អ្នកភូមិប្រមាណ២០០នាក់ តំណាងឱ្យជាង៤០០គ្រួសារ នៅឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល បានប្រមូលផ្ដុំគ្នាតវ៉ាមុខសាលាឃុំ នៅព្រឹកថ្ងៃសុក្រនេះ ដើម្បីជំរុញទៅអាជ្ញាធរនិងក្រុមហ៊ុនផ្ដល់សំណងផលប៉ះពាល់ដីធ្លីដោយគម្រោងអភិវឌ្ឍន៍ព្រលានយន្តហោះថ្មីរបស់ក្រុមហ៊ុន OCIC។
លោក ភោគ ផាន់នី ដែលអះអាងថាជាតំណាងពលរដ្ឋ ប្រាប់ វីអូឌី នៅកន្លែងតវ៉ាថា ដីទំហំ៨៣ហិកតា ជាដីក្រុមសាមគ្គីរបស់ប្រជាពលរដ្ឋ៤១៤គ្រួសារ នៅឃុំអំពៅព្រៃ ដែលអាជ្ញាធរចែកឱ្យពលរដ្ឋអាស្រ័យផលជាក្រុមៗតាំងពីឆ្នាំ១៩៨៤។ តែនៅឆ្នាំ២០០៨ លោកថា ក្រុមហ៊ុនអភិវឌ្ឍន៍ព្រលានយន្តហោះថ្មី បានមកអភិវឌ្ឍនៅតំបន់នោះ ធ្វើឱ្យប៉ះពាល់ដល់ដីរបស់ពួកគេ និងមិនអាចឱ្យពួកគាត់អាស្រ័យផលបានតទៅទៀត ដោយសារក្រុមហ៊ុនបានកាយប្រឡាយបិទប្រព័ន្ធទឹក ខណៈដីមួយផ្នែកទៀត ក្រុមហ៊ុនឈូសឆាយអភិវឌ្ឍទៅហើយ។
ករណីនេះ លោកបានទាមទារឱ្យអាជ្ញាធរនិងក្រុមហ៊ុនដោះស្រាយជូនពលរដ្ឋ ក្នុងនោះសំណងដែលពលរដ្ឋចង់បាន គឺសុំគិតជាគោលនយោបាយ ដោយក្នុង១ម៉ែត្រការ៉េ ៨ដុល្លារ។
លោក ភោគ ផាន់នី បន្ថែមថា៖ «ដីនេះជាប្រភេទដីដែលរដ្ឋបាលឃុំអំពៅព្រៃបានបែងចែកជូនពលរដ្ឋតាំងពីឆ្នាំ១៩៨៤ ដែលពេលនោះ ក្នុងនាមជាប្រមុខថ្នាក់ដឹកនាំបានចេញសារាចរ០០៣ បានបែងចែកដីពីក្រុមសាមគ្គីធំមកដីក្រុមសាមគ្គីតូចៗ ដែលពលរដ្ឋទទួលបានពីអាជ្ញាធរមូលដ្ឋាន។ អ៊ីចឹងពួកខ្ញុំមកតវ៉ានេះ សុំទាមទារសំណងត្រឹមតែ៨ដុល្លារក្នុង១ម៉ែត្រការ៉េ ដោយមិនជំទាស់នឹងការអភិវឌ្ឍទេ ព្រោះនេះជាដីរបស់យើង»។
ពលរដ្ឋម្នាក់ទៀត អ្នកស្រី មាន លាភ មានប្រសាសន៍ថា ក្រុមរបស់គាត់មាន១៨គ្រួសារ និងមានដីទំហំ៣២ហិកតា ដោយពួកគាត់បានបង្កបង្កើនផលធ្វើស្រែប្រាំងរហូតមក ប៉ុន្តែបានខកខានធ្វើរយៈពេល៥ឆ្នាំហើយ ក្រោយពីក្រុមហ៊ុនអភិវឌ្ឍន៍ព្រលានយន្តហោះថ្មីមកធ្វើការអភិវឌ្ឍ។ អ្នកស្រីថា ការដែលបាត់បង់កន្លែងអាស្រ័យផលនេះ បានធ្វើឱ្យប៉ះពាល់ដល់ជីវភាពគ្រួសាររបស់ពួកគាត់ផងដែរ។
អ្នកស្រីបន្ថែមថា៖ «តាំងពីគេកាយបិទទំនប់ជប៉ុនហ្នឹងមក គឺពួកខ្ញុំអត់មានទឹកបង្កបង្កើនផលទៀតទេ រយៈពេលជាង១០ឆ្នាំហើយ អ៊ីចឹងវាអយុត្តិធម៌ណាស់។ ហើយពួកខ្ញុំវេទនាផ្នែកជីវភាពណាស់ បានព្រឹកខ្វះល្ងាច ណាមួយកូវីដផង អត់បានចេញទៅរកអីទៀត។ អ៊ីចឹងមានតែសំណូមពរដល់សម្ដេចពុក សម្ដេចម៉ែជួយកូនចៅផង»។
អំឡុងពេលដែលពលរដ្ឋនាំគ្នាប្រមូលផ្ដុំតវ៉ានៅព្រឹកមិញនេះ ពុំមានអាជ្ញាធរឃុំចេញមកជួបពលរដ្ឋនោះទេ និងក្រោយប្រមូលផ្ដុំតវ៉ាជាច្រើនម៉ោងរួចមក ក្រុមពលរដ្ឋបាននាំគ្នាត្រលប់ទៅផ្ទះវិញ ហើយថានឹងទៅតវ៉ាម្ដងទៀតនៅថ្ងៃចន្ទសប្ដាហ៍ក្រោយនេះ។
វីអូឌី មិនអាចសុំការឆ្លើយតបពីមេឃុំអំពៅព្រៃ លោក នប់ ណាន់ បានទេ ពាក់ព័ន្ធនឹងករណីនេះ។
អភិបាលស្រុកកណ្ដាលស្ទឹង លោក អ៊ូច សាវឿន មានប្រសាសន៍ថា នៅក្នុងឃុំអំពៅព្រៃ គ្មានដីសហគមន៍ ឬដីចំណែកក្រុមសាមគ្គីទៀតទេ។ លោកថា ដីក្រុមសាមគ្គីនោះ ត្រូវអាជ្ញាធរវាស់ចែកជូនជាឯកជនអស់ហើយតាំងពីឆ្នាំ១៩៩០។
លោកចាត់ទុកការតវ៉ារបស់ពលរដ្ឋនៅពេលនេះថាជាសិទ្ធិរបស់ពួកគាត់ ហើយអាជ្ញាធរក៏ពុំមានការដោះស្រាយសំណងអ្វីជូនពួកគាត់ទៀតឡើយ។
លោកបន្ថែមថា៖ «ពួកគាត់តវ៉ាជារឿងរបស់ពួកគាត់តវ៉ា តែតាមផ្លូវច្បាប់ គេបានរំលាយក្រុមសាមគ្គីចោលធ្វើជារបស់កម្មសិទ្ធិឯកជនអស់តាំងពីឆ្នាំ៩០។ អ៊ីចឹងទាល់តែគាត់ឈប់ទទួលស្គាល់ដីគាត់ដែលរស់នៅរាល់ថ្ងៃហ្នឹងជាដីឯកជន។ គេធ្វើការលក់ទិញ គេធ្វើការបែកចែកគ្នាអស់ហើយ មានក្រុមសាមគ្គីមកពីណាទៀត»។
វីអូឌី មិនអាចសុំការឆ្លើយតបពីម្ចាស់ក្រុមហ៊ុន OCIC ដែលអភិវឌ្ឍព្រលានយន្តហោះថ្មីនៅតំបន់នោះ បានទេ ជុំវិញរឿងនេះ។
ពាក់ព័ន្ធនឹងករណីនេះ មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សុផាត ធ្លាប់ជំរុញទៅរដ្ឋាភិបាលស្រាវជ្រាវនិងដោះស្រាយសំណងផលប៉ះពាល់ជូនពលរដ្ឋឱ្យមានតម្លាភាពនិងសមរម្យដែលអាចទទួលយកបាន។ លោកថា ប្រសិនបើដោះស្រាយមិនត្រឹមត្រូវទេ នឹងនាំឱ្យប្រជាពលរដ្ឋមិនពេញចិត្តចំពោះគម្រោងអភិវឌ្ឍន៍នោះ ហើយពួកគេនឹងធ្វើការតវ៉ាផ្សេងៗ។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ បានធ្វើឱ្យប៉ះពាល់ប្រជាពលរដ្ឋ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង១លានម៉ែត្រការ៉េ៕