ភរិយាមន្ត្រីអតីតគណបក្សសង្គ្រោះជាតិនៅខេត្តឧត្តរមានជ័យ បានឱ្យដឹងថា សមត្ថកិច្ចបានចាប់ខ្លួនស្វាមីគាត់ដោយមិនមានដីកា និងបានបញ្ជូនទៅឃុំខ្លួននៅពន្ធនាគារ ពីបទ រួមគំនិតក្បត់ កាលពីចុងឆ្នាំ២០១៩ ពាក់ព័ន្ធនឹងជួបជុំគ្នាគាំទ្រគម្រោងដំណើរមាតុភូមិនិវត្តន៍របស់ លោក សម រង្ស៊ី ។
អ្នកស្រី ភន សុភឿន ដែលអះអាងថា ជាភរិយារបស់លោក សុខ វិល អនុប្រធានប្រតិបត្តិអតីតគណបក្សសង្គ្រោះជាតិស្រុកចុងកាល់ ខេត្តឧត្តរមានជ័យ បានប្រាប់វីអូឌីនៅថ្ងៃនេះថា សមត្ថកិច្ចបានចាប់វាយខ្នោះស្វាមីគាត់ដោយមិនមានដីកា នៅម៉ោងប្រមាណជា៨ព្រឹក ថ្ងៃទី១៥ ខែធ្នូ ចោទប្រកាន់ពីបទ រួមគំនិតក្បត់ ខណៈស្វាមីគាត់កំពុងជិះម៉ូតូដឹករូបគាត់ និងចៅត្រឡប់មកពីផ្សារវិញ។ អ្នកស្រីបន្តថា ដើមចមដែលធ្វើឱ្យសមត្ថកិច្ចឈានដល់ការចាប់ខ្លួនស្វាមីគាត់ ដោយសារតែគាត់ត្រៀមចូលរួមនយោបាយឡើងវិញ ជាមួយគណបក្សភ្លើងទៀន។ អ្នកស្រីបន្តថា ក្រោយការចាប់ខ្លួន កម្លាំងសមត្ថកិច្ច បានបញ្ជូនស្វាមីទៅឃុំខ្លួន នៅពន្ធនាគារខេត្ត កាលពីល្ងាចថ្ងៃម្សិលមិញ។
អ្នកស្រី សុភឿន ចាត់ទុកការចាប់ខ្លួនស្វាមីគាត់ជារឿងអយុត្តិធម៌ ពីព្រោះស្វាមីគាត់មិនបានធ្វើខុសដូចការចោទប្រកាន់នោះទេ ។ ករណីនេះ អ្នកស្រីអំពាវនាវទៅតុលាការទម្លាក់ការចោទប្រកាន់លើស្វាមីគាត់ និងដោះលែងឱ្យមានសេរីភាពវិញ ។
អ្នកស្រីអំពាវនាវដូចនេះថា៖ «កុំឱ្យចោទប្រកាន់ [ស្វាមីគាត់] ចង់ឱ្យដោះលែងមកវិញ ដើម្បីបានជួបជុំគ្រួសារវិញ ពិបាកសូម្បីតែកូនអត់មានរៀនទេ អត់ឪពុក ចៅខ្លះ ម៉ែឃ្លាតទៅធ្វើការនៅថៃតាំងពីចៅអាយុ៥ឆ្នាំ គ្នាបាត់តា ដេកយំ…ខ្ញុំស្រណោះចៅប៉ុណ្ណា ធ្វើបាបចៅខ្ញុំ សូម្បីបែកម៉ែ បែកឪ ឥឡូវបែកតាទៀត»។
ប្រធានប្រតិបត្តិបណ្តោះអាសន្នរបស់គណបក្សភ្លើងទៀន នៅខេត្តឧត្តរមានជ័យ លោក ស៊ិន វុត្ថា អះអាងថា មុននឹងចាប់ខ្លួនលោក សុខ វិល អាជ្ញាធរតែងតែមកបញ្ចុះបញ្ចូលឱ្យគាត់ចូលរួមជីវភាពនយោបាយជាមួយគណបក្សកាន់អំណាច ប៉ុន្តែលោកសុខ វិល បដិសេធជាច្រើនដង។ លោកបន្តថា ក្រោយមកសមត្ថកិច្ចទទួលបានព័ត៌មានថា លោក សុខ វិល គៀគរអ្នកគាំទ្រ និងខ្លួនគាត់ត្រៀមចូលរួមជីវភាពនយោបាយជាមួយគណបក្សភ្លើងទៀន ក៏ត្រូវសមត្ថកិច្ចចាប់ខ្លួនកាលពីម្សិលមិញ ហើយចោទប្រកាន់ ពាក់ព័ន្ធនឹងសំណុំរឿងចាស់ រួមគំនិតក្បត់ ទាក់ទិននឹងគម្រោងដំណើរមាតុភូមិនិវត្តន៍របស់ប្រធានស្ដីទីអតីតគណបក្សសង្គ្រោះជាតិលោក សម រង្ស៊ី កាលពីឆ្នាំ២០១៩ ទៅវិញ ។
លោក ស៊ិន វុត្ថា មានប្រសាសន៍បន្តថា បើទោះបីជាមានការចាប់ខ្លួន លោក សុខ វិល ក៏ពួកគាត់មិនមានភ័យខ្លាច ឬឈប់ចូលរួមនយោបាយជាមួយនឹងគណបក្សភ្លើងទៀននោះទេ ព្រោះពួកគាត់ធ្វើការងារស្របតាមគោលការណ៍ប្រជាធិបតេយ្យ និងមិនជេរប្រមាថថ្នាក់ដឹកនាំគណបក្សណាមួយនោះទេ ។
លោកមានប្រសាសន៍ថា៖ «យើងធ្វើតែអំពើល្អ សេចក្តីល្អ យើងកុំទៅប៉ះពាល់គេ ហើយគោលការណ៍របស់គណបក្សគឺគាត់អប់រំអីចឹង គាត់ចង់ឱ្យមានសុវត្ថិភាព អត់ចង់ឱ្យបងប្អូនណាធ្វើអ្វីដោយឯកតោភាគីទេ គឺធ្វើការងារជារួម ហើយនិយាយសារនយោបាយណាដែលរីកចំរើន ធ្វើការផ្លាស់ប្តូរដោយវិជ្ជមាន»។
ប្រធានស្ដីទីគណបក្សភ្លើងទៀន លោក ថាច់ សេដ្ឋា ចាត់ទុកការចាប់ខ្លួននេះថា ជារូបភាពគំរាមកំហែងមកលើមកលើសកម្មភាពនយោបាយរបស់គណបក្សភ្លើងទៀន។
លោកបន្តថា៖ «សកម្មជនដទៃទៀត ដូចជាមិនមានការភិតភ័យ ឬមានការភ័យខ្លាចទេ ពីព្រោះយើងធ្វើសកម្មភាពស្របច្បាប់ ហើយពួកគាត់បានប្តេជ្ញាបន្តការងារ បេសកកម្មជាតិតទៅទៀត ដូចយើងបានមើលឃើញនៅគ្រប់ខេត្តដែលគាត់សស្រាក់សស្រាំក្នុងការរៀបចំរចនាសម្ព័ន្ធក្នុងការលើកផ្លាកជាដើម»។
ស្នងការនគរបាលខេត្តឧត្តរមានជ័យ លោក ហួត សុធី សុំមិនធ្វើការបកស្រាយជុំវិញករណីនេះ ដោយថា ក្រុមការងាររបស់លោក មិនបានចាប់ខ្លួនលោក សុខ វិល នោះទេ ខណៈអធិការស្រុកចុងកាល់ លោក រិន ធារិទ្ធ អះអាងថា មន្ត្រីអាវុធហត្ថជាអ្នកធ្វើការលើរឿងនេះ។
វីអូឌី មិនអាចសុំការបញ្ជាក់ពីអ្នកនាំពាក្យតំណាងអយ្យការអមសាលាដំបូងខេត្តឧត្តរមានជ័យ លោក សោ សុភ័គ្គ បានទេនៅថ្ងៃនេះ ខណៈមន្ត្រីអាវុធហត្ថខេត្ត មិនអាចទាក់ទងបាន។
នាយកប្រតិបត្តិអង្គការនិចហ្វិច លោក សំ គន្ធាមី យល់ថា ការចាប់ខ្លួនសកម្មជន ឬអ្នកគាំទ្រគណបក្សប្រឆាំង ជាការគំរាមកំហែង និងបំភិតបំភ័យអ្នកដែលចូលរួមគាំទ្រគណបក្សនយោបាយដែលខ្លួនពេញចិត្ត ហើយផ្ទុយពីច្បាប់រដ្ឋធម្មនុញ្ញជាដើម។
លោកមានប្រសាសន៍ថា៖ «សកម្មជនគាត់មានសិទ្ធិចូលរួមក្នុងវិស័យនយោបាយ រដ្ឋាភិបាលគួរតែឈប់គំរាមកំហែង ឈប់បំភិតបំភ័យ ព្រោះលទ្ធផលបោះឆ្នោត បើការបោះឆ្នោតមានការគំរាមកំហែង បំភិតបំភ័យវាប៉ះពាល់ដល់ដំណើរការបោះឆ្នោត លទ្ធផលបោះឆ្នោត»។
ទាក់ទិននឹងបញ្ហានេះដែរ កាលពីថ្ងៃទី១៤ ខែធ្នូនេះ សាលាដំបូងរាជធានីភ្នំពេញ បានបន្តបើកសវនាការសួរដេញដោលអតីតសកម្មជន និងមេដឹកនាំបក្សប្រឆាំងជាង៤០នាក់ ក្នុងសំណុំរឿង «ញុះញង់ និងរួមគំនិតក្បត់»។ ក្រោយពីសវនាការសួរដេញដោលរួចហើយ ប្រធានក្រុមប្រឹក្សាជំនុំជម្រះ លោក រស់ ពិសិដ្ឋ ប្រកាសបិទសវនាការ ដោយនឹងបន្តសាកសួរអតីតសកម្មជនផ្សេងទៀតនៅថ្ងៃទី២១ ខែធ្នូ ឆ្នាំ២០២១ ខាងមុខថែមទៀតផង៕