រដ្ឋាភិបាលកម្ពុជាបានប្រកាសយកថ្ងៃទី០៨ ខែធ្នូ ឆ្នាំ២០២១ ជាថ្ងៃកាន់ព្រះមរណទុក្ខផ្លូវការនៅទូទាំងប្រទេស ដើម្បីជាកិច្ចថ្វាយតបនូវព្រះគុណូបក្ការៈដ៏ធំធេង នៃសម្តេចក្រុមព្រះ នរោត្តម រណឫទ្ធិ។
យោងតាមសារាចរណ៍ណែនាំរបស់រដ្ឋាភិបាលចេញផ្សាយកាលពីថ្ងៃទី៣ ខែធ្នូ ឆ្នាំ២០២១ បានបង្គាប់ឱ្យគ្រប់ក្រសួង ស្ថាប័ន សាលារៀន មន្ទីរពេទ្យរបស់រដ្ឋ ឯកជនទាំងអស់ និងមន្ត្រីរាជការ កងកម្លាំងប្រដាប់អាវុធគ្រប់ប្រភេទ គ្រប់ទីវត្តអារាម ព្រមទាំងប្រជាជនទូទាំងប្រទេស ត្រូវបង្ហូតទង់ជាតិត្រឹមពាក់កណ្តាលដង នៅថ្ងៃទី៨ ខែធ្នូ ឆ្នាំ២០២១។ បន្ថែមលើនេះ គ្រប់ស្ថានីយ៍វិទ្យុ និងទូរទស្សន៍ជាតិ និងឯកជនទាំងអស់ ត្រូវផ្អាកការសម្តែង និងចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេង នៅថ្ងៃទី៨ ខែធ្នូ ឆ្នាំ២០២១។
រដ្ឋាភិបាលកម្ពុជា បានចាត់ទុកថា សម្តេចក្រុមព្រះ នរោត្តម រណឫទ្ធិ ប្រធានក្រុម ឧត្តមប្រឹក្សាផ្ទាល់ ព្រះមហាក្សត្រ ជាអតីតនាយករដ្ឋមន្ត្រីទី១ និងជាអតីតប្រធានរដ្ឋសភាជាតិ មានគុណបំណាច់ដ៏ធំធេងចំពោះ ជាតិ សាសនា និងព្រះមហាក្សត្រ។
សម្ដេចក្រុមព្រះ នរោត្ដម រណឫទ្ធិ បានយាងសោយព្រះទិវង្គតនៅរសៀលថ្ងៃអាទិត្យ ទី២៨ ខែវិច្ឆិកា ឆ្នាំ២០២១ នៅឯប្រទេសបារាំង ក្នុងព្រះជន្មាយុ៧៧ព្រះវស្សា ដោយរោគាពាធ។
តាមគម្រោង ព្រះសពរបស់ព្រះអង្គនឹងយាងដង្ហែពីប្រទេសបារាំងមកដល់ប្រទេសកម្ពុជា នៅវេលាម៉ោង១១ ព្រឹក ថ្ងៃអាទិត្យ ទី៥ ខែធ្នូ ស្អែកនេះ តាមព្រះទីនាំងយន្តហោះពិសេសពីប្រទេសបារាំង។ ព្រះសពរបស់សម្ដេចក្រុមព្រះ នរោត្ដម រណឫទ្ធិ នឹងត្រូវតម្កល់ធ្វើបុណ្យទក្ខិណានុប្បទាន តាមគន្លងព្រះពុទ្ធសាសនា និងប្រពៃណីជាតិ នៅអតីតព្រះដំណាក់ចាស់ ស្ថិតនៅសង្កាត់បឹងរាំង ខណ្ឌដូនពេញ រាជធានីភ្នំពេញ៕
