បុគ្គលិកក្រុមហ៊ុនកាស៊ីណូណាហ្គាវើលដ៍ (Naga World) មួយចំនួនដែលកំពុងធ្វើកូដកម្ម បានទាមទារឱ្យមានការដោះលែងថ្នាក់ដឹកនាំសហជីព មុនហៅពួកគេជួបប្រជុំដើម្បីផ្ទៀងផ្ទាត់ការទូទាត់ប្រាក់បំណាច់បញ្ចប់កិច្ចសន្យាការងារ។
កាលពីថ្ងៃទី៦ ខែមករានេះ ក្រសួងការងារ និងបណ្ដុះបណ្ដាលវិជ្ជាជីវៈ បានចេញលិខិតជាថ្មីទៀតឱ្យតំណាងឬបុគ្គលិករបស់ក្រុមហ៊ុនណាហ្គាវើលដ៍ ចូលរួមប្រជុំពិនិត្យផ្ទៀងផ្ទាត់ឡើងវិញនូវការទូទាត់ប្រាក់បំណាច់បញ្ចប់កិច្ចសន្យាការងារ ចាប់ពីថ្ងៃទី៧ ខែមករា ឆ្នាំ២០២២ ដើម្បីដោះស្រាយបញ្ចប់វិវាទការងារនៅក្រុមហ៊ុនល្បែងមួយនេះ ប៉ុន្តែកូដករមួយចំនួនប្រកាន់ជំហរថា ពួកគេមិនជួបប្រជុំជាមួយក្រសួងនោះទេ ប្រសិនបើថ្នាក់ដឹកនាំសហជីពមិនត្រូវបានដោះលែង។
កូដករកាស៊ីណូណាហ្គាវើលដ៍ម្នាក់ អ្នកស្រី ឡុច រំដួល ប្រាប់ វីអូឌី នៅថ្ងៃសុក្រនេះថា ក្រុមកូដករមិនអាចចូលទៅជួបចរចាតាមការអំពាវនាវរបស់ក្រសួងការងារបានទេ ដរាបណាថ្នាក់ដឹកនាំសហជីព៨នាក់មិនត្រូវបានដោះលែងឱ្យមានសេរីភាពវិញ។
អ្នកស្រីបន្តថា ពួកគេបានផ្ដល់សិទ្ធិឱ្យតំណាងសហជីពជាអ្នកទទួលខុសត្រូវ និងចរចាលើការដោះស្រាយរឿងវិវាទការងារនៅកាស៊ីណូណាហ្គាវើលដ៍នេះរួចទៅហើយ។ អ្នកស្រីថា តំណាងសហជីពមានតួនាទីសំខាន់ណាស់ ដោយសារពួកគេយល់ដឹងច្បាស់ពីនីតិវិធីនិងផ្លូវច្បាប់ក្នុងការចរចារកដំណោះស្រាយដែលអាចទទួលបានយុត្តិធម៌។
អ្នកស្រីបន្ថែមថា៖ «យើងមានតំណាងសហជីពរបស់យើងសម្រេចការចរចារកដំណោះស្រាយ។ ឥលូវគេចាប់តំណាងពួកខ្ញុំទៅដាក់គុកអស់ហើយ អ៊ីចឹងឱ្យពួកខ្ញុំទៅជួបចរចាហ្នឹងជួបរបៀបយ៉ាងម៉េច? អ៊ីចឹងបើចង់មានការអី ត្រូវដោះលែងតំណាងខ្ញុំមកវិញ ដើម្បីឱ្យពួកគាត់មកចរចា ហើយហៅភាគីក្រុមហ៊ុនមកចរចាដោះស្រាយឱ្យវាមានតម្លាភាព។ បើក្រសួងការងារនៅតែហៅឱ្យចរចា មានតែឱ្យគាត់ទៅចរចាជាមួយតំណាងខ្ញុំនៅព្រៃស»។
កូដករកាស៊ីណូណាហ្គាវើលដ៍ម្នាក់ទៀត អ្នកស្រី ហ៊ន ភារ៉ា និយាយថា រហូតមកដល់ពេលនេះ ពួកគេបានតវ៉ាទាមទារលក្ខខណ្ឌបន្ថែមទៀត គឺទាមទារឱ្យមានការដោះលែងតំណាងសហជីពដែលឃុំខ្លួន បុគ្គលិកជាង៣០០នាក់ ត្រលប់ចូលធ្វើការងារវិញ ដោះស្រាយសំណងស្របតាមច្បាប់ជូនបុគ្គលិកដែលយល់ព្រមលាឈប់ និងលក្ខខណ្ឌផ្សេងៗទៀត។
អ្នកស្រីបន្ថែមថា៖ «ពីព្រោះពួកខ្ញុំត្រូវការសហជីព។ សហជីពបានជួយការពារសិទ្ធិនិងផលប្រយោជន៍ជូនពួកខ្ញុំស្របតាមច្បាប់ អ៊ីចឹងហើយបានជាពួកយើងទាមទារឱ្យមានការដោះលែងតំណាងសហជីពមកវិញ ហើយឱ្យពួកគាត់ជាអ្នកតំណាងចូលតុចរចាជាមួយក្រសួងការងារ និងភាគីក្រុមហ៊ុន»។
វីអូឌី មិនអាចសុំការបញ្ជាក់ពីអ្នកនាំពាក្យក្រសួងការងារ លោក ហេង សួរ បានទេ នៅថ្ងៃនេះ។
តំណាងសហភាពសហជីព សហព័ន្ធសហជីព និងសមាគមមួយចំនួន ដែលធ្វើការងារផ្នែកវិស័យការងារនៅកម្ពុជា បានប្រកាសជំហរនៅថ្ងៃសុក្រនេះថា ពួកគេនឹងសាមគ្គីគ្នាចូលរួមគាំទ្រ និងធ្វើយុទ្ធនាការទាមទារឱ្យមានការដោះលែងដោយឥតលក្ខខណ្ឌនូវថ្នាក់ដឹកនាំ សកម្មជន នៃសហជីពទ្រទ្រង់សិទ្ធិការងារប្រចាំក្រុមហ៊ុនណាហ្គាវើលដ៍ចំនួន៨នាក់ និងជំរុញឱ្យក្រុមហ៊ុនល្បែងមួយនេះ ទទួលយកបុគ្គលិក៣៦៥នាក់ចូលធ្វើការងារវិញផងដែរ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក ឃុន ថារ៉ូ យល់ថា ការដែលក្រុមកូដករមិនព្រមទៅតាមការអំពាវនាវរបស់ក្រសួងការងារនេះ ជារឿងត្រឹមត្រូវ ពីព្រោះក្រុមកូដករបានផ្ដល់សិទ្ធិឱ្យតំណាងសហជីពជាអ្នកដោះស្រាយដែលធ្វើឡើងទៅតាមផ្លូវច្បាប់ត្រឹមត្រូវ។
លោកបន្ថែមថា៖ «អ៊ីចឹងបើយើងនិយាយពីច្បាប់ គឺពួកគាត់ [តំណាងសហជីពដែលជាប់ឃុំ] មានសិទ្ធិស្របច្បាប់ក្នុងភាពជាតំណាង ដល់ពេលចាប់ពួកគាត់អ៊ីចឹង មិនដឹងមានអ្នកណាជាអ្នកដោះស្រាយនិងមានសិទ្ធិសម្រេចចិត្តដែរ។ ហើយក្រុមអ្នកតវ៉ាក៏គ្មានសិទ្ធិសម្រេចចិត្តដែរ ពីព្រោះគាត់បានផ្ដល់សេចក្ដីទុកចិត្តទៅតាមសហជីព ហើយអាហ្នឹងជានីតិវិធីផ្លូវច្បាប់មួយដែលគេឱ្យអង្គការវិជ្ជាជីវៈគាត់ប្រើប្រាស់សិទ្ធិស្របច្បាប់ ក្នុងនាមតំណាងឱ្យសមាជិករបស់ខ្លួនហ្នឹងទៅចរចានូវប្រយោជន៍ជាសមូហភាពឬក៏លក្ខខណ្ឌផ្នែកសេដ្ឋកិច្ចហ្នឹង»។
បើតាមលោក ឃុន ថារ៉ូ ការកាត់បន្ថយបុគ្គលិកដែលធ្វើឡើងដោយក្រុមហ៊ុនណាហ្គាវើលដ៍នេះ មិនបានអនុលោមតាមច្បាប់ការងារនិងច្បាប់សហជីពឡើយ។ លោកថា ករណីក្រុមហ៊ុនណាហ្គាវើលដ៍បញ្ឈប់បុគ្គលិកក្នុងចំនួនច្រើន ដែលមានទាំងថ្នាក់ដឹកនាំសំខាន់ៗ សមាជិកសហជីពសកម្ម និងប្រតិភូបុគ្គលិកនេះ គឺជាការរើសអើងសហជីពយ៉ាងពិតប្រាកដ។
គិតចាប់តាំងពីការធ្វើកូដកម្មនៅថ្ងៃទី១៨ ខែធ្នូ ឆ្នាំ២០២១ មកដល់ពេលនេះ យ៉ាងហោចណាស់ ថ្នាក់ដឹកនាំសហជីព និងសមាជិកសរុបជិត៣០នាក់ ត្រូវបានអាជ្ញាធរចាប់ខ្លួនជាបន្តបន្ទាប់ ក្នុងនោះ ៨នាក់ រួមទាំងកញ្ញា ឈឹម ស៊ីថរ ប្រធានសហជីពផង ត្រូវបានតុលាការសម្រេចឃុំខ្លួនបណ្ដោះអាសន្ន ក្រោមបទចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ។
ក្រុមអ្នកជំនាញអង្គការសិទ្ធិមនុស្សជាតិនិងអន្តរជាតិ បានថ្កោលទោសជាបន្តបន្ទាប់ចំពោះការចាប់ខ្លួន និងការឃុំខ្លួនថ្នាក់ដឹកនាំសហជីពណាហ្គាវើលដ៍ ដោយថា ការចាប់ខ្លួនធ្វើឡើងទាំងបំពានច្បាប់ និងរំលោភសិទ្ធិមនុស្ស ហើយពួកគេបានទាមទារឱ្យទម្លាក់ចោលការចោទប្រកាន់ជាបន្ទាន់ផងដែរ៕