តុលាការកំពូលនៃសាលាក្តីខ្មែរក្រហមបានបដិសេធសំណើសុំបញ្ជូនសំណុំរឿង ០០៣ របស់លោក មាស មុត អតីតកម្មាភិបាលខ្មែរក្រហមជាន់ខ្ពស់ទៅជំនុំជម្រះ ក្រោមហេតុផលថា សំណុំរឿង ០០៣ ត្រូវបានបញ្ចប់ ដោយសារគ្មានដីកាបញ្ជូនរឿងទៅជំនុំជម្រះស្ថាពរ និងដែលអាចអនុវត្តបាន។
យោងតាមសេចក្តីប្រកាសព័ត៌មានរបស់អង្គជំនុំជម្រះវិសាមញ្ញក្នុងតុលាការកម្ពុជា កាលពីថ្ងៃទី១៧ ធ្នូ ម្សិលមិញបានឱ្យដឹងថា អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានបដិសេធសំណើរបស់សហព្រះរាជអាជ្ញាអន្តរជាតិ លោកស្រី Brenda J. Hollis សុំបញ្ជូនសំណុំរឿង ០០៣ ប្រឆាំងនឹងលោក មាស មុត ទៅជំនុំជម្រះ។
សេចក្តីសម្រេចរបស់ចៅក្រមនៃអង្គជំនុំជម្រះតុលាការកំពូលនេះ បានសម្រេចដោយសំឡេងជាឯកច្ឆ័ន្ទថា បណ្តឹងសាទុក្ខរបស់សហព្រះរាជអាជ្ញាអន្តរជាតិ ស្តីពីការខកខានរបស់អង្គបុរេជំនុំជម្រះ ក្នុងការបញ្ជូនសំណុំរឿង ០០៣ ទៅជំនុំជម្រះ ដូចបានតម្រូវដោយក្របខណ្ឌគតិយុត្តរបស់ អ.វ.ត.ក គឺមិនអាចទទួលយកបានទេ។
លោកស្រីចៅក្រម Maureen Harding Clark បានធ្វើការសន្និដ្ឋាននៅក្នុងការយល់ឃើញរបស់លោកស្រីថា៖ «សេចក្តីសម្រេចរបស់អង្គបុរេជំនុំជម្រះត្រូវតែបដិសេធចោល ហើយសំណុំរឿង ០០៣ ប្រឆាំងនឹង មាស មុត គប្បីត្រូវបញ្ចប់»។
កាលពីថ្ងៃទី៧ ខែមេសា ឆ្នាំ២០២១ ចៅក្រមអង្គបុរេជំនុំជម្រះនៃអង្គជំនុំជម្រះវិសាមញ្ញក្នុងតុលាការកម្ពុជា មិនអាចស្វែងរកសំឡេងជាឯកច្ឆ័ន្ទ ដើម្បីសម្រេចបញ្ជូនសំណុំរឿងរបស់អតីតកម្មាភិបាលខ្មែរក្រហមលោក មាស មុត ទៅជំនុំជម្រះបាននោះឡើយ។ ជំនួសឱ្យការចេញសេចក្តីសម្រេចពេលនោះ ចៅក្រមអង្គបុរេជំនុំជម្រះជាតិនិងអន្តរជាតិបានចេញសេចក្តីពិចារណារៀងៗខ្លួន ដោយភាគីចៅក្រមជាតិ៣រូប បានបញ្ជាឲ្យតម្កល់សំណុំរឿង០០៣ របស់លោកមាស មុត នៅក្នុងបណ្ណសារ ដែលមានន័យថា ឥតចាត់ការ។
លោក មាស មុត អតីតកម្មាភិបាលជាន់ខ្ពស់នៃរបបខ្មែរក្រហម ដែលបច្ចុប្បន្នមានអាយុ ៨៣ ឆ្នាំ មានស្រុកកំណើតនៅស្រុកឈូក ខេត្តកំពត ត្រូវបានគេដឹងថា លោកធ្លាប់មានតួនាទីជាសមាជិកគណៈមជ្ឈិមបក្ស និងជាមេបញ្ជាការកងទ័ពជើងទឹក១៦៤ ប្រចាំការនៅខេត្តព្រះសីហនុ។ លោកត្រូវបានសហចៅក្រមស៊ើបអង្កេតអន្តរជាតិ ចោទប្រកាន់នៅថ្ងៃទី ៣ ខែមីនា ឆ្នាំ២០១៥ ពីបទឧក្រិដ្ឋកម្មប្រឆាំងមនុស្សជាតិ ការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណែវ និងការរំលោភបំពានក្រមព្រហ្មទណ្ឌឆ្នាំ១៩៥៦។ នៅចុងឆ្នាំ ២០១៨ សហចៅក្រមស៊ើបអង្កេតអន្តរជាតិ បានសម្រេចបញ្ជូនសំណុំរឿងរបស់លោក មាស មុត ទៅជំនុំជម្រះដោយអះអាងថា មានភ័ស្តុតាងគ្រប់គ្រាន់បញ្ជាក់ថា លោក មាស មុត ស្ថិតក្នុងចំណោមជនដែលទទួលខុសត្រូវខ្ពស់បំផុត ក្នុងរបបខ្មែរក្រហម។ ប៉ុន្តែ សហសហចៅក្រមស៊ើបអង្កេតជាតិវិញបានជំទាស់ ដោយយល់ថា លោក មាស មុត មិនស្ថិតនៅក្នុងចំណោមជនត្រូវចោទ និងអ្នកទទួលខុសត្រូវខ្ពស់បំផុតនៃរបបខ្មែរក្រហមនោះទេ។
គិតត្រឹមថ្ងៃសៅរិ៍នេះ នៅមិនទាន់ឃើញមានប្រតិកម្មពីសហព្រះរាជអាជ្ញាអន្តរជាតិនៃសាលាក្តីខ្មែរក្រហមលោកស្រី Brenda J. Hollis នៅឡើយទេ ជុំវិញសេចក្តីសម្រេចរបស់ចៅក្រមតុលាការកំពូលនៃសាលាក្តីខ្មែរក្រហមនេះ៕
