ពលរដ្ឋជាច្រើនគ្រួសារ រស់នៅឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល បានបង្ហាញការខកចិត្តចំពោះអាជ្ញាធរស្រុកដែលមិនមកជួបពួកគេទៅតាមការសន្យា ដើម្បីដោះស្រាយសំណងផលប៉ះពាល់ដីធ្លី ក្រោមគម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មីរបស់ក្រុមហ៊ុន OCIC។
កាលពីថ្ងៃទី៧ ខែធ្នូ អ្នកភូមិប្រមាណ២០០នាក់ដែលអះអាងថាជាតំណាងឱ្យ៤១៤គ្រួសារ នៅឃុំអំពៅព្រៃ បាននាំគ្នាផ្អាកការតវ៉ាមុខសាលាឃុំជាបណ្ដោះអាសន្ន ក្រោយពីអភិបាលស្រុកកណ្ដាលស្ទឹង លោក អ៊ូច សាវឿន បានសន្យាជួបជាមួយតំណាងពលរដ្ឋនៅសាលាស្រុកនៅថ្ងៃចន្ទនេះ ដើម្បីបំភ្លឺជុំវិញដំណោះស្រាយផលប៉ះពាល់ដីធ្លី។
តំណាងពលរដ្ឋម្នាក់ លោក ភោគ ផាន់នី ប្រាប់ វីអូឌី ថានៅព្រឹកមិញនេះ តំណាងពលរដ្ឋ២៦នាក់ បានទៅជួបជាមួយលោកអភិបាលស្រុក អ៊ូច សាវឿន នៅសាលាស្រុកតាមការសន្យា ប៉ុន្តែអភិបាលស្រុករូបនេះមិនបានចេញមកជួបជាមួយក្រុមតំណាងពលរដ្ឋនោះទេ ក្រោមហេតុផលថា រវល់ជាប់ប្រជុំនៅខាងក្រៅ និងមិនបានជូនដំណឹងមកប្រជាពលរដ្ឋវិញឡើយ។
លោកបន្ថែមថា៖ «ពួកខ្ញុំជាតំណាងនៅព្រឹកមិញហ្នឹងរាងមួម៉ៅទាំងអស់គ្នាដែរ ពីព្រោះប្រសិនបើគាត់មិនបានមកជួយអី គួរតែគាត់ជូនដំណឹងមកយើងវិញ កុំឱ្យខ្ញុំទៅសាលាស្រុកជួបគាត់ ធ្វើឱ្យខាតពេលវេលា ខាតការងារ ខាតលុយកាក់ ទៅរង់ចាំគាត់មួយព្រឹកអត់បានអី។ ពួកខ្ញុំអត់រង់ចាំទេនៅសប្ដាហ៍ក្រោយហ្នឹង បើអត់ដំណោះស្រាយណាមួយ ពួកយើងនឹងនាំគ្នាបាតុកម្មតវ៉ាទៀតហើយ»។
វីអូឌី មិនអាចសុំការឆ្លើយតបពីអភិបាលស្រុកកណ្ដាលស្ទឹង លោក អ៊ូច សាវឿន បានទេ ពាក់ព័ន្ធរឿងនេះ។ ប៉ុន្តែបើតាមតំណាងពលរដ្ឋ មន្ត្រីរដ្ឋបាលស្រុកបានឱ្យតំណាងពលរដ្ឋទៅជួបអភិបាលស្រុករូបនេះម្ដងទៀតនៅចុងសប្ដាហ៍នេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទិ្ធមនុស្សកម្ពុជា លោក វណ្ណ សុផាត បានជំរុញទៅអាជ្ញាធរឱ្យចេញមកជួបនិងបកស្រាយជូនពលរដ្ឋឱ្យបានច្បាស់លាស់ ជុំវិញបញ្ហាជម្លោះដីធ្លីនេះ ដើម្បីបង្ហាញពីការទទួលខុសត្រូវនិងការអនុវត្តតួនាទីរបស់ខ្លួនក្នុងនាមជាអាជ្ញាធរ។
លោកបន្ថែមថា៖ «អាជ្ញាធរពាក់ព័ន្ធមិនត្រូវគិត[យករួច]ខ្លួន មិនត្រូវនៅស្ងៀម ដោយមិនបានពន្យល់ហេតុផលឬក៏បង្ហាញជាឯកសារភស្តុតាងច្បាស់លាស់ ដើម្បីឱ្យប្រជាពលរដ្ឋគាត់ដឹងឮ ឬស្ងប់ចិត្តនោះទេ។ អាជ្ញាធរត្រូវតែចេញមក ដើម្បីបកស្រាយឱ្យបានច្បាស់លាស់ជូនពលរដ្ឋ។ បើអាជ្ញាធរមិនចេញមកជួប មិនចេញមកបកស្រាយជូនពលរដ្ឋឱ្យបានច្បាស់ទេ អាហ្នឹងបង្ហាញឱ្យឃើញថា អាជ្ញាធរទាំងនោះមិនបានអនុវត្តតួនាទីរបស់គាត់ដែលជាអាជ្ញាធរនៅឃុំសង្កាត់នោះទេ»។
បើតាមតំណាងពលរដ្ឋ ដីទំហំសរុប៨៣ហិកតារបស់ប្រជាពលរដ្ឋបានរងផលប៉ះពាល់ដោយគម្រោងអភិវឌ្ឍន៍ព្រលានយន្តហោះថ្មីរបស់ក្រុមហ៊ុន OCIC តាំងពីឆ្នាំ២០១៨ រហូតមកដល់ពេលនេះ ដោយពុំទាន់បានការដោះស្រាយសំណងនៅឡើយទេ ខណៈផ្នែកខ្លះនៃដីនោះត្រូវបានក្រុមហ៊ុនឈូសឆាយអភិវឌ្ឍខ្លះទៅហើយ។
តំណាងពលរដ្ឋឱ្យដឹងទៀតថា សំណងដែលពួកគេទាមទារជាសំណងគោលនយោបាយ ដោយក្នុង១ម៉ែត្រការ៉េ តម្លៃ៨ដុល្លារ។
កាលពីខែកក្កដា ឆ្នាំ២០២១ ក្រុមពលរដ្ឋបានចេញលិខិតចំហមួយច្បាប់ដោយបញ្ជាក់ថា គម្រោងអភិវឌ្ឍន៍ព្រលានយន្តហោះអន្តរជាតិភ្នំពេញថ្មី អូស៊ីអាយស៊ី (OCIC) របស់លោកឧកញ៉ា ពុង ឃាវសែ បានធ្វើឱ្យប៉ះពាល់ប្រជាពលរដ្ឋ៣៣០គ្រួសារ មកពីឃុំចំនួន៤ រួមមាន ឃុំបឹងខ្យាង ឃុំអំពៅព្រៃ ឃុំព្រែកស្លែង ក្នុងស្រុកកណ្ដាលស្ទឹង ខេត្តកណ្ដាល និងឃុំពត់សរ នៅស្រុកបាទី ខេត្តតាកែវ ដែលមានក្បាលដីទំហំជាង១លានម៉ែត្រការ៉េ៕