មន្រ្តីដែលស្និទ្ធនឹងអតីតប្រធានស្ដីទីគណបក្សសង្រ្គោះជាតិ បានបដិសេធការស្នើសុំភ្នាល់ក្នុងជម្លោះនយោបាយពីសំណាក់កូនប្រុសច្បងលោកនាយករដ្ឋមន្រ្តី ហ៊ុន សែន ជាប់ទាក់ទិននឹងសញ្ញាបត្រដែលលោក ហ៊ុន ម៉ាណែត ហៅថា «ជាការមាក់ងាយកម្រិតនៃការសិក្សារបស់ខ្លួន»។
អតីតតំណាងរាស្រ្តគណបក្សប្រឆាំងមណ្ឌលខេត្តសៀមរាប លោក ម៉ែន សុថាវរិន្រ្ទ បានប្រាប់ វីអូឌី នៅថ្ងៃអង្គារនេះថា លោកមិនឯកភាពដូចការលើកឡើងរបស់លោក ហ៊ុន ម៉ាណែត នេះឡើយ។ លោកចាត់ទុកការស្នើភ្នាល់គ្នាពីសំណាក់កូនប្រុសច្បងរបស់លោក ហ៊ុន សែន នេះ ថាវាគ្រាន់តែជារបៀបភ្នាល់តាមវិធីកូនក្មេងឬឧបាយនៃអ្នកញៀនល្បែងតែប៉ុណ្ណោះ។
បើដូចការចង់បាននេះមែន លោក ម៉ែន សុថាវរិន្រ្ទ ទាមទារឱ្យរដ្ឋាភិបាលបើកផ្លូវឱ្យអ្នកនយោបាយ នៃអតីតគណបក្សសង្រ្គោះជាតិបានវិលចូលប្រទេសវិញ ហើយជ្រើសរើសមធ្យោបាយនៃការប្រកួតគ្នា តាមការបោះឆ្នោត។
លោកបន្តថា៖ «ហើយបើនិយាយពាក្យថា “ភ្នាល់” ខ្ញុំអត់ចង់និយាយទេ! ឥលូវនេះ យើងប្រកួតប្រជែងនៅក្នុងនាមជាបេក្ខជននាយករដ្ឋមន្រ្តីទៅ។ គណបក្សប្រជាជនកម្ពុជាគេជ្រើសរើសយកលោក ហ៊ុន ម៉ាណែត គេជ្រើសរើសយកគាត់ទៅ។ ចំណែកខាងគណបក្សសង្រ្គោះជាតិ យើងជ្រើសយកលោក សម រង្ស៊ី ជាបេក្ខភាពនាយករដ្ឋមន្រ្តី។ ដូច្នេះ យើងប្រកួតគ្នាតាមរបៀបនេះវិញល្អ ហើយឱ្យលោក សម រង្ស៊ី ចូល[ប្រទេស]ទៅ ហើយអាហ្នឹងប្រកួតប្រជែងតាមប្រជាធិបតេយ្យតែម្ដង។ ហើយនេះគឺជាប្រជាធិបតេយ្យសេរីពហុបក្សមែនទែន»។
បើទោះជាកន្លងទៅ មន្រ្តីរដ្ឋាភិបាលធ្លាប់អះអាងពីភាពស្អាតស្អំ ថាខ្លួនមិនដែលបានហាមឃាត់ការវិលចូលស្រុកវិញរបស់មនុស្សមួយចំនួននៃអតីតគណបក្សប្រឆាំងក្ដី ក៏ពួកគេមិនអាចវិលចូលកម្ពុជាបានដែរ ដោយសារតែជើងហោះហើរនិងច្រកនៅតាមព្រំដែនត្រូវបានរដ្ឋាភិបាលបិទជិត។
ការឆ្លើយតបនេះធ្វើឡើងបន្ទាប់ពីកូនប្រុសច្បងលោកនាយករដ្ឋមន្រ្តី ហ៊ុន សែន បានបបួលប្រធានស្ដីទីនៃអតីតគណបក្សសង្រ្គោះជាតិ “ស្បថស្បែ” ដែលលោកហៅថា ជាការឆ្លើយតបមួយក្នុងការជម្រះមន្ទិលសង្ស័យទាក់ទងសញ្ញាបត្របបណ្ឌិតយោធារបស់ខ្លួន។
នេះជាលើកទី១ហើយដែលលោក ហ៊ុន ម៉ាណែត ឌឺដងឱ្យលោក សម រង្ស៊ី ក្រោយពេលដែលលោកទទួលបានសំឡេងគាំទ្រសម្រាប់តំណែងជានាយករដ្ឋមន្រ្តីបន្តវេននាថ្ងៃអនាគត។
តាមរយៈសារនយោបាយដែលបង្ហោះនៅក្នុងបណ្ដាញសង្គមហ្វេសប៊ុក នៅថ្ងៃអង្គារនេះ លោក ហ៊ុន ម៉ាណែត បានបបួលលោក សម រង្ស៊ី ភ្នាល់គ្នាចាញ់ឈ្នះតាមរូបភាពបើកចំហ។ បើតាមលោក ហ៊ុន ម៉ាណែត ការបន្ទាបសញ្ញាបត្ររបស់លោកពីសំណាក់លោក សម រង្ស៊ី ថាជាសញ្ញាបត្រកម្រិត២ ឬជាសញ្ញាបត្រយោគយល់នោះ វាជាការមាក់ងាយដែលមិនអាចទទួលយកបានឡើយ។
សម្រាប់ល្បែងនយោបាយដែលគេមើលឃើញថា លោក ហ៊ុន ម៉ាណែត ហាក់ដើរមិនខុសពីគន្លងឪពុករបស់លោកប៉ុន្មាននោះ បានបង្ហាញតាមរយៈលក្ខខណ្ឌនៃការភ្នាល់គ្នានេះ។
បើតាមលោក ហ៊ុន ម៉ាណែត លក្ខខណ្ឌដែលលោកកំណត់ជាសាច់ការនេះ គឺប្រសិនបើលោកចាញ់ការភ្នាល់នោះ លោកនឹងលាលែងពីបេក្ខភាពនាយករដ្ឋមន្រ្តីរបស់គណបក្សប្រជាជនកម្ពុជា។ ប៉ុន្តែប្រសិនបើលោកឈ្នះការភ្នាល់វិញ គឺលោក សម រង្ស៊ី ត្រូវឈប់ធ្វើនយោបាយចាប់ពីពេលនេះតទៅ។ ដើម្បីជាសក្ខីកម្ម លោក ហ៊ុន ម៉ាណែត ថែមទាំងចិត្តសឿងមួយកម្រិតទៀត ដោយជំរុញឱ្យលោក សម រង្ស៊ី ហ៊ានស្នើទៅសាកលវិទ្យាល័យទាំង៣ដែលខ្លួនធ្លាប់រៀន ចេញលិខិតបញ្ជាក់ពីកម្រិតនៃការសិក្សារបស់លោកផង។
ជាងនេះទៀត ដើម្បីបង្ហាញពីតម្លាភាព លោកនឹងមិនខ្លាចឱ្យបណ្ដាញព័ត៌មានធំៗចុះផ្សព្វផ្សាយនៅចំពោះមុខនៃព្រឹត្តិការណ៍ដ៏សំខាន់នេះដែរ។
នាយកប្រតិបត្តិ នៃអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ យល់ឃើញថា មកដល់ពេលនេះទៅហើយ អ្នកនយោបាយខ្មែរនៅតែមិនទាន់មានភាពចាស់ទុំនៅឡើយ។
លោកបន្តថា សញ្ញាបត្រវាគ្រាន់តែក្រដាសសមួយសន្លឹកដែលបញ្ជាក់ពីកម្រិតនៃការសិក្សាប៉ុណ្ណោះ ប៉ុន្តែតម្លៃពិតរបស់អ្នកសិក្សា គឺនៅត្រង់ការយល់ដឹងនិងផ្ដល់តម្លៃឱ្យគ្នាទៅវិញទៅមក។
បើតាមលោកបណ្ឌិត សេក សុជាតិ ដើម្បីឱ្យកម្ពុជាមានភាពជឿនលឿនទាំងផ្នែកប្រជាធិបតេយ្យនិងការគោរពសិទ្ធិមនុស្ស អ្នកនយោបាយគួរធ្វើខ្លួនជាគំរូល្អសម្រាប់មនុស្សជំនាន់ក្រោយ ដោយមិនត្រូវយកការភ្នាល់ក្នុងជម្លោះបុគ្គល ដើម្បីយកចាញ់ឈ្នះសម្រាប់ល្បែងនយោបាយនោះទេ។
លោកបន្តថា៖ «វិធីនៅក្នុងការដោះស្រាយ អ្នកនយោបាយគួរតែផ្លាស់ប្ដូរនូវផ្នត់គំនិតរបស់ខ្លួនជាមុន ដើម្បី[បង្ហាញ]ទៅសាធារណជនឬមហាជនឱ្យយល់អំពីគុណតម្លៃនៃអ្នកនយោបាយ គុណតម្លៃនៃបម្រើជាតិ និងបម្រើសង្គម។ អ្នកនយោបាយគួរលះបង់ចោលនូវផ្នត់គំនិតដែលអវិជ្ជមាន មិនត្រូវប្រើប្រាស់កម្លាំងបាយ ដែលជាមូលហេតុឬជាដើមចមនៃការឈានទៅដណ្ដើមយកមុខតំណែងធំនោះទេ»។
កាលពីថ្ងៃទី៣០ ខែកញ្ញា ឆ្នាំ២០១៩ លោក សម រង្ស៊ី ធ្លាប់បានទិតៀនទៅលើសញ្ញាបត្របណ្ឌិតយោធារបស់លោក ហ៊ុន ម៉ាណែត ថាវាគ្រាន់តែជាសញ្ញាបត្រក្លែងក្លាយ ឬជាសញ្ញាបត្រប្រភេទ២ ដែលមានកម្រិតទាបជាងស្ដង់ដារធម្មតានៅប្រទេសគេ។
សម្រាប់លោក ហ៊ុន ម៉ាណែត ដែលទើបទទួលបានការផ្ដល់សេចក្ដីទុកចិត្តពីគណៈកម្មាធិការកណ្តាលនៃគណបក្សប្រជាជនកម្ពុជា កាលពីថ្ងៃទី២៤ ខែធ្នូ បានចំអកឱ្យលោក សម រង្ស៊ី ថាការលើកឡើងនេះប្រហែលអតីតមេបក្សប្រឆាំងចាស់វស្សារូបនេះ មិនបោះបង់ការភ្នាល់ដូចលើកមុនទៀតឡើយ។ ចំណែកលោក ម៉ែន សុថាវរិន្ទ្រ វិញ បញ្ជាក់ថា អតីតគណបក្សប្រឆាំងមិនចាប់អារម្មណ៍របៀបនៃការភ្នាល់បែបជាបុគ្គលនេះទេ ហើយក៏មិនចូលរួមក្នុងការភ្នាល់នេះដែរ៕
