លោកនាយករដ្ឋមន្ត្រី ហ៊ុន សែន បានវិលត្រលប់មកដល់ប្រទេសកម្ពុជាវិញហើយ នៅរសៀលថ្ងៃសៅរ៍នេះ បន្ទាប់ពីបញ្ចប់ដំណើរទស្សនកិច្ចរយៈពេលខ្លីនៅមីយ៉ាន់ម៉ា។
តាមរយៈលទ្ធផលនៃដំណើរទស្សនកិច្ចនេះ លោកនាយករដ្ឋមន្ត្រី ហ៊ុន សែន បានជួបពិភាក្សាជាមួយមេដឹកនាំរដ្ឋប្រហារយោធាមីយ៉ាន់ម៉ា លោក មីន អ៊ុងឡាំង តែមិនបានជួបមេដឹកនាំប្រជាធិបតេយ្យលោកស្រី អ៊ុង សានស៊ូជី នោះទេ។
រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានថ្លែងក្នុងសន្និសីទកាសែតនៅឯព្រលានយន្តហោះអន្តរជាតិភ្នំពេញពី មូលហេតុនៃការវិលត្រលប់មកវិញនេះថា គណៈប្រតិភូកម្ពុជាមិនមានភាពចាំបាច់ក្នុងការបន្តទស្សនកិច្ចនៅមីយ៉ាន់ម៉ាទៀតនោះឡើយ បន្ទាប់ពីលោកនាយករដ្ឋមន្ត្រី ហ៊ុន សែន បានជួបជាមួយលោក មីន អ៊ុងឡាង កាលពីម្សិលមិញ។ យ៉ាងណាក្តីលោកបានចាត់ទុកថា ដំណើរទស្សនកិច្ចនេះថា គឺជាការបើកផ្លូវដ៏សំខាន់មួយដើម្បីបើកឱ្យមានការចរចាពីគ្រប់ភាគី។ ប៉ុន្តែលោកមិនទាន់បញ្ជាក់នៅឡើយទេថា តើការចរចានោះនឹងធ្វើឡើងនៅពេលណា និងមានការចូលរួមពីភាគីណាខ្លះនោះទេ។
យោងតាមសេចក្តីប្រកាសរួមស្តីពីលទ្ធផលនៃជំនួបផ្លូវការរវាងកម្ពុជា-មីយ៉ាន់ម៉ា ដែលត្រូវបានផ្សព្វផ្សាយដោយក្រសួងការបរទេសកម្ពុជានាថ្ងៃទី៧ ខែមករា ឆ្នាំ២០២២ បានឱ្យដឹង ថា រដ្ឋាភិបាលមីយ៉ាន់ម៉ាបានប្រកាសបទឈប់បាញ់គ្នាជាមួយអង្គការប្រដាប់អាវុធលើជនជាតិភាគតិចទាំងអស់រយៈពេល ៥ ខែរហូតដល់ចុងខែកុម្ភៈ ឆ្នាំ២០២២ និងបានសម្រេចពន្យារបទឈប់បាញ់គ្នានេះបន្ថែមទៀត រហូតដល់ចុងឆ្នាំ២០២២។
សេចក្តីប្រកាសដដែលថា លោក មីន អ៊ុងឡាំង ក៏បានអំពាវនាវដល់គ្រប់ភាគីពាក់ព័ន្ធទាំងអស់ឱ្យទទួលអនុវត្តបទឈប់បាញ់គ្នា ដើម្បីផលប្រយោជន៍ ប្រទេសជាតិនិងប្រជាជន បញ្ឈប់រាល់អំពើហិង្សា និងប្រកាន់យកភាពអត់ធ្មត់ខ្ពស់បំផុត។
សេចក្ដីប្រកាសបញ្ជាក់ថា ការសម្រេចរបស់មេរដ្ឋប្រហារយោធាភូមាលោក មីន អ៊ុងឡាំង ត្រូវបាននាយករដ្ឋមន្ត្រីកម្ពុជា លោក ហ៊ុន សែន គាំទ្រដោយថា ដើម្បីកាត់បន្ថយភាពតានតឹង និងបើកផ្លូវឱ្យមានកិច្ចសន្ទនាប្រកបដោយស្មារតីស្ថាបនា រវាងភាគីពាក់ព័ន្ធទាំងអស់ សំដៅឈានទៅសម្រេច បាននូវសន្តិភាពយូរអង្វែង និងការអភិវឌ្ឍជាតិ។ ទន្ទឹមគ្នានេះ លោក មីន អ៊ុងឡាំង ក៏បានស្វាគមន៍ការចូលរួមរបស់ប្រេសិតពិសេសរបស់ប្រធានអាស៊ាន ស្តីពី មីយ៉ាន់ម៉ា ដើម្បីចូលរួមក្នុងកិច្ចពិភាក្សាអំពីបទឈប់បាញ់ជាមួយអង្គការ ប្រដាប់អាវុធ ជនជាតិភាគតិច។ ជំហានដ៏សំខាន់នេះ ត្រូវបានចែងក្នុងកិច្ចព្រមព្រៀងជាឯកច្ឆន្ទប្រាំចំណុចរបស់អាស៊ាន។
ក្រៅពីនេះ ដើម្បីពង្រឹងប្រសិទ្ធភាពនៃការផ្តល់ជំនួយមនុស្សធម៌ដល់ប្រជាជនមីយ៉ាន់ម៉ា ជាពិសេសប្រជាជនដែលកំពុងត្រូវការជំនួយបំផុត ថ្នាក់ដឹកនាំទាំងពីរបានគាំទ្រឱ្យមានកិច្ចប្រជុំរវាងភាគីពាក់ព័ន្ធ រួមមាន ប្រេសិតពិសេសរបស់ប្រធានអាស៊ាន ស្តីពី មីយ៉ាន់ម៉ា អគ្គលេខាធិការអាស៊ាន តំណាងមជ្ឈមណ្ឌលអាស៊ានដើម្បីសម្របសម្រួលជំនួយមនុស្សធម៌ និងគ្រប់គ្រងគ្រោះមហន្តរាយ (AHA Centre) និងក្រុមការងារថ្នាក់ជាតិដើម្បីសម្របសម្រួលការផ្តល់ជំនួយមនុស្សធម៌តាមរយៈមជ្ឈមណ្ឌលអាស៊ានដើម្បីសម្របសម្រួលជំនួយមនុស្សធម៌ និងគ្រប់គ្រងគ្រោះមហន្តរាយ សង្គមកាកបាទក្រហមមីយ៉ាន់ម៉ា និងភ្នាក់ងារជំនាញរបស់អង្គការសហប្រជាជាតិដែលពាក់ព័ន្ធ។
យ៉ាងណាក៏ដោយស្របពេលលោកនាយករដ្ឋមន្រ្តី ហ៊ុន សែន រួមទាំងប្រតិភូកម្ពុជា កំពុងស្ថិតនៅក្នុងទឹកដីមីយ៉ាន់ម៉ា ឬភូមានោះ ស្ថាប័នជាតិនិងអន្តរជាតិធំៗ រួមទាំងពលរដ្ឋមីយ៉ាន់ម៉ាផង បានបន្តថ្កោលទោសនិងរិះគន់ដំណើរបំពេញទស្សនកិច្ចរបស់លោក ហ៊ុន សែន នៅប្រទេសមីយ៉ាន់ម៉ា ដើម្បីស្វែងរកសន្តិភាពសម្រាប់ពលរដ្ឋមីយ៉ាន់ម៉ា និងធានាឱ្យមានសន្តិសុខ ព្រមទាំងស្ថិរភាពនៅក្នុងតំបន់អាស៊ានផង៕
