កូដករក្រុមហ៊ុនកាស៊ីណូណាហ្គាវើលដ៍ (Naga World) បានអំពាវនាវទៅតុលាការឱ្យទម្លាក់ចោលការចោទប្រកាន់លើតំណាង៨នាក់របស់ពួកគេ ដោយថា ការចោទប្រកាន់និងការឃុំខ្លួនថ្នាក់ដឹកនាំសហជីពទាំងនោះជារឿងមិនត្រឹមត្រូវនិងអយុត្តិធម៌។
ការអំពាវនាវនេះធ្វើឡើង ខណៈដែលក្រុមកូដករជិត២០នាក់បានធ្វើសន្និសីទកាសែតនៅមុខទីស្ដីការក្រសួងការងារ និងបណ្ដុះបណ្ដាលវិជ្ជាជីវៈនៅព្រឹកថ្ងៃចន្ទនេះ ដើម្បីឆ្លើយតបចំពោះក្រសួងការងារ ដែលតម្រូវឱ្យពួកគេចូលទៅពិនិត្យផ្ទៀងផ្ទាត់ឡើងវិញនូវការទូទាត់ប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន។
កាលពីថ្ងៃទី៥ ខែមករានេះ ថ្នាក់ដឹកនាំនិងសកម្មជនសហជីពចំនួន៨នាក់ដែលជាតំណាងរបស់ក្រុមកូដករ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផងនោះ ត្រូវបានតុលាការសម្រេចឃុំខ្លួនបណ្ដោះអាសន្ន និងចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ។
កូដករក្រុមហ៊ុនកាស៊ីណូណាហ្គាវើលដ៍ម្នាក់ អ្នកស្រី សៀក បញ្ញា ដែលអះអាងថា បម្រើការងារនៅក្រុមហ៊ុនល្បែងមួយនេះរយៈពេល១០ឆ្នាំមកហើយ ប្រាប់អ្នកសារព័ត៌មានកន្លែងសន្និសីទកាសែតថា ករណីឃុំខ្លួននិងការចោទប្រកាន់តំណាងសហជីព៨នាក់ ជារឿងមិនត្រឹមត្រូវ និងអយុត្តិធម៌បំផុតសម្រាប់ពួកគេ។
អ្នកស្រីបន្តថា ក្រុមកូដករបានប្រគល់សិទ្ធិឱ្យសហជីពធ្វើជាតំណាងរបស់ពួកគេស្របតាមនីតិវិធីច្បាប់ ដើម្បីជួយដោះស្រាយវិវាទការងារ និងការទាមទារលក្ខខណ្ឌការងារមួយចំនួនទៀតនៅក្រុមហ៊ុនល្បែងមួយនេះ ដោយគ្មានការញុះញង់ដូចការចោទប្រកាន់ឡើយ។
អ្នកស្រីបន្ថែមថា៖ «ខ្ញុំសូមឱ្យបញ្ឈប់ការចោទប្រកាន់លើពួកគាត់ ដែលថា ពួកគាត់ជាអ្នកញុះញង់បង្កភាពវឹកវរដល់សង្គម។ បងប្អូនឃើញហើយថា សូម្បីតែចាប់ពួកគាត់ហើយ ពួកខ្ញុំនៅតែបន្តធ្វើកូដកម្មដដែល។ ការធ្វើកូដកម្មរបស់ពួកខ្ញុំនេះ គឺគ្មានការញុះញង់ពីសំណាក់បុគ្គលណាម្នាក់ឡើយ។ ដូចខ្ញុំបានបញ្ជាក់អ៊ីចឹង អ្នកដែលធ្វើកូដករជាង២ ០០០នាក់ចេញមកធ្វើកូដកម្មនេះ គឺ[បុគ្គលិក]ក្រុមហ៊ុនណាហ្គាវើលដ៍»។
កូដករកាស៊ីណូណាហ្គាវើលដ៍ម្នាក់ទៀត អ្នកស្រី ឧកសុភ័ក្រ មូលីកា និយាយថា កន្លងមក តំណាងសហជីពបានរកឃើញថា ក្រុមហ៊ុនណាហ្គាវើលដ៍ទូទាត់ប្រាក់បំណាច់បញ្ចប់កិច្ចសន្យាការងារជូនបុគ្គលិកមិនត្រឹមត្រូវតាមច្បាប់ស្ដីពីការងារនោះទេ ប៉ុន្តែក្រសួងការងារមិនមានចំណាត់ការអ្វីទៅលើក្រុមហ៊ុនឡើយ។
អ្នកស្រីបន្តថា ករណីក្រសួងការងារឱ្យក្រុមអ្នកតវ៉ាទៅចូលរួមប្រជុំ ដើម្បីពិនិត្យផ្ទៀងផ្ទាត់ជាក់ស្ដែងជាមួយអធិការការងារ ពាក់ព័ន្ធការទូទាត់ប្រាក់បំណាច់បញ្ចប់កិច្ចសន្យាការងារនៅពេលនេះ គឺបញ្ជាក់ថា ក្រសួងបានទទួលស្គាល់ថា ក្រុមហ៊ុនពិតជាមានកំហុសមែន។ អ្នកស្រីបន្តថា បើក្រុមហ៊ុនមានកំហុស តំណាងសហជីព៨នាក់កំពុងជាប់ឃុំត្រូវតែដោះលែងវិញ។
អ្នកស្រីបន្ថែមថា៖ «លិខិតរបស់ក្រសួងក៏បាននិយាយដែរថា ពិតជាបានរកឃើញនូវការគុណលុយហ្នឹងខុសមែន។ ចុះពេលដែលតំណាងទាំង៨រូបរបស់ខ្ញុំទៅចរចា ហេតុអីបានជាក្រសួងមិនចរចាជាមួយពួកគាត់ថាខុសមែនទេ? ដល់ពេលចាប់តំណាងពួកខ្ញុំទៅអស់ហើយ បានក្រសួងចេញលិខិតអញ្ជើញថា ណាហ្គាពិតជាគុណលុយខុសមែន។ អ៊ីចឹងអ្វីដែលពួកខ្ញុំត្រូវការនៅពេលនេះ គឺដោះលែងពួកគាត់ឱ្យចូលតុចរចា មិនមែនឱ្យគុណលុយឱ្យត្រូវ ហើយឱ្យពួកខ្ញុំយកលុយហើយដើរចេញចប់ទេ។ ពួកខ្ញុំត្រូវការតំណាងរបស់ពួកខ្ញុំឱ្យចូលធ្វើការងារនៅក្រុមហ៊ុនណាហ្គាវើលដ៍វិញ»។
អនុប្រធានផ្នែកអន្តរាគមន៍ និងដោះស្រាយបាតុកម្មកូដកម្មគ្រប់មុខសញ្ញានៃក្រសួងការងារ លោក អ៊ូ រតនា ដែលចេញមកជួបក្រុមកូដករធ្វើសន្និសីទកាសែត បានថ្លែងថា ក្រសួងការងារស្វាគមន៍ចំពោះអ្នកតវ៉ាដែលព្រមចូលតុចរចា ប៉ុន្តែសម្រាប់ការទាមទារឱ្យដោះលែងតំណាងសហជីព៨នាក់នោះ គឺលោកមិននិយាយអ្វីឡើយ។
លោកបន្ថែមថា៖ «ខាងក្រសួងស្វាគមន៍ក្នុងការដោះស្រាយ បើខាងប្អូនមានបំណង។ ខាងក្រសួងរង់ចាំទទួលប្អូនៗជានិច្ច»។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ការធ្វើបាតុកម្មនិងការធ្វើសន្និសីទកាសែត ដើម្បីទាមទារទម្លាក់ចោលការចោទប្រកាន់ គឺមិនអាចទៅរួចទេ ពីព្រោះវាមិនមែនជាផ្លូវច្បាប់។ លោកថា ជនជាប់ចោទត្រូវការពារខ្លួនតាមផ្លូវច្បាប់ ដោយបង្ហាញនូវភស្តុតាងឬសក្ខីកម្ម ដើម្បីដោះបន្ទុកទៅនឹងបទចោទនោះ។
លោកបន្ថែមថា៖ «ការធ្វើបាតុកម្ម ការធ្វើសន្និសីទកាសែត ដាក់សម្ពោធតុលាការឱ្យទម្លាក់ចោលបទចោទ វាមិនមែនជាមធ្យោបាយតាមផ្លូវច្បាប់ទេ មានតែការចូលក្នុងដំណើរការនីតិវិធីតុលាការ ហើយបង្ហាញភស្តុតាងដោះបន្ទុក តតាំងទៅនឹងបទចោទនូវអ្វីដែលសមត្ថកិច្ចមាន។ ប្រសិនយើងមិនមានមូលដ្ឋានហ្នឹងរឹងមាំទេ មិនអាចធ្វើការពារខ្លួនបានទេ។ ការធ្វើបាតុកម្ម ការធ្វើសន្និសីទកាសែត រិះគន់ទិតៀននេះជារូបភាពសកម្មភាពនយោបាយទេ។ ជាទិដ្ឋភាពផ្លូវច្បាប់ វាអត់មានឥទ្ធិពលផ្នែកច្បាប់ណាមួយក្នុងការការពារខ្លួនបានទេ»។
កាលពីថ្ងៃទី៧ ខែមករានេះ អង្គការអន្តរជាតិខាងការងារ ហៅកាត់ថា អាយឡូ (ILO) ដែលមានមូលដ្ឋាននៅទីក្រុងហ្សឺណែវ ប្រទេសស្វីស (Switzerland) អំពាវនាវឱ្យលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះលែងថ្នាក់ដឹកនាំនិងសកម្មជនសហជីពណាហ្គាវើលដ៍៨នាក់ឱ្យមានសេរីភាពវិញ ដោយទម្លាក់ចោលការចោទប្រកាន់ប្រឆាំងអ្នកទាំងនោះ។
ក្នុងលិខិតមួយរបស់លោក Guy Ryder នាយកគ្រប់គ្រងនៃអង្គការអន្តរជាតិខាងការងារ (ILO) ផ្ញើទៅកាន់លោកនាយករដ្ឋមន្ត្រី ហ៊ុន សែន បានសរសេរដោយស្នើដល់នាយករដ្ឋមន្ត្រីប្រើប្រាស់អំណាចរបស់ខ្លួន ដើម្បីធានាឱ្យមានការដោះលែងជាបន្ទាន់នូវមេដឹកនាំសហជីព កម្មករខ្មែរ នៃក្រុមហ៊ុនណាហ្គាវើលដ៍ ព្រមទាំងស្នើឱ្យទម្លាក់ចោលបទចោទទាំងអស់ប្រឆាំងនឹងសកម្មភាពរបស់ថ្នាក់ដឹកនាំសហជីពទាំងនោះ។ ប្រភពដដែលអះអាងថា ការចាប់ឃុំខ្លួនមេដឹកនាំសហជីពដែលដឹកនាំធ្វើកូដកម្មដោយសន្តិវិធី គឺជាការជ្រៀតជ្រែកយ៉ាងខ្លាំងដល់ច្បាប់ស្ដីពីសេរីភាពការងារ និងសិទ្ធិសហជីពថែមទៀតផង៕