ពលរដ្ឋប្រមាណ៥០នាក់មកពីសហគមន៍ឡពាង ក្នុងស្រុកកំពង់ត្រឡាច ខេត្តកំពង់ឆ្នាំង បានប្រមូលផ្ដុំគ្នានៅមុខសាលាដំបូងខេត្ត នៅព្រឹកថ្ងៃអង្គារនេះ ដើម្បីទាមទារទៅតុលាការដោះលែងតំណាងពួកគេម្នាក់ឱ្យមានសេរីភាពឡើងវិញ។
តំណាងសហគមន៍ឡពាងមួយរូប អ្នកស្រី អ៊ុំ សុភី ប្រាប់ វីអូឌី ថាការដែលអ្នកភូមិប្រហែល៥០នាក់ប្រមូលផ្ដុំគ្នានៅមុខសាលាដំបូងខេត្តកំពង់ឆ្នាំងនេះ ដើម្បីដាក់ញត្តិសុំឱ្យតុលាការដោះលែងតំណាងរបស់ពួកគេម្នាក់ឈ្មោះ រាជ សីមា ដែលរងការចោទប្រកាន់ថា «បានប្រើអំពើហិង្សាដោយចេតនាមានស្ថានទម្ងន់ទោស»។
អ្នកស្រីបន្តថា លោក រាជ សីមា ជាប្រធានគណៈកម្មការអភិរក្សធនធានធម្មជាតិបឹងពោធិ៍ និងជាតំណាងប្រជាពលរដ្ឋរងគ្រោះដីធ្លីនៅសហគមន៍ឡពាង នៅឃុំតាជេស ស្រុកកំពង់ត្រឡាច ត្រូវបានតុលាការសម្រេចឃុំខ្លួនតាំងពីថ្ងៃទី២៨ ខែវិច្ឆិកា ឆ្នាំ២០២១ ក្រោយពីតំណាងរូបនេះមានជម្លោះជាមួយបុគ្គលឈ្មោះ សុខ ដែលត្រូវជាប្អូនថ្លៃរបស់ខ្លួន។
តំណាងពលរដ្ឋរូបនេះបានរៀបរាប់ពីហេតុការណ៍ថា កាលពីថ្ងៃទី២៧ ខែវិច្ឆិកា ឆ្នាំ២០២១ លោក រាជ សីមា មានជម្លោះជាមួយប្អូនថ្លៃរបស់ខ្លួន និងបានវាយប្រតប់គ្នា ដោយពុំមានរបួសស្នាមលើភាគីណាឡើយ។ អ្នកស្រីបន្តថា ក្រោយមានការសម្របសម្រួលពីអ្នកភូមិដូចគ្នា គូជម្លោះរបស់លោក រាជ សីមា បានជិះម៉ូតូទៅផ្ទះរបស់ខ្លួនវិញទាំងស្ថានភាពស្រវឹង និងបានដួលម៉ូតូដោយខ្លួនឯងបង្កឱ្យមានរបួសស្នាមនិងខូចខាតម៉ូតូផងដែរ។
ក្រោយដួលម៉ូតូដោយខ្លួនឯងនោះ អ្នកស្រីថា ឈ្មោះ សុខ បែរជាទៅប្ដឹងសមត្ថកិច្ចឃុំតាជេស ដោយចោទលោក រាជ សីមា ថាបានប្រើអំពើហិង្សាលើខ្លួនរហូតរងរបួសនិងខូចខាតម៉ូតូទៅវិញ។ ហើយសត្ថមកិច្ចក៏បានចាប់ខ្លួនលោក រាជ សីមា ភ្លាមៗតែម្ដង ដោយមិនបានសួរអ្នកភូមិឬសាក្សីដែលឃើញហេតុការណ៍នោះឱ្យបានច្បាស់លាស់ឡើយ។
តំណាងពលរដ្ឋរូបនេះចាត់ទុកករណីចាប់ឃុំខ្លួននិងការចោទប្រកាន់របស់តុលាការទៅលើលោក រាជ សីមា នោះ ថាជារឿងអយុត្តិធម៌ និងមានចេតនាចង់ធ្វើបាបតំណាងសហគមន៍ឡពាង។
អ្នកស្រី អ៊ុំ សុភី បន្ថែមថា៖ «ខ្ញុំបានសំណូមពរទៅតុលាការឱ្យដោះលែងគាត់បាននៅក្រៅឃុំ ពីព្រោះគាត់អត់បានធ្វើអីខុសទេ។ ជាធម្មតា ការឈ្លោះគ្នាមានការប្រតាយប្រតប់គ្នា វាតែងត្រូវគ្នាទៅវិញទៅមកហើយ។ តាមពិត ជនរងគ្រោះគាត់ដួលម៉ូតូខ្លួនឯងទេ ដែលរបួសធ្ងន់ធ្ងរហ្នឹង។ ហើយដើមបណ្ដឹងហ្នឹងក៏បានដកពាក្យបណ្ដឹងវិញហើយដែរ។ អ៊ីចឹងសង្ឃឹមថា តុលាការនឹងដោះលែងគាត់ឱ្យបានក្រៅឃុំ បានជួបប្រពន្ធកូន ពីព្រោះប្រពន្ធគាត់កំពុងជួបការលំបាកជាខ្លាំង»។
ពលរដ្ឋម្នាក់ លោក ស្ងួន យឿន និយាយថា កន្លងមក លោក រាជ សីមា តែងតែសកម្មក្នុងដឹកនាំប្រជាពលរដ្ឋតវ៉ារឿងដីធ្លី និងការពារបឹងធម្មជាតិមួយកន្លែងនៅក្នុងសហគមន៍ កុំឱ្យមានការរំលោភបំពានយកពីសំណាក់ជនខិលខូចលក់ទៅឱ្យក្រុមហ៊ុន។
លោកបន្តថា អាជ្ញាធរមូលដ្ឋានហាក់មិនពេញចិត្តនឹងសកម្មភាពរបស់លោក រាជ សីមា ដែលបានកៀរគរប្រជាពលរដ្ឋឱ្យចូលរួមការពារបឹងធម្មជាតិ និងតវ៉ាដីធ្លីនោះទេ ខណៈដីបឹងសហគមន៍នោះជាង៤៧ហិកតា ដែលជាប្រភពធនធានត្រី ខ្ចៅខ្យង ផ្ដល់ដីដាំបន្លែបង្ការផ្សេងៗផងនោះ កំពុងរងការគំរាមកំហែងជីកយកនិងចាក់ដីលុបធ្វើកម្មសិទ្ធិ។
លោកបន្ថែមថា៖ «ករណីលោក រាជ សីមា ជាប់ពន្ធនាគារនេះ គឺជាការរៀបចំរបស់អាជ្ញាធរភូមិឃុំដែលធ្លាប់បានធ្វើបាបគាត់ជាច្រើនលើកច្រើនសារមកហើយ ឱ្យតែជាគណៈកម្មការហ្នឹង គេតែងតែធ្វើព្យុះធ្វើភ្លៀង ដោយធ្វើយ៉ាងណាឱ្យគាត់មានទោស ដើម្បីឱ្យតុលាការឃុំខ្លួនគាត់។ កន្លងមក អ្នកដែលល្មើសច្បាប់ក្នុងបឹងអភិរក្សហ្នឹង តែងតែប្ដឹងលោក រាជ សីមា ជាច្រើនដងហើយដែរ។ ពេលនេះគេធ្វើបានជោគជ័យហើយ ហើយការចាប់គាត់ដាក់ពន្ធនាគារ វាពិតជាអយុត្តិធម៌មែន ពីព្រោះគាត់មិនបានធ្វើដូចការចោទប្រកាន់ឡើយ»។
នាយរងប៉ុស្តិ៍នគរបាលឃុំតាជេស លោក ប៉ាវ សារឿន បានច្រានចោលការចោទប្រកាន់នេះ ដោយថា សមត្ថកិច្ចចាប់ខ្លួនលោក រាជ សីមា ធ្វើឡើងតាមពាក្យបណ្ដឹងរបស់ជនរងគ្រោះដែលជាប្អូនស្រីបង្កើតរបស់គាត់ ដែលបានចោទថា គាត់បានប្រើហិង្សានិងបង្ករបួសស្នាមលើស្វាមីរបស់ខ្លួន។
លោកបន្ថែមថា៖ «ខ្ញុំមិនចេះទៅចោទប្រកាន់ពីណាទេ តែអ្នកឯងធ្វើខុស ខ្ញុំចាប់ហើយ។ ព្រោះយើងមានច្បាប់ យើងត្រូវធ្វើតាមនីតិវិធីច្បាប់។ អត់ធ្វើតាមអ្នកឯងនឹកឃើញទេ»។
វីអូឌី មិនអាចសុំការបញ្ជាក់ពីដើមបណ្ដឹង អ្នកស្រី ញឹម មុំ និងលោក សុខ ដែលជាប្អូនស្រីនិងប្អូនថ្លៃរបស់លោក រាជ សីមា បានទេ ជុំវិញករណីនេះ។
កាលពីថ្ងៃទី២៨ ខែធ្នូ ឆ្នាំ២០២១ អ្នកស្រី ញឹម មុំ ដែលជាភរិយារបស់បុរសឈ្មោះ សុខ បានដាក់ពាក្យបណ្ដឹងចោទបងប្រុសរបស់ខ្លួន គឺលោក រាជ សីមា ថាបានប្រព្រឹត្តហិង្សាដោយចេតនាលើប្ដីរបស់គាត់។ ប៉ុន្តែក្រោយមក ទើបអ្នកស្រីដឹងថា រឿងនេះមានការភ័ន្តច្រឡំ ហើយស្វាមីរបស់អ្នកស្រីដួលម៉ូតូរងរបួសដោយខ្លួនឯងតែប៉ុណ្ណោះ ទើបនៅថ្ងៃទី១៣ ខែធ្នូ ឆ្នាំ២០២១ អ្នកស្រី ញឹម មុំ បានសុំដកពាក្យបណ្ដឹងនៅតុលាការ និងសុំឱ្យមានការដោះលែងលោក រាជ សីមា មានសេរីភាពវិញ៕
