ពលរដ្ឋមានជម្លោះដីធ្លី អះអាងថា អ្នកភូមិជាង៣០នាក់ នៅសង្កាត់កូនក្រៀល ក្រុងសំរោង ខេត្តឧត្ដរមានជ័យ បានប្រមូលផ្ដុំគ្នានៅមុខសាលាដំបូងខេត្តនៅព្រឹកថ្ងៃពុធនេះ ខណៈតុលាការបានកោះហៅតំណាងពលរដ្ឋ៥នាក់ឱ្យចូលបំភ្លឺ។
កាលពីថ្ងៃទី៨ ខែធ្នូ ឆ្នាំ២០២១ ចៅក្រមស៊ើបសួរសាលាដំបូងខេត្តឧត្ដរមានជ័យ លោក យិន វិសិដ្ឋ បានចេញដីកាលើកទី៣ បង្គាប់ឱ្យតំណាងពលរដ្ឋមួយក្រុមមានគ្នា១០នាក់ រស់នៅសង្កាត់កូនក្រៀល ចូលទៅបំភ្លឺនៅតុលាការ នៅថ្ងៃទី២៨ និងទី២៩ ខែធ្នូនេះ ដើម្បីសាកសួរពីដំណើររឿង «កាប់រានដីព្រៃ ឈូសឆាយដីព្រៃ និងហ៊ុមព័ទ្ធកាន់កាប់ដីព្រៃគ្មានលិខិតអនុញ្ញាត» ដែលប្រព្រឹត្តកាលពីដើមឆ្នាំ២០២១ ស្ថិតនៅភូមិតាម៉ាន សង្កាត់កូនក្រៀល។
លោក ឃ្លិប ឡុញ ដែលបានចូលរួមប្រមូលផ្ដុំគ្នានិងគាំទ្រតំណាងរបស់ខ្លួន ប្រាប់ វីអូឌី ថាកាលពីម្សិលមិញ តុលាការបានសាកសួរលើតំណាងពលរដ្ឋ៥នាក់ ហើយនៅថ្ងៃពុធនេះ តុលាការបន្តសាកសួរលើតំណាង៥នាក់ទៀត។ លោកឱ្យដឹងថា ក្រោយសាកសួរលើតំណាង៥នាក់កាលពីម្សិលមិញនោះ តុលាការបានសម្រេចឱ្យមកផ្ទះវិញដោយមិនមានការឃុំខ្លួននោះទេ។
ពលរដ្ឋរូបនេះនិយាយថា អ្នកភូមិនាំគ្នាមកគាំទ្រតំណាង ដោយសារពួកគាត់យល់ឃើញថា តំណាងពលរដ្ឋទាំង១០នាក់នោះពុំមានកំហុសដូចការចោទប្រកាន់ឡើយ។ លោកបន្តថា ដីធ្លីដែលពួកគាត់កំពុងរស់នៅនិងអាស្រ័យផលនោះ គឺពួកគាត់បានចូលទៅកាន់កាប់តាំងពីឆ្នាំ១៩៩៨ រហូតមកដល់បច្ចុប្បន្ន។ ហើយអ្នកភូមិបានរងបណ្ដឹងថា បានឈូសឆាយដីព្រៃនិងហ៊ុមព័ទ្ធកាន់កាប់ដីព្រៃគ្មានលិខិតអនុញ្ញាត ដើមឆ្នាំ២០២១នេះ ក្រោយពីក្រុមហ៊ុនមួយឈ្មោះ សាន ហ៊ាង ចូលមកវិនិយោគនៅតំបន់នោះ។
កាលពីថ្ងៃទី១៣ ខែកក្កដា ឆ្នាំ២០២១ ក្រសួងកសិកម្ម រុក្ខាប្រមាញ់ និងនេសាទ បានសម្រេចអនុញ្ញាតឱ្យក្រុមហ៊ុន «សាន ហ៊ាង (កម្ពុជា) អាហរ័ណ នីហរ័ណ ឯ.ក» ធ្វើការឈូសឆាយ និងប្រមូលផលអនុផលព្រៃឈើក្នុងអនុតំបន់២ និងឈូសឆាយផ្ទៃដីទំហំ១ ៥០០ហិកតា ស្ថិតក្នុងស្រុកសំរោង ខេត្តឧត្ដរមានជ័យ។
ប៉ុន្តែគម្រោងអភិវឌ្ឍន៍របស់ក្រុមហ៊ុន សាន ហ៊ាង នេះត្រូវបានសង្គមស៊ីវិលប៉ាន់ប្រមាណថា បានធ្វើឱ្យប៉ះពាល់ប្រជាពលរដ្ឋចំនួន២ស្រុកនៃខេត្តឧត្ដរមានជ័យ ហើយមានប្រជាពលរដ្ឋខ្ទង់ពាន់គ្រួសារ ដែលបានរងផលប៉ះពាល់ពីគម្រោងមួយនេះ៕