រដ្ឋាភិបាលកម្ពុជា នៅថ្ងៃនេះ ទទួលបានវ៉ាក់សាំងស៊ីណូវ៉ាក់ចំនួន៣០ម៉ឺនដូសបន្ថែមទៀតដែលជាជំនួយរបស់មជ្ឈមណ្ឌលកូវ៉ាក់ (COVAX Facility) ដើម្បីចូលរួមប្រយុទ្ធប្រឆាំងនឹងជំងឺកូវីដ-១៩។
លោកនាយករដ្ឋមន្ត្រី ហ៊ុន សែន បានលើកឡើងនៅក្នុងទំព័រហ្វេសប៊ុករបស់លោកថា មជ្ឈមណ្ឌលកូវ៉ាក់ បានកំណត់ផ្ដល់វ៉ាក់សាំងបង្ការជំងឺកូវីដ-១៩ ប្រមាណ៦,៦លានដូស មកដល់ប្រទេសកម្ពុជា ក្នុងជំហានដំបូង ហើយនៅថ្ងៃនេះ វ៉ាក់សាំងចំនួន៣០ម៉ឺនដូសបន្ថែមទៀតបានមកដល់ប្រទេសកម្ពុជា។
លោកបន្តថា មកដល់ពេលនេះ វ៉ាក់សាំងចម្រុះជាង៣លានដូសហើយ តាមរយៈមជ្ឈមណ្ឌលកូវ៉ាក់ បានដឹកមកដល់ប្រទេសកម្ពុជាជាបន្តបន្ទាប់។ វ៉ាក់សាំងជាជំនួយរបស់កូវ៉ាក់ដែលដឹកនាំមកដល់ប្រទេសកម្ពុជានោះមានដូចជា ស៊ីណូវ៉ាក់ អាស្ត្រាហ្សេនិកា ម៉ូដេណា និង ចនសុន&ចនសុន។
លោកបន្តថា តាមរយៈផែនការមួយច្បាស់លាស់ទាំងការទិញ ជំនួយពីប្រទេសជាមិត្ត និងមជ្ឈមណ្ឌលកូវ៉ាក់នោះ មកដល់ពេលនេះ កម្ពុជារកបានវ៉ាក់សាំងសរុបជាង៤០លានដូស។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ភាពជោគជ័យរបស់កម្ពុជាលើការរកបានវ៉ាក់សាំង និងការសម្រេចចាក់វ៉ាក់សាំងជូនប្រជាពលរដ្ឋបានស្ទើរតែ១០០ភាគរយ លឿនជាងផែនការគ្រោងទុក។ ហើយករណីនេះក៏បានធ្វើឱ្យកម្ពុជាឆ្លងផុតពីហានិភ័យនិងការរាតត្បាតនៃជំងឺកូវីដ-១៩ ហើយកំពុងបើកប្រទេសជាតិឡើងវិញគ្រប់វិស័យផងដែរ៕
