អង្គសន្និបាតគណបក្សប្រជាជនកម្ពុជា បានបោះឆ្នោតជ្រើសតាំងលោក ទៀ បាញ់ និងលោកស្រី ម៉ែន សំអន ជាអនុប្រធានគណបក្ស។
ការជ្រើសតាំងមន្ត្រីទាំងពីររូបនេះបានធ្វើឡើងនៅក្នុងអង្គសន្និបាតគណៈកម្មាធិការកណ្ដាល លើកទី៤៣ អាណត្តិទី៥ របស់គណបក្សប្រជាជនកម្ពុជា នាថ្ងៃទី២៤ ខែធ្នូ ឆ្នាំ២០២១។
យោងតាមគេហទំព័រគណបក្សប្រជាជនកម្ពុជា បានឱ្យដឹងថា លោក ទៀ បាញ់ និងលោកស្រី ម៉ែន សំអន ដែលជាសមាជិកអចិន្រ្តៃយ៍នៃគណបក្សប្រជាជនកម្ពុជា និងមានតំណែងជាឧបនាយករដ្ឋមន្រ្តីក្នុងជួររដ្ឋាភិបាល ត្រូវបានអង្គសន្និបាតបក្សបោះឆ្នោតជ្រើសតាំងជាអនុប្រធានគណបក្សប្រជាជនកម្ពុជា។
រហូតមកដល់ពេលនេះ គណបក្សប្រជាជនកម្ពុជាមានលោកនាយករដ្ឋមន្ត្រី ហ៊ុន សែន ជាប្រធានគណបក្ស, លោក ហេង សំរិន ប្រធានកិត្តិយស និងអនុប្រធានចំនួន៤រូប ក្នុងនោះមានលោក សាយ ឈុំ ប្រធានព្រឹទ្ធសភា, លោក ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ, លោក ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងលោកស្រី ម៉ែន សំអន រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច។
គណបក្សប្រជាជនកម្ពុជា ជាគណបក្សធំជាងគេនៅកម្ពុជា ដែលបានកាន់អំណាច៦អាណត្តិមកនេះ មានសមាជិកគណៈកម្មាធិការកណ្ដាលចំនួន៨៣៧នាក់ ក្នុងនោះមានសមាជិកគណៈកម្មាធិការអចិន្រ្តៃយ៍ចំនួន៣៧នាក់ផងដែរ៕
