សាលាដំបូងខេត្តឧត្តរមានជ័យ កោះហៅពលរដ្ឋចំនួន ១០នាក់ ឱ្យឆ្លើយបំភ្លឺលើកទី៣ ក្រោមការចោទប្រកាន់ថា បានរំលោភយកដីព្រៃរបស់រដ្ឋធ្វើកម្មសិទ្ធិ ស្ថិតនៅភូមិតាម៉ាន សង្កាត់កូនក្រៀល ក្រុងសំរោង។
ចៅក្រមស៊ើបសួរសាលាដំបូងខេត្តឧត្ដរមានជ័យ លោក យិន វិសិដ្ឋ បានចេញដីកាលើកទី៣ កាលពីថ្ងៃទី៨ ខែធ្នូ ឆ្នាំ២០២១ បង្គាប់ឱ្យពលរដ្ឋមួយក្រុមមានគ្នា១០នាក់ រួមមាន លោក ប្រម រី, លោក ឡាត ភូត, លោក ឡា ខន, លោក ឡុញ សុភាព, លោកឡោក ឆោមរ៉ា, លោក ឡា ដាង និងពលរដ្ឋផ្សេងទៀត រស់នៅសង្កាត់កូវក្រៀល ចូលទៅបំភ្លឺនៅតុលាការ នៅថ្ងៃទី២៨ ខែធ្នូនេះ ដើម្បីសាកសួរពីដំណើររឿង «កាប់រានដីព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃគ្មានលិខិតអនុញាត» ដែលប្រព្រឹត្តកាលពីដើមឆ្នាំ២០២១ ស្ថិតនៅភូមិតាម៉ាន សង្កាត់កូនក្រៀល។
ក្នុងដីកាដដែល ព្រមានថា ប្រសិនបើពួកគេមិនចូលខ្លួនតាមកាលកំណត់ទេ តុលាការនឹងចេញដីកាបង្គាប់ឱ្យនាំខ្លួន។
លោក ឡុញ សុភាព រស់នៅភូមិតាម៉ាន សង្កាត់កូនក្រៀល ប្រាប់វីអូឌីនៅថ្ងៃព្រហស្បតិ៍នេះថា ពួកគាត់ទាំង១០នាក់ មិនទាន់បញ្ជាក់បានថា ត្រូវចូលបំភ្លឺតាមការកោះហៅ ឬយ៉ាងណានោះទេ ដោយរងចាំការពិភាក្សាគ្នា និងស្វែងរកមេធាវីមកជួយការពារក្តីសិន។
ពលរដ្ឋរូបនេះ ចាត់ទុកករណីនេះថាជារឿងអយុត្តិធម៌ ដោយថា ពួកគាត់មិនបានប្រព្រឹត្តកំហុសដូចការចោទប្រកាន់ឡើយ។ លោកថា ដីស្រែ និងដីចម្ការនោះ គឺគ្រួសារលោកបានចូលទៅអាស្រ័យផលតាំងពីឆ្នាំ១៩៩៨ រហូតមកទល់បច្ចុប្បន្ននេះ។
លោកបន្ថែមថា៖ «ខ្ញុំហួសចិត្តនូវអ្វីដែលគេបានចោទប្រកាន់ខ្ញុំនេះណាស់។ ដីដែលខ្ញុំកំពុងអាស្រ័យផលនោះ ខ្ញុំបានធ្វើបន្តពីដូនតាខ្ញុំតាំងពីដើមមកហើយ ហើយមកចោទប្រកាន់ខ្ញុំថា ទៅកាប់បំផ្លាញព្រៃឈើ ខ្ញុំមិនដែលបានទៅកាប់បំផ្លាញដូចការចោទប្រកាន់ផង។ ដីនេះនៅក្នុងភូមិដែលខ្ញុំរស់នៅរាល់ថ្ងៃមានព្រៃមកណា ដីខ្ញុំអាស្រ័យផលរាល់តែឆ្នាំ»។
ពលរដ្ឋម្នាក់ទៀតដែលជាប់បណ្តឹងនៅតុលាការដែរនោះ លោក ឡា ខន ដែលមានដីទំហំ ៥ហិកតា សម្រាប់បង្កបង្កើនផលចិញ្ចឹមសមាជិកគ្រួសារ១០នាក់ បាននិយាយថា ចាប់តាំងពីជាប់បណ្តឹងនៅតុលាការមក រូបលោកមានការព្រួយបារម្ភ និងភ័យខ្លាចរឿងឃុំខ្លួន ទាំងដែលខ្លួនមិនបានធ្វើខុសដូចការចោទប្រកាន់។
លោកបន្តថា៖ «ខ្ញុំសូមអំពាវនាវដល់តុលាការទម្លាក់ចោលការចោទប្រកាន់លើពួកយើង ហើយអំពាវនាវដល់រដ្ឋាភិបាលជួយដោះស្រាយដីធ្លីនេះដោយវាស់វែង និងចេញប័ណ្ណកម្មសិទ្ធិជូនពួកខ្ញុំ កុំពួកខ្ញុំបន្តរងទុក្ខលំបាក។ ដីរបស់ខ្លួនឯងធ្វើទាំងភិតទាំងភ័យ។ បើឱ្យខ្ញុំចេញមិនដឹងចេញទៅណា បើយើងមានដីតែប៉ុណ្ណឹង ផ្ទះនៅហ្នឹង អីចឹងសុំឱ្យរដ្ឋាភិបាលជួយសម្រួលឱ្យបានចប់ និងដកពាក្យបណ្តឹងប្រឆាំងពួកយើងវិញទៅ»។
បើតាមលោក ឡា ខន ដីដែលពួកគាត់កំពុងអាស្រ័យផល និងរងការចោទប្រកាន់ថា បានកាប់រានដីព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃដោយខុសច្បាប់នោះ គឺកំពុងមានជម្លោះជាមួយក្រុមហ៊ុន សាន ហ៊ាង ដែលទើបទទួលបានសិទ្ធិវិនិយោគកាលពីដើមឆ្នាំ២០២១នេះ។
វីអូឌី មិនអាចរកការឆ្លើយតបពីភាគីក្រុមហ៊ុន សាន ហ៊ាង និងអភិបាលខេត្តឧត្ដរមានជ័យ លោក ប៉ែន កុសល បានទេពាក់ព័ន្ធករណីនេះ។
ប៉ុន្តែលោក ប៉ែន កុសល បានប្រាប់វីអូឌីកាលពីខែសីហាឆ្នាំ២០២១នេះថា ករណីពលរដ្ឋទាំងនោះ ជាប់បណ្តឹងនៅតុលាការ គឺលោកមិនអាចលូកដៃបានឡើយ។ ចំណែក បញ្ហាជម្លោះដីធ្លីរវាងប្រជាពលរដ្ឋ និងក្រុមហ៊ុន សាន ហ៊ាង វិញ លោកបានបង្កើតគណៈកម្មការមួយចុះស្រាវជ្រាវ និងស៊ើបអង្កេតរកឯកសារពាក់ព័ន្ធ ដើម្បីឈានទៅរកការដោះស្រាយបញ្ចប់។
មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្ដរមានជ័យ លោក ស្រី ណារ៉េន បានឱ្យដឹងថា ពលរដ្ឋទាំង១០នាក់ បានមកពឹងពាក់រកមេធាវីពីខាងសមាគមអាដហុក ឱ្យជួយការពារក្តីដល់ពួកគេ។លោកថា មេធាវីបានទទួលសំណើនោះហើយដែរ ប៉ុន្តែត្រូវពន្យាទៀត ឬយ៉ាងណានោះ នៅមិនទាន់ដឹងនៅឡើយ។
ពាក់ព័ន្ធករណីនេះ លោកបានស្នើដល់អាជ្ញាធរពាក់ព័ន្ធឱ្យដោះស្រាយដីធ្លីជូនពលរដ្ឋដោយសន្តិវិធី ជាជាងការគំរាមកំហែង និងប្តឹងពលរដ្ឋទៅតុលាការ ដែលធ្វើឱ្យពលរដ្ឋកាន់តែជួបផលលំបាក ខណៈដីនៅក្នុងខេត្តឧត្តរមានជ័យ នៅសល់ទំនេរច្រើននៅឡើយ។
លោកបន្ថែមថា៖ «ប្រជាពលរដ្ឋគាត់បានធ្វើ គាត់បានបង្កបង្កើនផលហើយ អ៊ីចឹងផ្តល់ឱកាសឱ្យពួកគាត់បានទទួលផលហ្នឹងសិនទៅ ហើយធ្វើការដោះស្រាយគ្នាតាមសន្តិវិធី ដោយអហិង្សា ហើយអញ្ជើញពួកគាត់មកដោះស្រាយទៅជាការល្អ»។
កាលពីថ្ងៃទី១៣ ខែកក្កដា ឆ្នាំ២០២១ ក្រសួងកសិកម្ម រុក្ខាប្រមាញ់ និងនេសាទ បានសម្រេចអនុញ្ញាតឱ្យក្រុមហ៊ុន «សាន ហ៊ាង (កម្ពុជា) អាហរ័ណ នីហរ័ណ ឯ.ក» ធ្វើការឈូសឆាយ និងប្រមូលផលអនុផលព្រៃឈើក្នុងអនុតំបន់២ និងឈូសឆាយផ្ទៃដីទំហំ១ ៥០០ហិកតា ស្ថិតក្នុងស្រុកសំរោង ខេត្តឧត្ដរមានជ័យ។
មន្ត្រីសិទ្ធិមនុស្សអាដហុក លោក ស្រី ណារ៉េន ឱ្យដឹងថា គម្រោងអភិវឌ្ឍន៍របស់ក្រុមហ៊ុន សាន ហ៊ាង នេះបានធ្វើឱ្យប៉ះពាល់ប្រជាពលរដ្ឋចំនួន២ស្រុក នៃខេត្តឧត្ដរមានជ័យ ហើយតាមការប៉ាន់ប្រមាណរបស់លោក គឺមានប្រជាពលរដ្ឋខ្ទង់ពាន់គ្រួសារ ដែលបានរងផលប៉ះពាល់ពីគម្រោងមួយនេះ៕