្តបន្ទាប់ ហើយបច្ចុប្បន្នសហគមន៍មួយនេះនៅសល់ដីប្រហែលជាង៨៨០ហិកតាប៉ុណ្ណោះ ខណៈអ្នកភូមិបានការពារជាង២០ឆ្នាំមកហើយ៕
