អាមេរិក កាលពីថ្ងៃពុធម្សិលមិញ បានរាយការណ៍ពីការរកឃើញករណីឆ្លងដំបូងនៃមេរោគកូវីដបំប្លែងខ្លួនថ្មី «អូមីក្រុង» នៅក្នុងប្រទេស ដែលករណីនេះបានបង្កជាការព្រួយបារម្ភដល់ពិភពលោក ដែលថាវីរុសបំប្លែងថ្មីនេះអាចនឹងធ្វើឱ្យចំនួននៃការឆ្លងកើនឡើងខ្ពស់។ នេះបើតាមការផ្សព្វផ្សាយដោយទីភ្នាក់ងារសារព័ត៌មាន Reuters។
ករណីឆ្លងដំបូងគេបង្អស់នៅក្នុងសហរដ្ឋអាមេរិកនេះ ត្រូវបានរកឃើញលើអ្នកដែលចាក់វ៉ាក់សាំងពេញលេញមួយរូប ក្នុងរដ្ឋកាលីហ្វ័រញ៉ា ដែលបានធ្វើដំណើរពីប្រទេសអាហ្វ្រិកខាងត្បូង វិលត្រលប់មកកាន់អាមេរិកវិញ នៅថ្ងៃទី២២ ខែវិច្ឆិកា ហើយបានរកឃើញវិជ្ជមានវីរុសនេះក្នុងរយៈពេល៧ថ្ងៃបន្ទាប់។
ទាក់ទិននឹងករណីនេះ ប្រធានាធិបតីសហរដ្ឋអាមេរិក លោក ចូ បៃឌិន ក៏កំពុងតែរៀបចំយុទ្ធសាស្ត្ររបស់ខ្លួនសម្រាប់ការប្រយុទ្ធប្រឆាំងនឹងជំងឺរាតត្បាតក្នុងរដូវរងានេះ ដែលក្នុងនោះមានទាំងការកំណត់សម្រាប់អ្នកធ្វើដំណើរឱ្យពាក់ម៉ាស់រហូតដល់ពាក់កណ្ដាលខែមីនាផងដែរ។
ជាមួយគ្នានេះ សេតវិមានក៏គ្រោងនឹងប្រកាសវិធានធ្វើតេស្តតឹងរ៉ឹងសម្រាប់ភ្ញៀវអន្តរជាតិផងដែរ ខណៈដែលការប្រកាសជាផ្លូវការត្រូវបានរំពឹងថានឹងធ្វើឡើងនៅថ្ងៃព្រហស្បតិ៍នេះ។
យោងតាមលិខិតមួយរបស់មជ្ឈមណ្ឌលបង្ការ និងកម្ចាត់ជំងឺឆ្លង (CDC) របស់សហរដ្ឋអាមេរិក បានឱ្យដឹងថា ក្រុមហ៊ុនអាកាសចរណ៍នានានៅសហរដ្ឋអាមេរិក ក៏ត្រូវបានជូនដំណឹងឱ្យប្រគល់ឈ្មោះអ្នកដំណើរដែលមកដល់ពីតំបន់មួយចំនួននៃទ្វីបអាហ្រ្វិកភាគខាងត្បូងដែលមានករណីវីរុសបំប្លែងខ្លួនថ្មី «អូមីក្រុង» ផងដែរ។
គួរបញ្ជាក់ថា មេរោគកូវីដបំប្លែងខ្លួនថ្មី «អូមីក្រុង» ដែលត្រូវបានរកឃើញដំបូងនៅថ្ងៃទី៨ ខែវិច្ឆិកា នៅក្នុងប្រទេសអាហ្រ្វិកខាងត្បូង បានរីករាលដាលដល់ប្រទេសជាង២០ហើយ គិតរហូតមកដល់ពេលនេះ។ ទោះជាយ៉ាងណា វីរុសបំប្លែងខ្លួនថ្មីនេះពុំទាន់បង្កឱ្យមានជាករណីស្លាប់ណាមួយនោះទេ៕
