ម្ចាស់កសិដ្ឋាននិងកសិករចិញ្ចឹមត្រីក្នុងស្រុកមួយចំនួនបានសម្រេចចិត្តផ្អាកលក់ត្រីឬចាប់ត្រីក្នុងស្រះលក់ជាបណ្ដោះអាសន្ន ដោយសារតម្លៃត្រីលក់ចេញទាបពេក ខណៈដើមទុនចំណាយលើការចិញ្ចឹមខ្ពស់។
ការសម្រេចផ្អាកបញ្ចេញត្រីក្នុងស្រះដោយសារតម្លៃថោកនេះ ក្រោយពីក្រសួងកសិកម្ម រក្ខាប្រមាញ់ និងនេសាទ បានសម្រេចបើកផ្លូវឱ្យមានការនាំចូលត្រីសារជាថ្មីកាលពីខែកុម្ភៈ ឆ្នាំ២០២១នេះ និងស្របពេលដែលរដូវប្រមូលផលត្រីធម្មជាតិ ឬរដូវត្រីត្រូវចាប់ផ្ដើមឡើង។
ម្ចាស់កសិដ្ឋានចិញ្ចឹមត្រីមួយរូបនៅស្រុកពញាក្រែក ខេត្តត្បូងឃ្មុំ លោក ខាន់ ជិនសេង បានលើកឡើងនៅថ្ងៃទី១៦ ខែធ្នូនេះថា បច្ចុប្បន្ន តម្លៃត្រីមានធ្លាក់ចុះជាខ្លាំង ដោយសារមានការនាំចូលពីប្រទេសវៀតណាម ខណៈចំណីត្រីភាគច្រើនសុទ្ធតែនាំចូលពីប្រទេសវៀតណាមដូចគ្នា។ លោកបន្តថា បច្ចុប្បន្ន ត្រីប្រា ត្រីពោ កសិករលក់ចេញបាន៤ ៥០០រៀលក្នុងមួយគីឡូ។ លោកថា ប្រសិនបើកសិករអាចលក់ត្រីបា្រ ត្រីពោ ត្រីអណ្ដែង តម្លៃចាប់ពី៥ ៥០០រៀល ទៅ៦ ០០០រៀល ឬលើសពីនេះ នោះពួកគេអាចចំណេញបានខ្លះ។
លោកលើកឡើងថា៖ «បើត្រីប្រា យើងអាចបាន៥៥ ទៅ៦០ [៥៥០០ – ៦០០០រៀល] អី! អាចបានទឹកមាត់លេបខ្លះ។ បើត្រីអណ្ដែងយើងបាន៥៥ ទៅ៦០ដូចគ្នាដែរ។ ត្រីពោ យើងបាន៦ ០០០រៀល ទៅ៦ ៥០០រៀល អាហ្នឹងក៏គ្រាន់ដែរ»។
បញ្ហាតម្លៃត្រីចិញ្ចឹមចុះថោកនេះ លោកស្នើឱ្យរដ្ឋាភិបាលពិចារណាដំឡើងពន្ធលើការនាំចូលត្រីមកពីប្រទេសជិតខាង ដើម្បីឱ្យប្រជាពលរដ្ឋក្នុងស្រុកមានលទ្ធភាពប្រកបមុខរបរចិញ្ចឹមត្រីបន្តទៀត។
កសិករចិញ្ចឹមត្រីអណ្ដែងមួយរូបនៅស្រុកកោះអណ្ដែត ខេត្តតាកែវ លោក មាន មាសជ័យសុវណ្ណ បានឱ្យដឹងដែរថា ដោយសារតែឆ្នាំនេះ ត្រីអណ្ដែងធ្លាក់ថ្លៃពេក ដូច្នេះលោកនិងកសិករផ្សេងទៀតមិនចិញ្ចឹមនោះទេ ព្រោះមិនរួចថ្លៃដើមចំណាយ។ លោកថា ជាទូទៅ ត្រីដែលកសិករខ្មែរចិញ្ចឹមត្រូវការចំណាយពេលយូរជាងត្រីដែលនាំចូលពីប្រទេសវៀតណាម។
លោកលើកឡើងថា៖ «ក្នុងឆ្នាំនេះ ខ្ញុំអត់ដាក់ថែមដោយសារអត់រួចថ្ងៃដើម។ ហើយខ្ញុំធ្លាប់ពិសោធន៍លមើល ត្រីមកពីយួន គេចិញ្ចឹមតែមួយខែ គេមកលក់ គេសុទ្ធតែប្រើអរម៉ូន ប្រើថ្នាំ ប្រើអ៊ីចឹងហ្នឹង។ ចំណែកឯយើងចិញ្ចឹមយ៉ាងតិចណាស់ក៏ពីរខែទៅពីរខែកន្លះដែរ»។
អ្នកលក់ត្រីនៅផ្សារតាកែវ កញ្ញា សុម៉ាលី បានបញ្ជាក់ថា ចំពោះត្រីភាគច្រើនដែលយកមកលក់បន្ត គឺលក្ខណៈចម្រុះឬលាយចូលគ្នា ទាំងត្រីដែលនាំចូលពីវៀតណាមនិងត្រីដែលចិញ្ចឹមនៅក្នុងស្រុក។ ប៉ុន្តែកញ្ញាថា ភាគច្រើនត្រីនាំចូលពីវៀតណាមមានតម្លៃថោកជាងត្រីដែលចិញ្ចឹមក្នុងស្រុកប្រាកដមែន។
កញ្ញាលើកឡើងថា៖ «រឿងហ្នឹងយើងអត់ដឹងដែរ ព្រោះអីត្រីហ្នឹងវាយកមក ពីណាពីណាមក ទាំងស្រុកយើង ស្រុកយួន មកចូលគ្នា ដល់ពេលដល់យើង ទើបគេចែកចាយមកយើង។ អ៊ីចឹងយើងអត់ដឹងថាត្រីហ្នឹងយកមកពីប្រភពណាខ្លះទេ ត្រីក្នុងស្រុកឬក្រៅស្រុកទេ»។
កញ្ញាបន្តថា៖ «ត្រីអណ្ដែងជួនយកមក៥០ [៥ ០០០] ៤៥ [៤ ៥០០រៀល] ត្រីប្រា ជួនយកមក៥៥ [៥ ៥០០រៀល] ៦០ [៦ ០០០រៀល] ត្រីផ្ទក់ ជួន៧៥ [៧៥០០រៀល] ឬ ៦៥ [៦៥០០រៀល]។ ហើយបើត្រីពោ យើងមិនដឹងថាប៉ុន្មានទេ ព្រោះយើងមិនសូវយកមក យកតែត្រីដែលគេត្រូវរករាល់ថ្ងៃ»។
ប្រធានសមាគមវារីវប្បករនៅកម្ពុជា លោក សុខ រ៉ាដែន មានប្រសាសន៍ថា ដោយសារតែត្រីធម្មជាតិទទួលបានទិន្នផលល្អ ស្របពេលត្រីនាំចូលពីប្រទេសជិតខាងក៏ច្រើនទៀត ដែលធ្វើឱ្យកសិករចិញ្ចឹមត្រីមួយចំនួនសម្រេចចិត្តផ្អាកចាប់ត្រីលក់ជាបណ្ដោះអាសន្ន រហូតទាល់តែមានតម្លៃប្រសើរជាងបច្ចុប្បន្ន។
លោកលើកឡើងថា៖ «៤ ២០០រៀល ទៅ ៤ ៥០០! អ៊ីចឹងសម្រាប់ត្រីប្រា ត្រីអណ្ដែង ត្រីផ្សេងៗមានតម្លៃដដែលហ្នឹង ដូចពីមុនមក»។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា សម្រាប់តម្លៃត្រីចិញ្ចឹមនៅមិនទាន់មានភាពប្រសើរនោះទេ ដែលបណ្ដាលមកពីរដ្ឋាភិបាលអនុញ្ញាតឱ្យមានការនាំចូលត្រីពីប្រទេសជិតខាងឡើងវិញ។ លើសពីនេះ លោកថា ការគាំទ្រផលិតផលក្នុងស្រុកនៅមានកម្រិត ស្របពេលត្រីនាំចូលពីវៀតណាមមានតម្លៃទាបជាងត្រីចិញ្ចឹមក្នុងស្រុកជាដើម។
លោកលើកឡើងថា៖ «មួយរយៈមុន រដ្ឋាភិបាលបានផ្អាក ប៉ុន្តែក្រោយមកក៏បានបើកឱកាសឱ្យមានការនាំចូលវិញ។ ត្រីដែលនាំចូលពីប្រទេសជិតខាង ពិសេសធ្វើឱ្យប៉ះពាល់ដល់ត្រីចិញ្ចឹមរបស់បងប្អូននៅក្នុងស្រុក ដោយសាររដ្ឋាភិបាលយល់ថា នេះជាទីផ្សារសេរី មិនអាចហាមឃាត់បាននោះទេ»។
លោកបន្ថែមថា ដើម្បីឱ្យតម្លៃត្រីចិញ្ចឹមក្នុងស្រុកមានភាពប្រសើរឡើង ទាមទារឱ្យរដ្ឋត្រូវតែផ្សព្វផ្សាយឱ្យបានទូលំទូលាយ ដើម្បីឱ្យប្រជាពលរដ្ឋជួយគាំទ្រផលិតផលក្នុងស្រុក។ បន្ថែមពីនេះ លោកថា រដ្ឋត្រូវត្រួតពិនិត្យអំពីគុណភាពនៃការនាំចូលត្រីពីក្រៅប្រទេសផងដែរ។
វីអូឌី មិនអាចសុំការឆ្លើយតបពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន និងលោក ពុំ សុថា ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល បាននៅឡើយទេ នៅថ្ងៃនេះ៕