មន្ត្រីរបបយោធាមីយ៉ាន់ម៉ាជាន់ខ្ពស់មួយរូប បានឱ្យដឹងកាលពីថ្ងៃអង្គារម្សិលមិញថា ការជាប់ពន្ធនាគាររបស់អតីតមេដឹកនាំដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី បានបង្ហាញឱ្យឃើញថា គ្មាននរណាម្នាក់អាចគេចចេញពីសំណាញ់ច្បាប់ឡើយ។ នេះបើតាមការផ្សព្វផ្សាយដោយទីភ្នាក់ងារសារព័ត៌មាន Reuters។
ម្ចាស់ពានរង្វាន់ណូបែលសន្តិភាពរូបនេះ បច្ចុប្បន្នរងការចោទប្រកាន់មួយចំនួន រួមមាន ការនាំចូលអាយកូមដោយខុសច្បាប់ បទរំលោភវិធានការទប់ស្កាត់វិបត្តិកូវីដ-១៩ បទទទួលសំណូក រំលោភការសម្ងាត់រដ្ឋ បទចោទទាក់ទងនឹងការក្លែងបន្លំការបោះឆ្នោត និងបទចោទធ្ងន់ធ្ងរមួយចំនួនទៀត។
ទោះជាយ៉ាងណា បទចោទទាំងអស់នេះត្រូវបានច្រានចោលដោយលោកស្រី។
ទាក់ទិននឹងករណីនេះ រដ្ឋមន្ត្រីក្រសួងព័ត៌មានរបស់របបយោធាមីយ៉ាន់ម៉ា លោក Maung Maung Ohn បានថ្លែងឱ្យដឹងកាលពីថ្ងៃអង្គារថា៖ «គ្មាននរណាម្នាក់អាចរួចផុតពីសំណាញ់ច្បាប់នោះទេ»។
មន្រ្តីជាន់ខ្ពស់រូបនេះក៏បានបន្ថែមដែរថា ប្រព័ន្ធតុលាការរបស់មីយ៉ាន់ម៉ា គឺមិនមានភាពលម្អៀងនោះទេ។
គួរបញ្ជាក់ថា មីយ៉ាន់ម៉ា បច្ចុប្បន្នកំពុងត្រៀមរៀបចំដំណើរការសម្រាប់ការបោះឆ្នោតដែលនឹងប្រព្រឹត្តទៅនៅមុនខែសីហា ឆ្នាំ២០២៣ ប៉ុន្តែមិនមានការបញ្ជាក់ណាមួយថាតើ «គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD)» របស់លោកស្រី អ៊ុងសាន ស៊ូជី នឹងត្រូវបានអនុញ្ញាតឱ្យចូលរួមប្រកួតប្រជែងដែរឬយ៉ាងណានោះទេ។
ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រង កាលពីថ្ងៃទី១ ខែកុម្ភៈ និងបានផ្ដួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលជាង១ ០០០នាក់ក៏ត្រូវបានសម្លាប់ក្នុងការបង្ក្រាបកូដកម្មនិងបាតុកម្មនានាផងដែរ៕
