អ្នកភូមិជាច្រើននាក់ រស់នៅឃុំទឹកល្អក់ ស្រុកគងពិសី ខេត្តកំពង់ស្ពឺ បាននាំគ្នាតវ៉ាបិទកំណាត់ផ្លូវលំមួយស្ថិតក្នុងឃុំនេះ ដើម្បីទាមទារទៅអាជ្ញាធរនិងក្រុមហ៊ុនជួសជុលផ្លូវលំមួយខ្សែនេះឡើងវិញ ក្រោយរងការខូចខាតដោយសារឡានដឹកថ្មរបស់ក្រុមហ៊ុន។
លោក ខឹម ខន អាយុ៧៣ឆ្នាំ រស់នៅភូមិព្រៃកន្ទោច ឃុំទឹកល្អក់ ប្រាប់ វីអូឌី ថាអ្នកភូមិប្រមាណ៥០នាក់ មកភូមិចំនួន៣ នៃឃុំទឹកល្អក់ បាននាំគ្នាតវ៉ាបិទផ្លូវលំមួយខ្សែស្ថិតក្នុងសហគមន៍នៅថ្ងៃចន្ទម្សិលមិញនេះ ដើម្បីទាមទារឱ្យក្រុមហ៊ុនដឹកថ្មជួសជុលផ្លូវឡើងវិញ ក្រោយពីឡានដឹកថ្មរបស់ក្រុមហ៊ុនធ្វើឱ្យខូចខាត។
ពលរដ្ឋរូបនេះឱ្យដឹងថា ផ្លូវលំមួយខ្សែប្រវែង៣គីឡូម៉ែត្រដែលមានប្រជាពលរដ្ឋចំនួន៣ភូមិធ្វើដំណើរឆ្លងកាត់ជាប្រចាំនោះ បានរងការខូចខាតជិត១០ឆ្នាំហើយ ដោយសារឡានដឹកថ្មរបស់ក្រុមហ៊ុនបើកឆ្លងកាត់ ដោយពុំមានអាជ្ញាធរនិងក្រុមហ៊ុនណាចេញមុខជួសជុលជូនពលរដ្ឋវិញឡើយ។
លោកបន្ថែមថា៖ «ឡានក្រុមហ៊ុនដឹកថ្មហ្នឹង វាបើកដឹកថ្មធ្វើឱ្យខូចខាត ដោយកន្លែងខ្លះខេងខូង កាប៉ែតកាប៉ូត ដូចរន្ធបាយខុមអ៊ីចឹង ពិបាកធ្វើដំណើរណាស់។ ខែប្រាំងហុយ ខែវស្សាទឹក វាអត់ធ្វើឱ្យយើងទេ ក្រុមហ៊ុនសន្យាថ្ងៃនេះថ្ងៃនោះរហូត។ អ៊ីចឹងបានប្រជាពលរដ្ឋគាត់ទ្រាំអត់បាន គាត់នាំគ្នាតវ៉ាផ្លូវ ជំរុញឱ្យក្រុមហ៊ុននិងអាជ្ញាធរចេញមុខដោះស្រាយ។ យើងទាមទារឱ្យក្រុមហ៊ុន[ជួសជុល]ផ្លូវកៅស៊ូជូនពលរដ្ឋវិញ»។
ពលរដ្ឋម្នាក់ទៀតនៅភូមិគរ លោក ផុន ឬទ្ធី ឱ្យដឹងថា ដើមឡើយមានក្រុមហ៊ុនដឹកថ្មចំនួន៤ បានបើកឆ្លងកាត់ផ្លូវលំនេះ និងបានសន្យាធ្វើផ្លូវកៅស៊ូជូនពលរដ្ឋ ប៉ុន្តែក្រោយមក ក្រុមហ៊ុនចំនួន២ បានដកខ្លួនចេញ ក្រោមហេតុផលថាមានបញ្ហាសេដ្ឋកិច្ចដោយសារជំងឺកូវីដ-១៩។ ពលរដ្ឋរូបនេះបន្តថា រយៈពេលជិត១០ឆ្នាំមកនេះ អ្នកភូមិបានជួបការលំបាកជាខ្លាំង ដោយសារផ្លូវនេះពិបាកធ្វើដំណើរ ពិបាករស់នៅ និងមានសំឡេងរំខានបង្កដោយឡានដឹកថ្មផងដែរ។
លោកបន្ថែមថា៖ «រឿងនេះ ប្រជាពលរដ្ឋលំបាកយូរឆ្នាំហើយ។ ខ្ញុំនៅលក់ដូរជាប់ផ្លូវនេះ ប្រឡូកប្រឡាក់សុទ្ធតែដី មិនថាពូកម៉ុងភួយទេ ប្រឡាក់សុទ្ធតែដី យើងដេកទៅជាប់ដីហុយពេញហ្នឹង។ បើសម្រាកដេកវិញ ទាល់តែម៉ោង១០ទៅ១១យប់ បានឡានវាឈប់បើកបរ ហើយជិតភ្លឺម៉ោង២ឬម៉ោង៣ ឡានចាប់ផ្ដើមបើកទៀតហើយ។ បើនៅខែវស្សាវិញ ផ្លូវនេះវាក៏ខូចធ្ងន់ធ្ងរដែរ វាមានក្រឡុកទឹកជ្រៅ រហូតបើម៉ូតូមិនចង់កើត និយាយទៅ ពិបាកតែម្ដង»។
ទោះយ៉ាងណា ក្រុមប្រជាពលរដ្ឋទាំងនោះមិនបានចាំឈ្មោះថាតើក្រុមហ៊ុនដែលដឹកថ្មនោះមានឈ្មោះអ្វីខ្លះនោះទេ។
វីអូឌី មិនអាចរកការឆ្លើយតបពីតំណាងក្រុមហ៊ុនបានទេ ពាក់ព័ន្ធករណីនេះ។
ជំនួយការរដ្ឋបាលឃុំទឹកល្អក់ លោក នូ ភុន បានទទួលស្គាល់ថា ផ្លូវលំនោះពិតជារងការខូចខាតដោយសារឡានក្រុមហ៊ុនដឹកថ្មពិតមែន។ លោកថា កន្លងមក អាជ្ញាធរឃុំក៏ធ្លាប់ឱ្យក្រុមហ៊ុនធ្វើការជួសជុលដែរ ប៉ុន្តែក្រុមហ៊ុនបានត្រឹមសន្យា។
លោកបន្តថា ក្រោយពលរដ្ឋតវ៉ានៅព្រឹកម្សិលមិញនេះ អាជ្ញាធរបានហៅតំណាងក្រុមហ៊ុនចរចារកដំណោះស្រាយ ដោយខាងក្រុមហ៊ុនសន្យាជួសជុលតាមរយៈការចាក់ដីបង្ហាប់សិន និងដល់រដូវប្រាំងនឹងធ្វើជួសជុសដោយចាក់កៅស៊ូ។ លោកថា ប្រសិនបើក្រុមហ៊ុនមិនអនុវត្តតាមការសន្យាទេ អាជ្ញាធរនឹងបិទលែងឱ្យក្រុមហ៊ុនទាំងនោះធ្វើដំណើរឆ្លងកាត់ទៀតហើយ។
លោកបន្ថែមថា៖ «ក្រុមហ៊ុនបានសន្យាជាមួយយើងជាអាជ្ញាធរនិងប្រជាពលរដ្ឋ ហើយថានឹងចាក់ដីបង្ហាប់ស្រោចទឹក ហើយប្រសិនបើមានបញ្ហាពាក់ព័ន្ធនឹងជង្ហុក ហើយក្រុមហ៊ុនអត់ជួសជុលឱ្យវិញ ត្រូវរាយការណ៍មកអាជ្ញាធរយើង។ ហើយក្នុងរយៈពេលមួយអាទិត្យ នៅតែអត់ធ្វើទៀត យើងនឹងបិទមិនឱ្យឆ្លងកាត់ទៀតទេ»។
បើតាមជំនួយការរដ្ឋបាលឃុំទឹកល្អក់ ផ្លូវដែលកំពុងរងការខូចខាតនោះមានប្រជាពលរដ្ឋចំនួន៣ភូមិ ត្រូវធ្វើដំណើរឆ្លងកាត់ជាប្រចាំ ក្នុងនោះមានពលរដ្ឋនៅភូមិគរ ភូមិព្រៃកន្ទោច ភូមិចំបក់ក្អែរ នៃឃុំទឹកល្អក់ ស្រុកគងពិសី ខេត្តកំពង់ស្ពឺ ខណៈអ្នកភូមិព្រមានតវ៉ាបិទផ្លូវម្ដងទៀត ប្រសិនក្រុមហ៊ុនមិនជួសជុសផ្លូវឡើងវិញតាមការសន្យា៕