ប្រធានគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន (គ.ប.ម) បញ្ជាក់ជំហរថា ឃុំ-សង្កាត់ ដែលគណបក្សរបស់លោកឈ្នះដឹកនាំនៅពេលខាងមុខនេះ នឹងមិនអនុញ្ញាតឱ្យមេភូមិ ឬ មេប៉ុស្តិ៍ ចូលជាសមាជិកគណបក្សនោះទេ គឺទុកជាបុគ្គលឯករាជ្យធ្វើការងារដើម្បីបម្រើផលប្រយោជន៍ប្រជាពលរដ្ឋ។
ការលើកឡើងរបស់លោក យ៉ង សាំងកុមារ នេះបានធ្វើឡើងនៅក្នុងសមាជគណបក្សប្រជាធិបតេយ្យមូលដ្ឋានកាលពីម្សិលមិញនេះ។ លោកកុមារ បានថ្លែងថា បច្ចុប្បន្នអាជ្ញាធរមូលដ្ឋាននៅតែធ្វើការងារដូចអង្គការភ្នែកម្នាស់ក្នុងសម័យខ្មែរក្រហម តាមរយៈការតាមដាន ឬការបំភិតបំភ័យពលរដ្ឋ មិនឱ្យចូលរួមសកម្មភាពជាមួយគណបក្សនយោបាយដទៃ។
លោក យ៉ង សាំងកុមារ៖ «មេប៉ុស្តិ៍ឬនគរបាលអីហ្នឹង យើងមានបទពិសោធន៍ កន្លែងខ្លះដែលយើងជួបប្រជុំហើយគាត់ចូលផ្ទះប្រជាពលរដ្ឋសួរនាំហើយ។ ហ្អាក! អាហ្នឹងចោរមែន? ជនជាប់សង្ស័យមែន? គាត់អត់ត្រូវធ្វើការងារហ្នឹងទេ គាត់ត្រូវតាមដានកន្លែងណាមានក្មេងប្រើគ្រឿងញៀន ការពារសន្តិសុខជូនពលរដ្ឋ»។
លោក បន្តថា តួនាទីរបស់មេភូមិ និងមេប៉ុស្តិ៍ ជាមន្ត្រីឯករាជ្យ ដោះស្រាយបញ្ហាទុក្ខកង្វល់របស់ប្រជាពលរដ្ឋ។
លោក យ៉ង សាំងកុមារ បន្ថែមថា៖ «មេភូមិជាមេរបស់អ្នកភូមិគ្រប់រូប។ ពេលយើងធ្វើជាមេឃុំ ហើយអ្នកឯងជាមេភូមិហើយថា ខ្ញុំចង់ចូល គ.ប.ម ដែរ មិនបាច់ទេ! មិនបាច់ឱ្យចូលទេ នៅធ្វើជាមេភូមិទៅ ហើយមិនបាច់ដាក់ស្លាក គ.ប.ម នៅមុខផ្ទះមេភូមិទេ»។
អ្នកនាំពាក្យគណបក្សប្រជាជនកម្ពុជាដែលកំពុងដឹកនាំរដ្ឋាភិបាល លោក សុខ ឥសាន លើកឡើងថា គណបក្សកាន់អំណាចតែងតែធ្វើការងារទៅតាមច្បាប់មិនមែនធ្វើដូចការចោទប្រកាន់របស់ថ្នាក់ដឹកនាំគណបក្សប្រជាធិបតេយ្យមូលដ្ឋាននោះទេ។ លោកបន្តថា ការលើកឡើងរបស់លោក យ៉ង សាំងកុមារ នេះ គឺធ្វើឡើងដើម្បីបានសំឡេងគាំទ្រតែប៉ុណ្ណោះ។
លោក សុខ ឥសាន៖ «វាជារឿងធម្មតាទេ មេបក្សប្រឆាំង មេបក្សប្រកួតប្រជែងជាមួយគណបក្សកាន់អំណាចមិនដែលនិយាយល្អលើគណបក្សកាន់អំណាចទេ តែងតែមានការបង្អាប់បន្ទោស ឬក៏បន្ទាបបន្ថោកគណបក្សកាន់អំណាច ពីព្រោះគាត់ជាអ្នកប្រជែងដើម្បីយកអំណាចពីបក្សកាន់អំណាចហ្នឹងឯង។ យើងមិនបាច់ឆ្ងល់ទេ ប៉ុន្តែបញ្ហាសំខាន់វាអាស្រ័យទៅលើប្រជាជន ដែលទទួលផលពីការបម្រើសេវាសាធារណៈពីមេភូមិ មេឃុំ ចៅសង្កាត់របស់គណបក្សជាប់ឆ្នោត»។
អ្នកសម្របសម្រួលផ្នែកអង្កេតនិងតស៊ូមតិនៃអង្គការខុមហ្រ្វែល លោក កន សាវាង្ស ថ្លែងថា ច្បាប់មានហើយ ដែលកំណត់ពីតួនាទីរបស់មន្ត្រី ដូចជា មេភូមិ ឬមេប៉ុស្តិ៍នេះ ប៉ុន្តែលោកថា មិនទាន់ពង្រឹងការអនុវត្តន៍នៅឡើយ។ លោកបានជំរុញឱ្យគ្រប់គណបក្សនយោបាយបញ្ជាក់ជំហរក្នុងការពង្រឹងតួនាទីរបស់មន្ត្រី មិនឱ្យយកការងារបក្សទៅជ្រៀតជ្រែកឡើយ។
លោក កន សាវាង្ស៖ «សម្រាប់ខ្ញុំ គឺខ្ញុំយល់ថា គណបក្សនយោបាយមិនត្រឹមតែមូលដ្ឋានទេ ដែលប្រកាសហ្នឹង គណបក្សផ្សេងៗទៀតក៏ត្រូវចាប់ផ្តើមពីពេលហ្នឹងទៅ មុនប្រកួតប្រជែង គឺយើងដាក់គោលដៅយើងឱ្យច្បាស់លាស់»។
លោក កន សាវាង្ស លើកឡើងថា នៅពេលដែលមន្ត្រីនៅតាមមូលដ្ឋានដើរតួនាទីជាអ្នកឃោសនាឱ្យគណបក្សនយោបាយ នោះវានឹងនាំឱ្យមានការគំរាមកំហែង។
លោក កន សាវាង្ស៖ «គាត់មិនត្រូវមានតួនាទីបក្សផង គាំទ្រផង ហើយគាំទ្រហ្នឹង កាលណា មានពាក់មួកពាក់អីហ្នឹង មិនមែនគាំទ្រត្រឹមសកម្មជនធម្មតាទេ គឺគាំទ្រគេហៅថា កម្រិតគាំទ្រឃោសនាទៀត។ អាហ្នឹង ផលប្រយោជន៍របស់វាសម្រាប់រួម គឺអត់មានទេ មានតែផលប្រយោជន៍បក្សទេ ហើយបញ្ហាគុណវិបត្តិវានាំឱ្យមានការគំរាមកំហែង»។
ការលើកឡើងពីតួនាទីរបស់មន្ត្រីថ្នាក់មូលដ្ឋានដែលពាក់ព័ន្ធជាមួយអំណាចនៅឃុំសង្កាត់នេះ គឺស្របពេលដែលការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នឹងមកដល់នៅសល់តែប្រមាណ ៦ ខែទៀតប៉ុណ្ណោះ ពោលគឺការបោះឆ្នោតនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២៕
អត្ថបទដោយ៖ ប៉ា តុងចិន
