រដ្ឋាភិបាលកម្ពុជា បានលើកឡើងថា មេរដ្ឋប្រហារយោធាភូមាលោក មីន អ៊ុងឡាំង បានយល់ព្រមសម្រេចពន្យារពេលបទឈប់បាញ់រហូតដល់ចុងឆ្នាំ២០២២ និងបានអំពាវនាវឱ្យគ្រប់ភាគីពាក់ព័ន្ធបញ្ឈប់អំពើហិង្សាបន្តទៀត។
ការសម្រេចរបស់មេរដ្ឋប្រហារយោធាភូមាលោក មីន អ៊ុងឡាំង នេះ ធ្វើឡើងក្នុងជំនួបទ្វេភាគីជាមួយមេដឹកនាំកម្ពុជាលោក ហ៊ុន សែន ដែលកំពុងទស្សនកិច្ចនៅប្រទេសមីយ៉ាន់ម៉ាឬភូមានៅថ្ងៃទី៧ ខែមករា ឆ្នាំ២០២២។
សេចក្តីប្រកាសរួមរវាងកម្ពុជា-មីយ៉ាន់ម៉ា ដែលត្រូវបានផ្សព្វផ្សាយដោយក្រសួងការបរទេសកម្ពុជានាថ្ងៃទី៧ ខែមករា ឆ្នាំ២០២២ បានឱ្យដឹង ថា រដ្ឋាភិបាលមីយ៉ាន់ម៉ាបានប្រកាសខ្លួនឯងថា នឹងឈប់បាញ់គ្នាជាមួយអង្គការប្រដាប់អាវុធលើជនជាតិភាគតិច ទាំងអស់រយៈពេល ៥ ខែរហូតដល់ចុងខែកុម្ភៈ ឆ្នាំ២០២២ និងសម្រេចពន្យារពេលបទឈប់បាញ់គ្នានេះបន្ថែមទៀតរហូតដល់ចុងឆ្នាំ២០២២។
សេចក្តីប្រកាសដដែលថា លោក មីន អ៊ុងឡាំង ក៏បានអំពាវនាវដល់គ្រប់ភាគីពាក់ព័ន្ធទាំងអស់ឱ្យទទួលអនុវត្តបទឈប់បាញ់គ្នា ដើម្បីផលប្រយោជន៍ ប្រទេសជាតិនិងប្រជាជន បញ្ឈប់រាល់អំពើហិង្សា និងប្រកាន់យកភាពអត់ធ្មត់ខ្ពស់បំផុត។
សេចក្ដីប្រកាសបញ្ជាក់ថា ការសម្រេចរបស់មេរដ្ឋប្រហារយោធាភូមាលោក មីន អ៊ុងឡាំង ត្រូវបាននាយករដ្ឋមន្ត្រីកម្ពុជា លោក ហ៊ុន សែន គាំទ្រដោយថា ដើម្បីកាត់បន្ថយភាពតានតឹង និងបើកផ្លូវឱ្យមានកិច្ចសន្ទនាប្រកបដោយស្មារតីស្ថាបនា រវាងភាគីពាក់ព័ន្ធទាំងអស់ សំដៅឈានទៅសម្រេច បាននូវសន្តិភាពយូរអង្វែង និងការអភិវឌ្ឍជាតិ។ ទន្ទឹមគ្នានេះ លោក មីន អ៊ុងឡាំង ក៏បានស្វាគមន៍ការចូលរួមរបស់ ប្រេសិតពិសេសរបស់ប្រធានអាស៊ាន ស្តីពី មីយ៉ាន់ម៉ា ដើម្បីចូលរួមក្នុងកិច្ចពិភាក្សាអំពីបទឈប់បាញ់ជាមួយអង្គការ ប្រដាប់អាវុធ ជនជាតិភាគតិច។ ជំហានដ៏សំខាន់នេះ ត្រូវបានចែងក្នុងកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន។
យ៉ាងណាក៏ដោយស្របពេលលោកនាយករដ្ឋមន្រ្តី ហ៊ុន សែន រួមទាំងប្រតិភូកម្ពុជា កំពុងស្ថិតនៅក្នុងទឹកដីមីយ៉ាន់ម៉ា ឬភូមានោះ ស្ថាប័នជាតិនិងអន្តរជាតិធំៗ រួមទាំងពលរដ្ឋមីយ៉ាន់ម៉ាផង បន្តថ្កោលទោសនិងរិះគន់ដំណើរបំពេញទស្សនកិច្ចរបស់លោក ហ៊ុន សែន នៅប្រទេសមីយ៉ាន់ម៉ា ដើម្បីស្វែងរកសន្តិភាពសម្រាប់ពលរដ្ឋមីយ៉ាន់ម៉ា និងធានាឱ្យមានសន្តិសុខ ព្រមទាំងស្ថិរភាពនៅក្នុងតំបន់អាស៊ានផង។
មិនមែនតែសមាជិកខ្លះនៅក្នុងប្លុកអាស៊ានទេដែលមិនពេញចិត្តការធ្វើរដ្ឋប្រហារដោយយោធានៅមីយ៉ាន់ម៉ានេះ កាលពីថ្ងៃទី១៨ ខែមិថុនា ឆ្នាំ២០២១ នៅក្នុងមហាសន្និបាតអង្គការសហប្រជាជាតិ ក៏បានបោះឆ្នោតនិងចេញសេចក្ដីសម្រេចថ្កោលទោសលោក មីន អ៊ុងឡាំង នេះដែរ។ ប្រតិកម្មពីអន្តរជាតិនេះ នៅបន្ទាប់ពីរបបសឹកយោធាមីយ៉ាន់ម៉ាបានធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១៕
