ជនជាតិដើមភាគតិច ៨ គ្រួសារ រស់នៅឃុំសែនមនោរម្យ ស្រុកអូររាំង ខេត្តមណ្ឌលគិរី បានចោទអភិបាលស្រុកនេះថា បានគប់គិតគ្នាជាមួយឧកញ៉ាម្នាក់លួចធ្វើប្លង់កម្មសិទ្ធិលើដីចំនួន ៤ ហិកតា ដែលពួកគេបាននឹងកំពុងអាស្រ័យផលតាំងពីឆ្នាំ១៩៩៧ រហូតមកដល់បច្ចុប្បន្ន។
ជនជាតិដើមភាគតិចពូនងរស់នៅភូមិពូទ្រូ ឃុំសែនមនោរម្យ អ្នកស្រី ម្លូស ប៉ែម បានប្រាប់វីអូឌីនៅថ្ងៃសៅរិ៍នេះថា កាលពីឆ្នាំ២០១៩ អភិបាលស្រុកអូររាំង លោក សៀក មុន្នី និងឧកញ៉ា ស្រី ចន្ធូ បានធ្វើរបងព័ទ្ធជុំវិញដីទំហំ ៤០ ហិកតា បើទោះបីដឹងថា ដីនេះ ពួកគាត់ទាំង ៨ គ្រួសារ បាននឹងកំពុងធ្វើស្រែកចម្ការក៏ដោយ។
អ្នកស្រីបន្តថា ដីដែលអភិបាលស្រុក លោក សៀក មុន្នី កាត់ប្លង់ឱ្យឧកញ៉ា ស្រី ចន្ធូ នោះ ពួកគាត់បានធ្វើស្រែចម្ការរយៈពេលប្រមាណ ២៣ ឆ្នាំ គិតចាប់តាំងពីឆ្នាំ១៩៩៧ រហូតដល់បច្ចុប្បន្ន។
លោកថា៖ «បង ខ្ញុំទៅផ្ទៀងប្លង់នៅកន្លែងសូរិយោដី ព្រោះអីឃើញប្លង់ជាន់ជាមួយស្រីចន្ធូ ជាប់ប្លង់ហ្នឹងហើយ ពួកខ្ញុំមិនសុខចិត្តក៏ទៅសួរអ្នកដឹងច្បាប់ច្បាស់លាស់ឱ្យគាត់មកជួបឧកញ៉ា ស្រីចន្ធូ ដល់ពេលអ៊ីចឹង ឧកញ៉ាស្រី ចន្ធូ ថា ដីហ្នឹង អត់មានពលរដ្ឋណាមួយ [លក់] និងរៀបឯកសារឱ្យទេ មានតែអភិបាលស្រុកលោក សៀក មុន្នី ដែលរៀបឱ្យខ្ញុំ។ អ៊ីចឹង បើពលរដ្ឋមិនសុខចិត្តតវ៉ាជាមួយលោក សៀក មុន្នី ឱ្យដោះស្រាយឱ្យទៅ»។
អ្នកស្រី ម្លូស ប៉ែម បន្តថា កន្លងមក ពួកគាត់បាននាំគ្នាតវ៉ា និងទាមទារឱ្យលោក សៀក មុន្នី ដោះស្រាយជូនពួកគាត់ ក្រោយពីអភិបាលស្រុករូបនេះ បានធ្វើរបងព័ទ្ធជុំវិញដីពួកគាត់ ដោយមិនបានសួរនាំប្រជាពលរដ្ឋដែលកំពុងអាស្រ័យផលនោះ។ ក្រៅពីមិនដោះស្រាយ អ្នកស្រីថា អាជ្ញាធរតែងតែគំរាមពួកគាត់មិនឱ្យធ្វើការតវ៉ា ពាក់ព័ន្ធនឹងរឿងដីនេះទេ។
អ្នកស្រីថា៖ «គាត់អភិបាលស្រុកមិនគួរធ្វើអ៊ីចឹងទេ ព្រោះគាត់ជាម៉ែឪពួកខ្ញុំ ប្រជាពលរដ្ឋមានបញ្ហាអីក៏ដោយ រឿងដីធ្លីក៏ដោយមានតែគាត់ទេ ជាអ្នកដោះស្រាយជូនប្រជាពលរដ្ឋ។ ឥឡូវបែរមានជម្លោះជាមួយប្រជាពលរដ្ឋវិញ។ ពួកខ្ញុំបារម្ភដេកមិនលក់ ខ្លាចបាត់ដី យើងមិនបានលក់ អត់បានដូរ ហើយដីនេះ យើងមិនលួចគេទេ របស់យើងពិតប្រាកដ។ ដីហ្នឹងតាំងពីដូនពីតាមក មិនមែនឥឡូវៗនេះទេ»។
ជនជាតិដើមភាគតិចពូនងម្នាក់ទៀតនិយាយថា ដីព្រៃ និងដីស្រែទាំងនេះ ពួកគាត់មិនបាន លក់ដូរទៅឱ្យបុគ្គលណាម្នាក់ឡើយ។ លោកបន្តថា បើសិនជាដីស្រែនិងដីព្រៃដែលកំពុងអាស្រ័យផលត្រូវបាត់បង់នោះ លោកថា វានឹងធ្វើឱ្យប៉ះពាល់ដល់ការរស់នៅរបស់ពួកគាត់និងកូនចៅជំនាន់ក្រោយ ខណៈជនជាតិដើមភាគតិចបានអាស្រ័យផលនិងកាន់កាប់ជាបន្តបន្ទាប់តាំងពីដូនតាមក។
កាលពីថ្ងៃទី២៣ ខែវិច្ឆិកា ឆ្នាំ២០២១ ជនជាតិដើមភាគតិចទាំង ៨ គ្រួសារបាននាំគ្នាឡើងមកភ្នំពេញ ដើម្បីដាក់ពាក្យស្នើសុំឱ្យក្រសួងរៀបចំដែនដី នគររូបនីយកម្ម និងសំណង់ និងក្រសួងពាក់ព័ន្ធជួយអន្តរាគមន៍ផ្អាកការចេញបណ្ណកម្មសិទ្ធិ និងការសាងសង់សំណង់ផ្សេងៗ លើដីមានទំនាស់ បន្ទាប់ពីបានស្នើសុំអន្តរាគមន៍ពីអាជ្ញាធរពាក់ព័ន្ធនៅក្នុងខេត្តមណ្ឌលគិរីមិនទទួលបានលទ្ធផលនោះ។
វីអូឌីមិនអាចសុំការបំភ្លឺពី ឧកញ៉ា ស្រី ចន្ធូ បានទេនៅថ្ងៃនេះ ខណៈអភិបាលស្រុកអូររាំងលោក សៀក មុន្នី បានចុចផ្ដាច់ទូរសព្ទនៅពេលអ្នកសារព័ត៌មានសួរសំណួរ ពាក់ព័ន្ធនឹងការលើកឡើងរបស់ក្រុមជនជាតិដើមភាគតិចដែលបានចោទប្រកាន់ខាងលើនេះ។
អ្នកប្រឹក្សាយោបល់បណ្ដាញជនជាតិដើមភាគតិចនៅខេត្តមណ្ឌលគិរី លោក គ្រឿង តុលា លើកឡើងថា ទោះបីអាជ្ញាធរស្រុកបានដឹងថា ដីដែលខ្លួនចេញលិខិត និងឯកសារពាក់ព័ន្ធ រួមទាំងប្លង់ទៅឱ្យឧកញ៉ានោះ ជាដីប្រជាពលរដ្ឋដែលអាស្រ័យផលរាប់ឆ្នាំមកហើយក៏ដោយ។ លោកបន្តថា ការធ្វើប្លង់លើដីប្រជាពលរដ្ឋដែលកំពុងអាស្រ័យផល បាននឹងកំពុងកើតឡើងនៅក្នុងខេត្តមណ្ឌលគិរីជាច្រើនករណីហើយ ដោយមកពេលនេះ អាជ្ញាធរមិនទាន់បានដោះស្រាយជូនប្រជាពលរដ្ឋឡើយ។
លោកថា៖ «អាជ្ញាធរមិនមែនគាត់មិនចេះច្បាប់ទេ ប៉ុន្តែគាត់រំលោភច្បាប់មានន័យថា គាត់ដឹងថា ដីហ្នឹងជាដីប្រជាពលរដ្ឋហើយ គាត់នៅតែចេញលិខិត និងចេញប្លង់អីជាដើមហ្នឹង ហើយដីនេះ ក៏ជាដីរបស់រដ្ឋដែរ ប៉ុន្តែគាត់នៅតែធ្វើ។ ចំណុចនេះហើយ អាជ្ញាធរគួរតែទទួលខុសត្រូវ។ ខ្ញុំគិតថា គួរតែដកហូតដីហ្នឹងប្រគល់ជូនប្រជាពលរដ្ឋ ដើម្បីឱ្យគាត់បានធ្វើស្រែចម្ការតាមប្រពៃណីរបស់គាត់វិញ ឱ្យគាត់រស់នៅបានជីវភាពសមរម្យ»។
ក្នុងពិធីប្រកាសចូលកាន់មុខតំណែងរបស់អភិបាលខេត្តមណ្ឌលគិរីថ្មី កាលពីខែតុលា ឆ្នាំ២០២១ រដ្ឋមន្ដ្រីក្រសួងមហាផ្ទៃ លោក ស ខេង បានទទួលស្គាល់ថា ពិតជាមានការប្រើអំណាចរំលោភយកដីរបស់ប្រជាពលរដ្ឋ និងទ្រព្យសម្បត្តិរដ្ឋនៅខេត្តភាគឦសានមួយនេះប្រាកដមែន។ រដ្ឋមន្ត្រីក្រសួងមហាផ្ទៃ បានបង្ហាញការសោកស្ដាយ ចំពោះមន្ដ្រីមួយចំនួនដែលលោកថា បានប្រើអំណាចរបស់ខ្លួនទៅរំលោភយកដីធ្លីប្រជាពលរដ្ឋនិងទ្រព្យសម្បត្តិរបស់រដ្ឋនៅខេត្តមណ្ឌលគិរី មកធ្វើជាកម្មសិទ្ធិផ្ទាល់ខ្លួននេះ ហើយលោកចាត់ទុកករណីនេះថា ជាភាពលោភលន់របស់មន្ត្រីទាំងនោះ៕
