ក្រសួងអប់រំ យុវជន និងកីឡា បានសម្រេចបើកដំណើរការឡើងវិញគ្រឹះស្ថានមតេ្តយ្យសិក្សា និងសេវាថែទាំកុមារ សម្រាប់កុមារមានអាយុចាប់ពី៥ឆ្នាំឡើង នៅគ្រឹះស្ថានសិក្សាសាធារណៈ និងឯកជន។
សេចក្តីជូនដំណឹងរបស់ក្រសួងនៅថ្ងៃនេះ បានលើកឡើងថា បន្ទាប់ពីគ្រឹះស្ថានបឋមសិក្សា មធ្យមសិក្សា និងឧត្តមសិក្សាទាំងរដ្ឋ និងឯកជនភាគច្រើន បើកដំណើរការ ឡើងវិញដោយរលូន និងពុំមានហេតុការណ៍អ្វីកើតឡើងគួរឱ្យសម្គាល់ ពាក់ព័ន្ធនឹងបញ្ហាសុខភាពរបស់បុគ្គលិក និងសិស្សានុសិស្សនោះ ក្រសួងសម្រេចអនុញ្ញាតឱ្យគ្រឹះស្ថានមត្តេយ្យសិក្សា និងសេវាថែទាំកុមារនៅគ្រឹះស្ថានសិក្សាសាធារណៈ និងឯកជន អាចដំណើរការឡើងវិញបានចាប់ពីថ្ងៃទី០១ ខែធ្នូ ឆ្នាំ២០២១ នេះតទៅ។
កាលពីថ្ងៃទី០១ ខែវិច្ឆិកា ឆ្នាំ២០២១ ក្រសួងអប់រំ បានពង្រីកវិសាលភាពនៃការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាសាធារណៈនិងឯកជននៅគ្រប់កម្រិត ក្នុងភូមិសាស្ត្រទូទាំងរាជធានី-ខេត្តទាំងអស់។
បើតាមក្រសួងអប់រំ ការសម្រេចឈានទៅបើកសាលារៀនឡើងវិញនេះ បន្ទាប់ពីក្រសួងបានវាយតម្លៃទៅលើដំណើរការបង្រៀននិងរៀនតាមបណ្ដុំសម្រាប់គ្រឹះស្ថានសិក្សាសាធារណៈនិងឯកជននាពេលកន្លងមក ដោយមិនមានបញ្ហាឆ្លងរាលដាលជំងឺកូវីដ-១៩ធ្ងន់ធ្ងរនោះទេ ខណៈមាតាបិតា អាណាព្យាបាល គ្រូបង្រៀន និងសិស្សានុសិស្ស-និស្សិត ក៏បានទទួលវ៉ាក់សាំងការពារជំងឺកូវីដ-១៩ ក្នុងអត្រាខ្ពស់ផងដែរ៕
