អភិបាលរាជធានីភ្នំពេញ បានអនុញ្ញាតឱ្យម្ចាស់ទីតាំងបើកដំណើរការចំពោះអាជីវកម្មពេលរាត្រីឡើងវិញ ដោយផ្អែកលើការរស់នៅតាមបែបគន្លងថ្មី ចាប់ពីថ្ងៃទី៣០ ខែវិច្ឆិកានេះតទៅ។
នៅថ្ងៃទី៣០ ខែវិច្ឆិកា ឆ្នាំ២០២១នេះ រដ្ឋបាលរាជធានីភ្នំពេញ បានចេញសេចក្ដីសម្រេចថ្មីមួយ អនុញ្ញាតឱ្យម្ចាស់អាជីវកម្មពេលរាត្រី រួមមាន រង្គសាល ខារ៉ាអូខេ និងឌីស្កូតែក អាចបើកដំណើរការឡើងវិញ ប៉ុន្តែត្រូវអនុវត្តតាមគន្លងប្រក្រតីភាពថ្មី។
លិខិតបានបញ្ជាក់ថា ម្ចាស់អាជីវកម្ម ឬម្ចាស់ទីតាំង ចាំបាច់ត្រូវមានកាតព្វកិច្ចចាត់តាំងបុគ្គលិកប្រចាំការនៅមុខច្រកចេញ-ចូលទីតាំង ដើម្បីធ្វើការត្រួតពិនិត្យបណ្ណចាក់វ៉ាក់សាំង ដែលស្របតាមការណែនាំរបស់រដ្ឋបាលរាជធានីភ្នំពេញ និងអនុវត្តវិធានការ «៣កុំ ៣ការពារ» ផងដែរ។
ប្រភពដដែលបន្តថា៖ «ម្ចាស់ទីតាំង ឬម្ចាស់អាជីវកម្ម មិនអនុវត្ត ឬអនុវត្តមិនបានត្រឹមត្រូវតាមការណែនាំ នឹងត្រូវចាត់វិធានការដកហូតអាជ្ញាបណ្ណឬលិខិតអនុញ្ញាត និងអាចឈានដល់ការចុះបិទទីតាំងផងដែរ។ ដោយឡែក ចំពោះបុគ្គលល្មើសពាក់ព័ន្ធ ត្រូវអនុវត្តទណ្ឌកម្មរដ្ឋបាលនិងទណ្ឌកម្មច្បាប់ រួមទាំងការផ្សព្វផ្សាយជាសាធារណៈចំពោះបុគ្គលល្មើស ស្របតាមច្បាប់ស្ដីពីវិធានការទប់ស្កាត់ការឆ្លងនៃជំងឺកូវីដ-១៩ជាធរមាន ដោយគ្មានការលើកលែង»។
សូមបញ្ជាក់ជូនថា កាលពីថ្ងៃម្សិលមិញ រដ្ឋបាលរាជធានីភ្នំពេញបានប្រកាសផ្អាកបណ្ដោះអាសន្នចំពោះសកម្មភាពការងារ មុខរបរ ឬអាជីវកម្ម ដែលមានហានិភ័យខ្ពស់នៃការឆ្លងរាលដាលជំងឺកូវីដ-១៩ និងការជួបជុំ ឬប្រមូលផ្ដុំជាលក្ខណៈឯកជន នៅរាជធានីភ្នំពេញ សម្រាប់រយៈពេលមួយសប្ដាហ៍ទៀត ចាប់ពីថ្ងៃទី២៩ ខែវិច្ឆិកា រហូតដល់ថ្ងៃទី៥ ខែធ្នូ។ អាជ្ញាធរអះអាងថា ការផ្អាកមួយរយៈនេះ ដើម្បីប្រយុទ្ធនិងទប់ស្កាត់ការឆ្លងរាលដាលនៃជំងឺកូវីដ-១៩។ ប៉ុន្តែសេចក្ដីសម្រេចនេះ ទើបតែអនុវត្តបានមួយថ្ងៃ រដ្ឋបាលរាជធានីភ្នំពេញបានប្ដូរចិត្តឱ្យបើកអាជីវកម្មទាំងនោះឡើងវិញ៕
