សាលាដំបូងខេត្តកោះកុង បានកោះហៅតំណាងពលរដ្ឋមានជម្លោះដីធ្លីម្នាក់ ឱ្យចូលបំភ្លឺទៅតាមបណ្តឹងរបស់ឧកញ៉ា លើសំណុំរឿងមួយករណីទៀត ខណៈបណ្តឹងចាស់មិនទាន់បានជំនុំជម្រះចប់នៅឡើយ។
កាលពីថ្ងៃទី២៤ ខែវិច្ឆិកា ឆ្នាំ២០២១ ព្រះរាជអាជ្ញារង នៃអធ្យការអមសាលាដំបូងខេត្តកោះកុង លោក ឃុន ភឿន បានកោះហៅតំណាងពលរដ្ឋ១៩៧គ្រួសារ អ្នកស្រី ដេត ហ៊ួរ ឱ្យចូលបំភ្លឺចំពោះមុខតុលាការនៅថ្ងៃទី២២ ខែធ្នូ ឆ្នាំ២០២១ ក្រោមបទចោទ «បរិហារបង្កាច់កេរ្តិ៍ និងបរិហារជាសាធារណៈ» ទៅតាមបណ្តឹងរបស់ឧកញ៉ា ហេង ហ៊ុយ និងជាមន្ត្រីនគរបាលជាន់ខ្ពស់នៅខេត្តកោះកុង។
បើតាមដីកាដដែលនេះ គឺ លោក ហេង ហ៊ុយ បានប្តឹងអ្នកស្រី ដេត ហ៊ួរ កាលពីថ្ងៃទី១១ ខែវិច្ឆិកា ឆ្នាំ២០២១ ជាករណីថ្មីមួយទៀត បន្ទាប់ពីបណ្តឹងចាស់។
អ្នកស្រី ដេត ហ៊ួរ ជាតំណាងពលរដ្ឋ១៩៧គ្រួសារ និយាយនៅថ្ងៃព្រហស្បតិ៍នេះថា ករណីតុលាការកោះហៅអ្នកស្រីឱ្យឆ្លើយបំភ្លឺមួយករណីទៀតតាមបណ្តឹងរបស់លោកឧកញ៉ា ហេង ហ៊ុយ នេះជារឿងមិនត្រឹមត្រូវ និងអយុត្តិធម៌សម្រាប់អ្នកស្រី ដោយថា អ្នកស្រីមិនបានប្រព្រឹត្តដូចការប្រកាន់ឡើយ។
យ៉ាងណា ពាក់ព័ន្ធករណីនេះ អ្នកស្រីមិនទាន់អាចបញ្ជាក់បានថា ត្រូវចូលទៅបំភ្លឺតាមការកោះហៅរបស់តុលាការឬយ៉ាងណានោះទេ ដោយសារករណីនេះអ្នកមិនទាន់ត្រៀមខ្លួន និងរកមេធាវីមកការពារក្តីបាននៅឡើយ។
កាលពីថ្ងៃទី២៤ ខែវិច្ឆិកា ឆ្នាំ២០២១ បានបើកសវនាការលើសំណុំរឿងតំណាងពលរដ្ឋ៩នាក់ នៅសហគមន៍១៩៧គ្រួសារ រួមមាន អ្នកស្រី អិប តឹង, អ្នកស្រី ដេត ហួរ, អ្នកស្រី កើត នៅ, អ្នកស្រី អ៊ិន ធូ, លោក គង់ មែន និងតំណាងពលរដ្ឋផ្សេងទៀត ដើម្បីឆ្លើយបំភ្លឺក្រោមបទចោទ «បរិហារកេរ្តិ៍ និងញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ទៅតាមបណ្ដឹងរបស់លោក ហេង ហ៊ុយ ប្រធានក្រុមហ៊ុន ហេង ហ៊ុយ អភិវឌ្ឍន៍។
សវនការនេះមិនទាន់បានបញ្ចប់នៅឡើយទេ ដោយតុលាការសាកសួរបានតែតំណាងពលរដ្ឋ៧នាក់ ខណៈតំណាងពលរដ្ឋ ២នាក់ទៀត មិនទាន់បានសាកសួរ ហើយតុលាការសម្រេចផ្អាកការសាកសួរបណ្តោះអាសន្ន ដោយឱ្យតំណាងពលរដ្ឋទាំងនោះ មកលំនៅឋានវិញ រងចាំការកោះហៅជាថ្មី។
ចាប់តាំងពីពាក់កណ្ដាលឆ្នាំ២០១៩មក ពលរដ្ឋចំនួន ១៩៧គ្រួសារ មកពីឃុំជីខលើ និងជីខក្រោម បានឡើងមកតវ៉ានៅរាជធានីភ្នំពេញជាបន្តបន្ទាប់ ដើម្បីរកអន្តរាគមន៍ពីក្រសួងរៀបចំដែនដី ជួយដោះស្រាយវិវាទដីធ្លីរបស់ពួកគាត់ ដោយចោទថា ក្រុមហ៊ុន ហេង ហ៊ុយ រំលោភយកតាំងពីឆ្នាំ២០០៧។ ប៉ុន្តែត្រូវបានក្រសួងរៀបចំដែនដី បដិសេធដោះស្រាយឱ្យពលរដ្ឋទាំងនោះចំនួន៣ដងហើយ និងស្នើទៅអាជ្ញាធរពាក់ព័ន្ធឱ្យចាត់វិធានការផ្លូវច្បាប់ចំពោះអ្នក ដែលក្រសួងថា បានញុះញង់ឱ្យពលរដ្ឋ១៩៧គ្រួសារនោះឡើងមកតវ៉ាទៀតផង៕