សាលាដំបូងរាជធានីភ្នំពេញសម្រេចឃុំខ្លួនប្រធានគណបក្សខ្មែរក្រោក និងគូកនចំនួន៣នាក់ ពាក់ព័ន្ធករណីប្លន់ផ្ទះអ្នកលក់ឡេតាមអនឡាញម្នាក់កាលពីចុងសប្តាហ៍មុន ក្នុងខណ្ឌពោធិ៍សែនជ័យ រាជធានីភ្នំពេញ។
ចៅក្រមស៊ើបសួរ នៃសាលាដំបូងរាជធានីភ្នំពេញ កាលពីថ្ងៃទី ២៥ ខែធ្នូ ឆ្នាំ២០២១ម្សិលមិញនេះ បានចេញដីកាបង្គាប់ឱ្យឃុំខ្លួនជនត្រូវចោទចំនួន៤នាក់ រួមមាន ឈ្មោះ សុខ សុវណ្ណ វឌ្ឍនាសាប៊ុង ហៅ វិល្លាម គ័ង ប្រធានគណបក្សខ្មែរក្រោក អ្នកស្រី សុវណ្ណ ស្រីសុរិយោព័ណ ដែលត្រូវជាប្រពន្ធ វីល្លាមគ័ង ,ឈ្មោះ សុវណ្ណ រ៉ានុត និងឈ្មោះ អោ រ៉ាម៉ន អ្នកបើករថយន្ត។ នេះបើយោងតាមគេហទំព័រសារព័ត៌មានដើមអំពិលដែលចុះផ្សាយកាលពីម្សិលមិញ។
ប្រភពដដែលបន្តថា ជនត្រូវចោទទាំង៤នាក់នេះ ត្រូវបានតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃសរពាក់ព័ន្ធនឹងសំណុំរឿងប្លន់ផ្ទះអ្នកលក់ឡេតាមអនឡាញមួយរូប ឈ្មោះ អ៊ាន សៀវម៉ី មានស្រុកកំណើត នៅខេត្តព្រះត្រពាំង កម្ពុជាក្រោម មានអាស័យដ្ឋាន ស្នាក់នៅបុរី ប៉េង ហួត ផ្ទះលេខ៨ ផ្លូវលេខ៣ សង្កាត់ចក្រអង្រែលើ ខណ្ឌមានជ័យ រាជធានីភ្នំពេញ កាលពីថ្ងៃទី១៩ ខែធ្នូ ឆ្នាំ២០២១ ស្ថិតនៅក្នុងសង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។ មនុស្សទាំង៤នាក់ ត្រូវបានចាប់ខ្លួនកាលពីថ្ងៃទី២០ខែធ្នូ ដោយពួកគេជាប់ចោទពីបទលួចមានស្ថានទម្ងន់ទោស, បទសមគំនិតក្នុងអំពើលួចមានស្ថានទម្ងន់ទោស, បទកាន់កាប់អាវុធដោយគ្មានការអនុញ្ញាត និងបទក្លែងឯកសារសាធារណៈ ដែលមានចែងក្នុងមាត្រា ២៩, មាត្រា ៣៥៣, មាត្រា ៣៥៧, មាត្រា ៤៩០ និងមាត្រា ៦២៩ នៃក្រមព្រហ្មទណ្ឌ៕
