លោកនាយករដ្ឋមន្ដ្រី ហ៊ុន សែន ស្នើអគ្គិសនីកម្ពុជាឱ្យពិនិត្យលទ្ធភាពលុបបំណុលដែលក្រសួងការពារជាតិជំពាក់ថ្លៃប្រើប្រាស់អគ្គិសនីជាង២លានដុល្លារ។
ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាលនិងសាលប្រជុំទីស្ដីការក្រសួងការពារជាតិថ្មីនាថ្ងៃទី២៩ ខែធ្នូ ឆ្នាំ២០២១នេះ លោក ហ៊ុន សែន ថ្លែងថា អគ្គិសនីកម្ពុជាអាចមានលទ្ធភាពលុបចោលបំណុលជាង៩ពាន់លានរៀល ស្មើនឹងជាង២លានដុល្លារសហរដ្ឋអាមេរិក ដែលក្រសួងការពារជាតិជំពាក់ទាំងស្រុងបានឬយ៉ាងណា។ លើសពីនេះ លោកថា បើសិនមិនអាចលុបទាំងស្រុងនោះ លោកថា អគ្គិសនីកម្ពុជាក៏អាចជួយលុបពាក់កណ្ដាល ឬ៧០ភាគរយ ផងដែរ។
លោកថា៖ «តើអគ្គិសនីកម្ពុជាអាចបំពេញនិងលុបបំណុលបានប៉ុន្មាន? ហើយក្រៅពីហ្នឹង ក្រសួងសេដ្ឋកិច្ច និងហរិញ្ញវត្ថុ អាចចេញប៉ុន្មាន? មានន័យថាអាចចែកគ្នាចេញ ម្ខាងក្រុមហ៊ុនអគ្គិសនីកម្ពុជាដែលជាម្ចាស់បំណុល ហើយយើងជាកូនបំណុលអគ្គិសនីកម្ពុជា។ តើអគ្គិសនីកម្ពុជាមានលទ្ធភាពលុបបំណុលជាង៩ពាន់លានរៀល ស្មើនឹងជាង២លានដុល្លារនេះទាំងស្រុង ឬក៏អាចជួយលុបពាក់កណ្ដាល ឬ៧០ភាគរយ? ហើយក្រៅពីនោះ បំពេញដោយក្រសួងសេដ្ឋកិច្ច និងហរិញ្ញវត្ថុ»។
ការប្រកាសឱ្យអគ្គិសនីកម្ពុជាពិនិត្យលុបបំណុលនេះ ធ្វើឡើងបន្ទាប់ពីរដ្ឋមន្ដ្រីក្រសួងការពារជាតិ លោក ទៀ បាញ់ បានស្នើទៅកាន់លោក ហ៊ុន សែន ឱ្យលុបបំណុលថ្លៃអគ្គិសនីដែលក្រសួងនេះ បានជំពាក់ចំនួន៩ពាន់លានរៀល ស្មើនឹងជាង២លានដុល្លារ។ ការស្នើរបស់លោក ទៀ បាញ់ ក្រោមហេតុផលថា ការប្រើប្រាស់អគ្គិសនីក្នុងរយៈពេលប៉ុន្មានឆ្នាំចុងក្រោយនេះ ដោយសារតែក្រសួងមានតម្រូវការច្រើន ស្របទៅតាមការអភិវឌ្ឍនិងទំនើបកម្មរបស់កងកម្លាំងយោធា៕
