លោកនាយករដ្ឋមន្ត្រី ហ៊ុន សែន ព្រមានថា បើមានអ្នកលួចធ្វើឃាតរូបលោក អាចនឹងផ្ទុះសង្គ្រាមនៅក្នុងប្រទេសកម្ពុជា ដោយលោកថា កន្លងមក មានមុខសញ្ញាអ្នកប៉ុនប៉ងធ្វើឃាតរូបលោកជាច្រើនដង តែបរាជ័យ។
ក្នុងពិធីសម្ពោធដាក់ឱ្យប្រើប្រាស់ផ្លូវជាតិលេខ១១ និងផ្លូវក្នុងក្រុងព្រៃវែង លោកនាយករដ្ឋមន្ត្រី ហ៊ុន សែន បានថ្លែងថា រូបលោកនឹងបន្តកាន់អំណាចដឹកនាំប្រទេសកម្ពុជាយ៉ាងយូរចន្លោះពី៨ទៅ១០ឆ្នាំតទៅមុខទៀត។ ប៉ុន្តែលោកថា តាមគម្រោង លោកបានត្រៀមរៀបចំកូនប្រុសច្បង លោក ហ៊ុន ម៉ាណែត ដើម្បីឈរឈ្មោះជាបេក្ខភាពនាយករដ្ឋមន្ត្រី ក្រោយពីលោកឈប់ធ្វើនាយករដ្ឋមន្ត្រី។
អ្វីដែលគួរឱ្យកត់សម្គាល់ លោកបញ្ជាក់ថា បើអំឡុងពេលដែលលោកជានាយករដ្ឋមន្ត្រីដឹកនាំប្រទេស ហើយត្រូវស្លាប់មុនអាណត្តិនោះ មន្ត្រីដែលនៅក្នុងបក្សត្រូវបន្តវេនដោយស្វ័យប្រវត្តិ។ ប៉ុន្តែបើមានអ្នកលួចធ្វើឃាតរូបលោក នោះសង្គ្រាមនៅកម្ពុជាអាចនឹងកើតមានឡើងផងដែរ។
លោកថ្លែងដូច្នេះថា៖ «បានបញ្ជាក់ហើយ ស្លាប់ដោយសារជំងឺ មេដឹកនាំ [ចាស់ៗក្នុងបក្ស] នាំគ្នាធ្វើទៅ ! ប៉ុន្តែបើស្លាប់ដោយការធ្វើឃាត សភាពការណ៍នឹងប្រែប្រួល អាចថាផ្ទុះសង្គ្រាមក៏ថាបាន! ធម្មតា មុខសញ្ញា យើងឃើញហើយ អ្នកនៅខាងក្នុង អ្នកណានៅខាងក្រៅ គេលែងហើយ»។
លោកថ្លែងបន្តថា៖ «ព្រោះរឿងនៅសៀមរាប [លួចធ្វើឃាតលោក] មិនមែនខ្ញុំមិនដឹងទេ ប៉ុន្តែខ្ញុំមិនធ្វើ ទុកឱ្យភ្ញាក់រឭក កុំលេងល្បែងខូច។ ហើយខ្ញុំត្រូវគេលួចធ្វើឃាតច្រើនដងហើយ តែវាមិនងាប់! វាបាញ់ខុស! បាញ់ខ្ញុំនៅម្ដុំព្រះនរាយណ៍ បាញ់ខ្ញុំនៅតាកែវ ខ្ញុំយកបានទាំងកាំភ្លើងទៀត។ ហើយបោកគ្រាប់បែកចូលផ្ទះខ្ញុំឆ្នាំ១៩៩៨ បោកគ្រាប់បែក៣គ្រាប់ចូលផ្ទះខ្ញុំ ប៊ិះស្លាប់ឪពុកខ្ញុំទៀត។ សម្លាប់ខ្ញុំនៅនេះមិនបាន ទៅបាញ់ខ្ញុំនៅសៀមរាប។ កុំថា ហ៊ុន សែន មិនដឹង ប៉ុន្តែគ្រាន់តែថាទុកវាមួយដុំចោលទៅ យើងក៏អត់ងាប់ដែរ»។
នាយកប្រតិបត្តិការអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មិនជឿថា បច្ចុប្បន្នមានអ្នកប៉ុនប៉ងចង់ធ្វើឃាតនាយករដ្ឋមន្ត្រីនោះទេ។
លោកមានប្រសាសន៍ថា៖ «ខ្ញុំមិនជឿថាមានអ្នកប៉ុនប៉ងឬក៏ធ្វើឃាតលោកនាយករដ្ឋមន្ត្រី ហ៊ុន សែន សារជាថ្មី ដូចសម័យឆ្នាំជាង៩០នោះដែរ ពីព្រោះសម័យនោះ វាមានភាគីច្រើន ហើយអាវុធក៏វាមាននៅពេញដៃ វាពិបាកក្នុងការបែកចែកថា អ្នកណាជាមិត្ត អ្នកណាជាសត្រូវពិតប្រាកដ។ ប៉ុន្តែក្នុងសម័យកាលបច្ចុប្បន្ននេះ ខ្ញុំនៅតែមានសុទិដ្ឋិនិយមថា នឹងមិនមានការធ្វើឃាតកើតមានឡើងលើលោកនាយករដ្ឋមន្ត្រី ឬក៏ថ្នាក់ដឹកនាំជាន់ខ្ពស់រាជរដ្ឋាភិបាលណាម្នាក់នោះទេ»។
គិតមកដល់ពេលបច្ចុប្បន្ន លោកនាយករដ្ឋមន្ត្រី ហ៊ុន សែន បានកាន់កាប់តំណែងជានាយករដ្ឋមន្ត្រីរយៈពេលជិត៤០ឆ្នាំមកហើយ ដោយលោកអះអាងថា នៅក្នុងតំណែងកំពូលមួយនេះមានអ្នកប៉ុងប៉ងធ្វើឃាតលោកជាច្រើនដងមកហើយ តែត្រូវបានបរាជ័យ។ លោក ហ៊ុន សែន ធ្លាប់បញ្ជាក់ខ្លួនឯងថា លោកជាមេដឹកនាំវ័យក្មេងជាងគេបំផុតក្នុងលោក ដែលទទួលបានតំណែងជានាយករដ្ឋមន្ត្រី និងកាន់តំណែងមួយនេះបានយូរជាងគេផងដែរនៅក្នុងពិភពលោក ខណៈលោកនៅតែប្ដេជ្ញាកាន់តំណែងមួយនេះបន្តទៀត៕
