ពន្ធនាគារខេត្តស្ទឹងត្រែង បានចេញលិខិតបដិសេធមួយ ក្រោយមានការផ្សព្វផ្សាយថាមានករណីផ្ទុះជំងឺកូវីដ-១៩លើពិរុទ្ធជននៅក្នុងពន្ធនាគារខេត្តនេះ រួមទាំងមន្រ្តីអនុរក្សពន្ធនាគារ ប្រមាណជាង៣០០នាក់។
តាមរយៈលិខិតបដិសេធនេះ ពន្ធនាគារខេត្តស្ទឹងត្រែង បានអះអាងថា ការចុះផ្សាយរបស់បណ្ដាញព័ត៌មានមួយចំនួនមិនអាចយកជាផ្លូវការនៅឡើយទេ ដោយសារមិនទាន់មានតួរលេខដែលចេញពីការធ្វើតេស្តម៉ាស៊ីនធំ (PCR)។ លិខិតនេះបានចាត់ទុកការផ្សព្វផ្សាយព័ត៌មានទាំងនោះ ថាមានចេតនាធ្វើឱ្យប៉ះពាល់ដល់ការគ្រប់គ្រងសន្ដិសុខ សុវត្ថិភាព និងសណ្ដាប់ធ្នាប់នៅក្នុងពន្ធនាគារខេត្ត។
ប្រភពដដែលលើកឡើងថា៖ «ពន្ធនាគារសូមអះអាងថា រាល់ខ្លឹមសារខាងលើនេះ គ្មានមូលដ្ឋានពីតួលេខនិងទិន្នន័យច្បាស់លាស់ ដោយការធ្វើតេស្ដ [Rapid Test] មិនទាន់យកជាផ្លូវការនៅឡើយទេ លុះត្រាធ្វើតេស្តឆ្លងកាត់ម៉ាស៊ីនធំហៅថា PCR»។
ប្រភពដដែលបានគូសបញ្ជាក់ថា មន្រ្តីពន្ធនាគារទាំងអស់បានចាក់វ៉ាក់សាំងចំនួន៣ដូស និងជនជាប់ចោទបានចាក់វ៉ាក់សាំងប្រភេទ Johnson &Johnson។
គួររម្លឹកផងដែរថា ការបែកធ្លាយព័ត៌មានផ្ទុះកូវីដ-១៩លើពិរុទ្ធជននៅក្នុងពន្ធនាគារខេត្តស្ទឹងត្រែង រួមទាំងមន្រ្តីអនុរក្សពន្ធនាគារប្រមាណជាង៣០០នាក់នេះ បានកើតឡើងបន្ទាប់ពីអ្នកទោសក្នុងពន្ធនាគារមានអាការសង្ស័យឆ្លងជំងឺកូវីដ-១៩ ស្របពេលដែលក្រុមគ្រូពេទ្យបានចុះទៅពិនិត្យដល់ពន្ធនាគារ៕