ប្រជាពលរដ្ឋនៅទីក្រុង យ៉ាំងហ្គូន (Yangon) ប្រទេសមីយ៉ាន់ម៉ា បានសម្តែងការខកចិត្តជុំវិញការចេញសាលក្រមសម្រេចកាត់ទោសដាក់ពន្ធនាគាររយៈពេល ២ឆ្នាំ ប្រឆាំងនឹងអតីតមេដឹកនាំមីយ៉ាន់ម៉ា លោកស្រី អ៊ុងសាន ស៊ូជី ធ្វើឡើងដោយតុលាការដែលស្ថិតនៅក្រោមការគ្រប់គ្រងដោយរបបយោធា។
ការសម្រេចនេះ ធ្វើឡើងបន្ទាប់ពីរដ្ឋាភិបាលបានផ្តល់ការបន្ធូរបន្ថយទោសមួយផ្នែក ដើម្បីកាត់បន្ថយរយៈពេលជាប់ពន្ធនាគាររបស់មេដឹកនាំ ដែលត្រូវបានទម្លាក់ពីតំណែងរូបនេះពី ៤ មក ២ឆ្នាំ ក្រោមបទរំលោភវិធានការទប់ស្កាត់វិបត្តិកូវីដ-១៩។
គួរបញ្ជាក់ថា ការសម្រេចនេះ គឺជាសាលក្រមលើកដំបូងប្រឆាំងនឹង លោកស្រី អ៊ុងសាន ស៊ូជី គិតចាប់តាំងពីលោកស្រីត្រូវបានទម្លាក់ចេញពីតំណែងកាលពីខែកុម្ភៈ ខណៈដែលលោកស្រីបច្ចុប្បន្ន ក៏រងបទចោទប្រកាន់មួយចំនួនផ្សេងទៀត ដែលក្នុងនោះរួមមាន បទទទួលសំណូក និងបទរំលោភការសម្ងាត់រដ្ឋផងដែរ។
ទាក់ទិននឹងករណីនេះ ពលរដ្ឋមួយរូបដែលមានឈ្មោះថា Tin បានលើកឡើងថា រាល់បទចោទលើអតីតមេដឹកនាំមីយ៉ាន់ម៉ារូបនេះ គឺជារឿងខុសច្បាប់ ដោយលោកស្រីបានជំរុញឱ្យប្រជាពលរដ្ឋចេញមកតវ៉ាដើម្បីផ្តួលរំលំក្រុមប្រឹក្សាយោធា ខណៈដែលលោកស្រីបដិសេធមិនទទួលស្គាល់របបនេះនោះទេ។
នៅក្នុងបទសម្ភាសន៍ជាមួយសារព័ត៌មាន A24 News ប្រជាពលរដ្ឋមួយរូប លោក Khin Maung ថ្លែងថា៖ «ពួកគេ [របបយោធា] បានចេញសាលក្រមដោយអយុត្តិធម៌ប្រឆាំងនឹងទីប្រឹក្សារដ្ឋ និងជាប្រធានាធិបតីមួយរូប។ សាលក្រមដោយអយុត្តិធម៌នេះ ត្រូវបានចេញដោយច្បាប់ដែលបង្កើតឡើងដោយពួកគេផ្ទាល់ ខណៈដែលប្រជាជនមីយ៉ាន់ម៉ាមិនទទួលស្គាល់នោះទេ»។
លោកបន្តថា៖ «ពួកគេធ្វើអ្វីតាមតែពួកគេចង់បានប៉ុណ្ណោះ ហើយប្រជាពលរដ្ឋមិនយល់ស្របនោះទេ។ តាមពិតទៅ ប្រជាពលរដ្ឋទាំងឡាយមិនទទួលបានឱកាសល្អណាមួយក្នុងការតបត និងបះបោរនោះទេ។ ប្រសិនបើពួកគេមានឱកាស ពួកគេច្បាស់ជាមិនស្ទាក់ស្ទើរក្នុងធ្វើវានោះទេ ដោយសារតែពួកគេពិតជាអារម្មណ៍ឈឺចាប់យ៉ាងខ្លាំង»។
ប្រជាពលរដ្ឋមួយរូបទៀត លោក Ko Kyaw បានឱ្យដឹងដែរថា៖ «គិតចាត់តាំងពីមានរដ្ឋប្រហារមក តុលាការគ្រប់ជាន់ថ្នាក់ទាំងអស់ គឺស្ថិតក្រោមការគ្រប់គ្រងរបស់របបយោធា ដូច្នេះតើពួកគេកំពុងតែគ្រប់គ្រងរដ្ឋបាលទាំងមូលហើយឬនៅ? ខ្ញុំចង់ដឹងទាក់ទងនឹងករណីនេះ»។
លោកបន្តថា៖ «សូម្បីតែអាស៊ានក៏មិនទទួលស្គាល់ពួកគេដែរ ដូច្នេះហើយ យើងមិនជឿជាក់ ឬទុកចិត្តលើការកាត់ទោស និងសាលក្រមដែលធ្វើឡើងដោយពួកគេនោះទេ។ ទាក់ទងទៅនឹងសាលក្រមដែលចេញប្រឆាំងនឹងលោកស្រី អ៊ុងសាន ស៊ូជី នេះយើងក៏មិនយល់ស្រប ឬទទួលស្គាល់ផងដែរ»។
ជាមួយគ្នានេះ ប្រជាពលរដ្ឋលោកស្រី Tin Hla បន្ថែមថា៖ «យើងមិនបានទទួលស្គាល់ពួកគេ (របបយោធា) ស្រាប់ទៅហើយ។ យើងចាត់ទុកថារាល់ច្បាប់ និងបទប្បញ្ញត្តិណាក៏ដោយដែលផ្តល់ ឬប្រកាសដោយពួកគេគឺមិនស្របច្បាប់នោះទេ។ ដូច្នេះ ការកាត់ទោស ឬសាលក្រមនេះគឺមិនអាចទទួលយកបានទេ ហើយបដិវត្តន៍ក៏មិនឈប់ផងដែរ»។
លោកស្រីបន្ថែមថា៖ «ក្នុងនាមជាជនស៊ីវិល យើងនឹងនៅតែបន្តតបត និងបះបោរប្រឆាំងនឹងពួកគេ ខណៈដែលវាមិនមែនជារឿងចាំបាច់ដែលត្រូវគោរពតាមបទបញ្ជា ឬច្បាប់ដែលប្រកាសដោយពួកគេឡើយ។ បដិវត្តន៍នឹងនៅតែរឹងមាំ ហើយយើងមិនទទួលស្គាល់ពួកគេជាដាច់ខាត»៕
