ពលរដ្ឋរាប់រយនាក់មកពី៧សហគមន៍ក្នុងស្រុកចំនួន២នៃខេត្តកោះកុង បានប្រមូលផ្ដុំគ្នានៅមុខសាលាដំបូងខេត្តកោះកុង នៅព្រឹកថ្ងៃពុធនេះ ខណៈតុលាការកោះហៅតំណាងពលរដ្ឋ២នាក់ឱ្យចូលបំភ្លឺ។
កាលពីថ្ងៃទី៥ ខែវិច្ឆិកា ឆ្នាំ២០២១ តំណាងពលរដ្ឋ២នាក់ រួមមាន អ្នកស្រី ផាវ ញ៉ើង និងអ្នកស្រី សេង លីន ត្រូវបានតំណាងអយ្យការអមសាលាដំបូងខេត្តកោះកុង លោក វ៉ៃ ភិរម្យ កោះហៅឱ្យចូលសវនាការ ដើម្បីឆ្លើយដោះសារពីការចោទប្រកាន់ក្រោមបទចោទ «ញុះញង់ឱ្យប្រព្រឹត្តអំពើបង្កឱ្យមានភាពវឹកវរដល់សន្តិសុខសង្គម និងបរិហារកេរ្តិ៍ជាសាធារណៈ» នៅរសៀលថ្ងៃទី៨ ខែធ្នូនេះ ទៅតាមបណ្ដឹងរបស់អ្នកស្រី ឆាយ វី ដែលជាអតីតតំណាងពលរដ្ឋដូចគ្នា។
អ្នកស្រី ដេត ហួរ ដែលអះអាងថាជាតំណាងពលរដ្ឋ១៩៧គ្រួសារ និងចូលរួមការប្រមូលផ្ដុំដែរនោះ បានប្រាប់ វីអូឌី ថាប្រជាពលរដ្ឋជាង៦០០នាក់មកពីសហគមន៍ចំនួន៧ ស្ថិតក្នុងស្រុកស្រែអំបិល និងស្រុកបទុមសាគរ ខេត្តកោះកុង បានប្រមូលផ្ដុំគ្នានៅមុខសាលាដំបូងខេត្តកោះកុង នៅថ្ងៃនេះ ដើម្បីគាំទ្រតំណាងពលរដ្ឋទាំង២នាក់នោះ។
អ្នកស្រីបន្តថា តំណាងពលរដ្ឋទាំង២នាក់ពុំបានធ្វើអ្វីខុសនោះទេ ប៉ុន្តែត្រូវបានតុលាការចោទប្រកាន់យ៉ាងអយុត្តិធម៌ទៅវិញ។
អ្នកស្រីបន្ថែមថា៖ «យើង! ពួកយើងបានដឹងយ៉ាងច្បាស់ថា ពួកគាត់ទាំង២នាក់មិនបានធ្វើខុសទេ អ៊ីចឹងហើយពួកយើងមកឃ្លាំមើលពួកគាត់ ថាតើតុលាការសាលាដំបូងខេត្តកោះកុងនេះ គាត់កាត់ក្ដីដោយយុត្តិធម៌ទេ កាត់ក្ដីលម្អៀងដែរទេ! អ៊ីចឹងពួកខ្ញុំត្រូវមកគាំទ្រគាត់»។
បើតាមអ្នកស្រី ដេត ហួរ ខណៈពេលដែលប្រជាពលរដ្ឋប្រមូលផ្ដុំគ្នាតវ៉ានេះ ខាងសមត្ថកិច្ចក៏បានរាយកម្លាំងប្រហែល១០០នាក់នៅចាំឃ្លាំមើល និងហាមពលរដ្ឋឈរប្រមូលផ្ដុំក្បែររបងតុលាការថែមទៀត។
អតីតតំណាងពលរដ្ឋ អ្នកស្រី ឆាយ វី ធ្លាប់ប្រាប់ វីអូឌី ថាអ្នកស្រីប្ដឹងតំណាងពលរដ្ឋទាំង២នាក់នោះ ទៅតុលាការ ដោយសារពួកគេបានចោទអ្នកស្រីថា គប់គិតគ្នាលួចលក់ដីសហគមន៍ទៅឱ្យឧកញ៉ានៅខេត្តកោះកុង ទាំងដែលអ្នកស្រីមិនបានធ្វើដូចការចោទប្រកាន់។ អ្នកស្រីបន្តថា ការចោទប្រកាន់របស់តំណាងពលរដ្ឋទាំង២នាក់នោះបានធ្វើឱ្យប៉ះពាល់ដល់កិត្តិយសរបស់អ្នកស្រី ហើយអ្នកស្រីក៏សុំឱ្យតំណាងពលរដ្ឋ២នាក់នោះបង្ហាញភស្តុតាងផងដែរ។
ប៉ុន្តែពលរដ្ឋម្នាក់ កញ្ញា ប៊ុន លាង មកពីសហគមន៍១៧៥គ្រួសារ នៅឃុំជីខលើ ស្រុកស្រែអំបិល និយាយថា អ្នកស្រី ឆាយ វី ដែលជាដើមបណ្ដឹង បានគប់គិតគ្នាលួចលក់ដីរដ្ឋដែលនៅសេសសល់ពីការចែកជូនពលរដ្ឋទៅឱ្យឧកញ៉ាពិតមែន។
កញ្ញាបន្ថែមថា៖ «យើងគាំទ្រពួកគាត់ [អ្នកផាវ ញ៉ើង និងអ្នកស្រី សេង លីន] ដោយសារពួកគាត់ជាមនុស្សស្អាតស្អំ។ ផ្ទុយទៅវិញ អ្នកដែលប្ដឹងពួកគាត់នេះ គឺគេបានលួចលក់ដីជាច្រើនហិកតា ប៉ុន្តែមិនត្រូវបានតុលាការចាត់វិធានការនោះទេ»។
ពាក់ព័ន្ធសំណុំរឿងនេះ មន្ត្រីអង្គស៊ីវិលប្រចាំខេត្តកោះកុង ជំរុញដល់តុលាការឱ្យចុះស៊ើបអង្កេតស្រាវជ្រាវ និងធ្វើការដោយឈរលើគោលការណ៍ឯករាជ្យ តម្លាភាព ដើម្បីផ្ដល់យុត្តិធម៌ដល់ភាគីទាំងសងខាង។
កាលពីថ្ងៃទី២៥ ខែវិច្ឆិកា ឆ្នាំ២០១៩ ក្រុមពលរដ្ឋ១៧៥គ្រួសារ នៅឃុំជីខលើ ស្រុកស្រែអំបិល ខេត្តកោះកុង បានប្ដឹងទៅរដ្ឋមន្ត្រីក្រសួងមហាផ្ទៃ លោក ស ខេង ដោយចោទប្រកាន់អ្នកស្រី ឆាយ វី អតីតតំណាងពួកគេថាបាន «ញុះញង់ឱ្យប្រជាពលរដ្ឋលក់ដីសេសសល់បម្រុងទុករបស់សហគមន៍ទៅឱ្យឧកញ៉ានៅខេត្តកោះកុង» ប៉ុន្តែត្រូវបានអ្នកស្រី ឆាយ វី ច្រានចោល និងប្ដឹងបកទៅតុលាការវិញ៕
