ក្រុមសាច់ញាតិអ្នកជាប់ទោសនៃចលនាកងទ័ពសេរីជាតិកម្ពុជា ហៅកាត់ថា CFF អំពាវនាវទៅតុលាការដោះលែងសមាជិកគ្រួសាររបស់គាត់ឱ្យមានសេរីភាពវិញតាមការកំណត់ ដោយពួកគេអះអាងថា តុលាការអនុវត្តទោសដោយឃុំខ្លួនពួកគេលើសនីតិវិធីច្បាប់ ដែលធ្វើឱ្យមានភាពអយុត្តិធម៌ដល់ពួកគេ។
វ័យ៤៤ឆ្នាំ អ្នកស្រី ស៊្រី សុភឿន ត្រូវជាបងស្រីបង្កើតរបស់លោក ស្រ៊ី ស្រេន ដែលជាអ្នកទោសនៃចលនា CFF បានប្រាប់ វីអូឌី នៅថ្ងៃអង្គារនេះថា ប្អូនប្រុសគាត់ត្រូវបានសមត្ថកិច្ចចាប់ខ្លួនកាលពីថ្ងៃទី១០ ខែតុលា ឆ្នាំ២០០១។ ក្រោយមក នៅថ្ងៃទី២៥ ខែតុលា ឆ្នាំ២០០១ដដែល តុលាការបានសម្រេចផ្ដន្ទាទោសដាក់ពន្ធនាគារចំនួន២០ឆ្នាំ នៅពន្ធនាគារត្រពាំងផ្លុង ក្បែរព្រំដែនកម្ពុជា-វៀតណាម ក្នុងខេត្តត្បូងឃ្មុំ។
អ្នកស្រីបន្តថា បើគិតត្រឹមថ្ងៃទី៣០ ខែវិច្ឆិកា ឆ្នាំ២០២១នេះ ការអនុវត្តទោសលើប្អូនរបស់គាត់លើស១ខែ៥ថ្ងៃ ខណៈតុលាការមិនទាន់ដោះលែងប្អូនគាត់ឱ្យមានសេរីភាពនៅឡើយ។ អ្នកស្រីចាត់ទុកការបន្តឃុំខ្លួនប្អូនគាត់ជារឿងខុសច្បាប់។
ករណីនេះ អ្នកស្រីអំពាវនាវឱ្យតុលាការដោះលែងប្អូនគាត់ឱ្យមានសេរីភាពវិញ ទៅតាមការកំណត់ទោសរបស់តុលាការ ដើម្បីបានមកជួបជុំគ្រួសារ។
អ្នកស្រីអំពាវនាវដូច្នេះថា៖ «ខ្ញុំចង់ឱ្យគេដោះលែងគាត់ឱ្យបានឆាប់ៗ ព្រោះអីដល់ថ្ងៃគាត់ចេញហើយ លើស១ខែប៉ុន្មានថ្ងៃហើយ! អ៊ីចឹងខ្ញុំសូមសំណូមពរឱ្យខាងតុលាការដែលថាសម្រេចផ្ដន្ទាទោសប្អូនខ្ញុំ សូមសំណូមពរឱ្យដោះលែងគាត់បានចេញក្រៅមក ព្រោះអីគាត់ត្រូវដល់ពេលដោះលែងហើយ ត្រូវឱ្យគាត់មកជួបជុំគ្រួសារ ព្រោះគាត់បែកគ្នាយូរហើយ រយៈពេល២០ឆ្នាំហើយ មិនតិចទេ តាំងពីក្មេងរហូតដល់អាយុ៤២ឆ្នាំ អយុត្តិធម៌ណាស់។
ចំណែកអ្នកស្រី ហៃ ចន្ថា វ័យ៤២ឆ្នាំ ដែលអះអាងថាជាកូនស្រីបង្កើតរបស់លោក សៀង ហៃ និយាយថា បច្ចុប្បន្ននេះ ឪពុកគាត់មានអាយុជាង៧០ឆ្នាំ ដោយគាត់ត្រូវបានតុលាការកាត់ទោសឱ្យជាប់ពន្ធនាគារចំនួន២០ឆ្នាំ ពាក់ព័ន្ធនឹងចលនា CFF។ អ្នកស្រីបង្ហាញជាចម្ងល់ថា ហេតុអ្វីបានជាតុលាការនៅតែបន្តឃុំខ្លួនឪពុករបស់គាត់ទុកឱ្យលើសរហូតជាងមួយខែបែបនេះ។
អ្នកស្រីបន្តថា បច្ចុប្បន្ននេះ ឪពុកគាត់មានវ័យចាស់ជរា និងមានជំងឺប្រចាំកាយច្រើន ដូចជា ទឹកនោមផ្អែម បេះដូង លើសឈាម និងភ្នែកឡើងបាយដល់២០០ ជាដើម។ ករណីនេះ អ្នកស្រីស្នើទៅតុលាការដោះលែងឪពុកឱ្យមានសេរីភាពវិញ ដើម្បីមានឱកាសយកឪពុកទៅព្យាបាលជំងឺនិងមើលថែផងដែរ ។
អ្នកស្រីអំពាវនាវថា៖ «ដល់កំណត់ដែលតុលាការកាត់ទោសគាត់២០ឆ្នាំហើយ ហេតុអីនៅឃុំគាត់បន្តទៀត? ហើយទី២ ចង់ថាពេលដែលគាត់វិលមកវិញ កូនចៅត្រូវតែយកគាត់មកមើលថែ ដើម្បីព្យាបាលជំងឺគាត់ ព្រោះកាលពីម្សិលមិញ គាត់តេមកឱ្យខ្ញុំដាក់លុយឱ្យគាត់ចាយ គាត់អត់ស្រួលខ្លួនដែរ ក្ដៅញាក់ញ័រ បានគេនៅជិតហ្នឹងជួយច្របាច់ឱ្យគាត់ ព្រោះគាត់ចាស់ជរាហើយ»។
សាច់ញាតិអ្នកទោសទាំង២នាក់នេះអះអាងប្រហាក់ប្រហែលគ្នាថា នៅពេលដែលគាត់ទៅដល់ពន្ធនាគារត្រពាំងផ្លុង កាលពីថ្ងៃទី២៥ ខែតុលា ឆ្នាំ២០២១ ដើម្បីទទួលយកអ្នកដែលបញ្ចប់ការអនុវត្តទោសក្នុងពន្ធនាគារនៃចលនា CFF នោះ គឺអ្នកផ្សេងដែលជាប់ពាក់ព័ន្ធរឿងនេះដែរ ត្រូវបានខាងពន្ធនាគារអនុញ្ញាតឱ្យចេញអស់ហើយ លើកលែងតែសមាជិកគ្រួសារគាត់២នាក់នេះ។
ចំណែកមន្ត្រីពន្ធនាគារត្រពាំងផ្លុងមួយរូប សុំមិនបញ្ចេញឈ្មោះ បញ្ជាក់ថា លោកមិនអាចផ្ដល់ព័ត៌មានជូនអ្នកសារព័ត៌មានទេ ដោយតម្រូវឱ្យទៅជួបផ្ទាល់នៅពន្ធនាគារ និងទំនាក់ទំនងទៅតុលាការខេត្តត្បូងឃ្មុំ និងសាលាដំបូងរាជធានីភ្នំពេញ ជាអ្នកឆ្លើយតបជំនួសវិញ។
លោកមានប្រសាសន៍ថា៖ «បងអាចទំនាក់ទំនងអយ្យការអមសាលាដំបូងខេត្តត្បូងឃ្មុំក៏បាន ព្រោះខាងពន្ធនាគារបានធ្វើរបាយការណ៍ជូន ដូចជាសាលាដំបូងរាជធានីភ្នំពេញ ហើយនិងសាលាដំបូងខេត្តត្បូងឃ្មុំ ដែលគាត់ទទួលបន្ទុកការងារហ្នឹង»។
វីអូឌី មិនអាចសុំការបំភ្លឺពីអ្នកនាំពាក្យសាលាដំបូងខេត្តត្បូងឃ្មុំ លោក ថេង ជាង និងអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានទេ នៅថ្ងៃអង្គារនេះ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត ជំរុញទៅក្រសួងយុត្តិធម៌ និងស្ថាប័នពាក់ព័ន្ធ ត្រូវស្រាវជ្រាវនិងស៊ើបអង្កេតរកឱ្យឃើញថា ពិតជាមានករណីឃុំខ្លួនអ្នកទោសលើសច្បាប់ប្រាកដមែនឬទេ។ លោកថា បើរកឃើញមានករណីបែបនេះមែន ក្រសួងត្រូវដាក់ពិន័យដល់មន្ត្រីតុលាការ ដើម្បីធ្វើកំណែទម្រង់ប្រព័ន្ធយុត្តិធម៌ឱ្យមានប្រសិទ្ធភាពបន្ថែមទៀត។
លោកមានប្រសាសន៍ថា៖ «បើសិនជាពួកគាត់អនុវត្តទោសតាមអំណាចសាលក្រមឬអំណាចសាលដីកា២០ឆ្នាំគ្រប់ហើយ ហើយមិនដោះលែង ហើយបន្តឃុំខ្លួន វាលើសអំណាចសាលក្រម ស្មើនឹងខុសច្បាប់។ ចំណុចហ្នឹងហើយ អ្នកដែលពាក់ព័ន្ធឬអ្នកដែលធ្វេសប្រហែស ក្រសួងយុត្តិធម៌ត្រូវពិនិត្យនិងពិចារណា ឬក៏ឧត្ដមក្រុមប្រឹក្សានៃអង្គចៅក្រមពិនិត្យនិងពិចារណា»។
លោកបន្ថែមថា៖ «ពីព្រោះនៅក្រសួងយុត្តិធម៌ និងឧត្ដមក្រុមប្រឹក្សានៃអង្គចៅក្រម គឺត្រូវធ្វើការស៊ើបអង្កេតតាមនីតិវិធី តើកំហុសនីតិវិធីឬមួយយ៉ាងម៉េច! បើរកឃើញថាមានកំហុស ត្រូវអនុវត្តតាមវិន័យរដ្ឋបាល។ ប៉ុន្តែបើថា ការឃុំខ្លួនគេដោយលើសអំណាចសាលក្រម វាស្មើនឹងការឃុំខ្លួនខុសច្បាប់ហើយ។ ចុះទាក់ទងនឹងការបង្ខាំងមនុស្សខុសច្បាប់? បង្ខាំងលើសតែ១ម៉ោង ដែលមិនឱ្យគេមានសេរីភាព ចាត់ទុកថាមានទោស។ ចុះពេលឃុំខ្លួនគេខុសច្បាប់វិញ? អាហ្នឹងក៏ចាត់ទុកថានៅក្នុងបទល្មើសដូចគ្នាដែរ»។
លោក ស្រ៊ី ស្រេន ដែលជាកសិករ និងលោក សៀង ហៃ ដែលជាប្រធានចលនាកងទ័ពសេរីជាតិកម្ពុជាប្រចាំប្រទេសថៃពេលនោះ ត្រូវបានចាប់ខ្លួនកាលពីថ្ងៃទី១០ ខែតុលា ឆ្នាំ២០២១ ក្នុងទឹកដីថៃដូចគ្នា ហើយនៅថ្ងៃទី២៥ ខែឆ្នាំដដែលនោះ អ្នកទាំងពីរត្រូវបានតុលាការកាត់ទោសឱ្យជាប់ពន្ធនាគារម្នាក់២០ឆ្នាំ ពីបទ «អំពើភេរវកម្ម សមគំនិតក្នុងអំពើភេរវកម្ម បទល្មើសប្រដាប់អាវុធ» ជាដើម។
ចលនាកងទ័ពសេរីជាតិកម្ពុជា (Cambodian Freedom Fighter CFF) ត្រូវបានបង្កើតឡើងដោយលោក ឈុន យ៉ាសិទ្ធិ ជនជាតិខ្មែរ សញ្ជាតិអាមេរិក អំឡុងឆ្នាំ១៩៩៨។ ពីរឆ្នាំក្រោយមក ពោលគឺនៅចុងឆ្នាំ២០០០ លោក ឈុន យ៉ាសិទ្ធិ ដែលស្នាក់នៅប្រទេសថៃពេលនោះ បានដឹកនាំប្រតិបត្តិការយោធាមួយដែលមានឈ្មោះ «ភ្នំភ្លើង» ដោយបានវាយប្រហារលើទីស្នាក់ការក្រសួងការពារជាតិ និងទីស្ដីការគណៈរដ្ឋមន្ត្រី នៅរាជធានីភ្នំពេញ បណ្ដាលឱ្យមនុស្សជាច្រើននាក់ស្លាប់ ប៉ុន្តែប្រតិបត្តិការនោះត្រូវបានបរាជ័យ។
អ្នកដែលជាប់ពាក់ព័ន្ធក្នុងរឿងនេះជាច្រើននាក់ ត្រូវបានរដ្ឋាភិបាលចាប់ខ្លួនដាក់គុក ក្នុងនោះក៏មានអតីតសមាជិកគណបក្សសមរង្ស៊ី ចំនួន៥នាក់ ដែលតុលាការកាត់ទោសម្នាក់ៗជាប់ពន្ធនាគារ១៥ឆ្នាំ ប៉ុន្តែនៅខែកញ្ញា ឆ្នាំ២០១១ ព្រះមហាក្សត្រខ្មែរបានចេញព្រះរាជក្រឹត្យប្រទានការលើកលែងទោសដល់ពួកគេ។ អ្នកជាប់ឃុំក្នុងសំណុំរឿងភេរវកម្មនៃ CFF ក្រៅពីនេះ ត្រូវបន្តជាប់ឃុំតាមច្បាប់កំណត់ផងដែរ។
ដោយឡែក កាលពីឆ្នាំ២០១០ តុលាការសហរដ្ឋអាមេរិកបានកាត់ទោសប្រធានចលនាកងទ័ពសេរីជាតិកម្ពុជា លោក ឈុន យ៉ាសិទ្ធិ ឱ្យជាប់គុកអស់មួយជីវិត ក្រោមបទចោទប្រកាន់ថាបានចូលរួមដឹកនាំចលនាមួយនេះក្នុងគោលបំណងផ្ដួលរំលំរដ្ឋាភិបាលកម្ពុជាតែមិនបានសម្រេច កាលពីឆ្នាំ២០០០នោះ៕