អាជ្ញាធរប្រយុទ្ធប្រឆាំងគ្រឿងញៀនប្តេជ្ញាថា នៅឆ្នាំ២០២២នេះ នឹងទប់ស្កាត់បទល្មើសគ្រឿងញៀនឱ្យបានថមថយជាងឆ្នាំមុនៗ ដើម្បីការពារសន្តិសុខសុវត្ថិភាពជូនប្រជាពលរដ្ឋកុំឱ្យមានការភ័យខ្លាច ខណៈកម្ពុជាជាប្រទេសដែលងាយរងគ្រោះ ដោយសារជនល្មើសលួចនាំគ្រឿងញៀនចូលឆ្លងកាត់ទៅលក់នៅក្រៅប្រទេស។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ បានអះអាងថា ការបង្ក្រាបទល្មើសគ្រឿងញៀនកាលពីឆ្នាំ២០២១ សមត្ថកិច្ចចាប់ជនល្មើសបាន១២ ០០០នាក់ ក្នុងនោះ៣០%ជាអ្នកប្រើប្រាស់ និង៧០%ជាអ្នកប្រព្រឹត្តបទល្មើសគ្រឿងញៀនដូចជា ជួញដូរ រក្សាទុក និងដាំដុះ ខណៈគ្រឿងញៀនសមត្ថកិច្ចរឹបអូសបានប្រហែលជា ៤តោនកន្លះ។ ចំនួនគ្រឿងញៀនដែលបង្ក្រាបបាននៅឆ្នាំ២០២១ បើធៀបកាលពីឆ្នាំ២០២០ មានការកើនឡើងប្រហែល៣០%។
លោក ម៉ក់ ជីតូ មានប្រសាសន៍ថា អាជ្ញាធរប្រយុទ្ធប្រឆាំងគ្រឿងញៀនប្តេជ្ញាថា សមត្ថកិច្ចជំនាញនិងសហការគ្នា ពង្រឹងការអនុវត្តច្បាប់លើជនល្មើស ដើម្បីទប់ស្កាត់បទល្មើសគ្រឿងញៀនឱ្យបានការថយចុះជាងឆ្នាំមុនៗ។
លោកមានប្រសាសន៍ថា៖ «យើងជាប្រទេសរងគ្រោះ ដោយសារជាប្រទេសដែលគេនាំចូលឆ្លងកាត់ ហើយជាតំបន់ត្រីកោណមាសផង ឆ្លងកាត់យើងហើយបានជនល្មើសដឹកយកទៅលក់នៅប្រទេសទីបី »។
លោកមានប្រសាសន៍បន្ថែមថា៖ «ឆ្នាំ២០២២នេះ យើងនឹងបង្ក្រាបមិនឱ្យមានការនាំចូល និងទី២បើនាំចូលមក យើងនិងបង្ក្រាបនៅលើផ្ទៃប្រទេស និងទីបីយើងទាក់ទងទៅបណ្តាប្រទេសផ្សេងៗដូចជា ខាងប៉ូលិស អាំងទែប៉ូល និងបណ្តាប្រទេសជាមិត្ត ដើម្បីតាមចាប់ជនល្មើសមកផ្តន្ទាទោសតាមច្បាប់ ទើបលុបបំបាត់បទល្មើសនេះបាន »។
ប្រធានសមាគមសង្រ្គោះជនរងគ្រោះដោយគ្រឿងញៀនកម្ពុជា DARAC លោក មាស សុវណ្ណ ឱ្យដឹងថា ការបង្ក្រាបបទល្មើសគ្រឿងញៀនឱ្យមានប្រសិទ្ធភាពខ្ពស់បាន លុះត្រាតែអាជ្ញាធរពាក់ព័ន្ធអាចចាប់មេខ្លោងធំៗយកមកផ្តន្ទាទោសតាមច្បាប់ ដោយមិនប្រកាន់បក្ខពួកជាដើម ។
លោកមានប្រសាសន៍ថា៖ «បើយើងមានវិធានការតឹងរឹងទៅលើជនល្មើស បើសិនជាស្វែងរកចាប់មេខ្លោងឱ្យបានកាន់តែច្រើន វាអាចថយចុះបាន។ បើថាចាប់បានតែអ្នកប្រើប្រាស់តូចតាចទេ ហើយមេខ្លោងចាប់មិនបាន អានឹងវាមិនអាចថយចុះបានទេ»។
នាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី សង្កេតឃើញថា បទល្មើសគ្រឿងញៀននៅតែមានការកើនឡើងជារៀងរាល់ឆ្នាំ អាចដោយសារអាជ្ញាធរពាក់ព័ន្ធគប់គិតគ្នាប្រព្រឹត្តអំពើពុករលួយ។ ករណីនេះលោកថា បើអាជ្ញាធរពាក់ព័ន្ធមិនលុបបំបាត់អំពើពុករលួយ និងពង្រឹងការអនុវត្តច្បាប់ឱ្យមានតម្លាភាពទេ នោះបទល្មើសគ្រឿងញៀននៅតែបន្តកើតមាន ហើយមិនមានការថមថយនោះទេ ។
លោកមានប្រសាសន៍ថា៖ «បើចាប់បានជនល្មើស កុំឱ្យសូកលុយហើយរួចខ្លួន ហើយយើងដោះស្រាយបញ្ហាទាំងនោះជាប្រព័ន្ធជាពិសេសធ្វើការប្រទាក់ក្រឡាគ្នារវាងអន្តរក្រសួង អន្តរស្ថាប័ន ដើម្បីឈានដល់ការលុបបំបាត់អំពើពុករលួយរឿងគ្រឿងញៀនក្នុងទ្រង់ទ្រាយធំនោះបាន»។
នៅក្នុងពិធីសម្ពោធដាក់ឱ្យប្រើប្រាស់មណ្ឌលនីតិសម្បទានៅក្នុងខេត្តកណ្ដាល កាលពីថ្ងៃទី២៨ ខែធ្នូ ឆ្នាំ២០២១ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង សម្ដែងការព្រួយបារម្ភចំពោះស្ថានភាពកុមារដែលកាន់តែមានចំនួនច្រើនកំពុងពាក់ព័ន្ធគ្រឿងញៀន។
នៅក្នុងពិធីសម្ពោធមណ្ឌលនីតិសម្បទានោះ លោក ស ខេង បង្ហាញរបាយការណ៍ថា ចំនួនអនីតិជនដែលកំពុងជាប់ពន្ធនាគារនៅទូទាំងប្រទេសមានចំនួន១ ៤២២នាក់ ក្នុងនោះ អនីតិជនដែលពាក់ព័ន្ធនឹងគ្រឿងញៀនមានចំនួន៤៥២នាក់ ដែលស្មើនឹង៣៨,៨ភាគរយ។
លោកស ខេង បញ្ជាក់ថា ចំនួននេះ គឺជាក្ដីបារម្ភធំមួយរបស់កម្ពុជា ហើយចំនួនអ្នកប្រើប្រាស់គ្រឿងញៀនជាក់ស្ដែងច្រើនជាងរបាយការណ៍នេះទៅទៀត៕
