ក្រសួងសុខាភិបាលឱ្យដឹងថា កម្ពុជាបានរកឃើញអ្នកឆ្លងជំងឺកូវីដ-១៩បំប្លែងខ្លួនថ្មីប្រភេទ «អូមីក្រុង» ជាង ៤០ នាក់ ក្នុងនោះ ករណីឆ្លងសហគមន៍ចំនួន ១៦នាក់។
សេចក្តីប្រកាសព័ត៌មានរបស់ក្រសួងសុខាភិបាលចុះថ្ងៃទី១៥ ខែមករា ឆ្នាំ២០២២ បានឱ្យដឹងថា អ្នកឆ្លងជំងឺកូវីដ-១៩ ប្រភេទអូមីក្រុងចំនួន៤៥ នាក់ កាលពីម្សិលមិញ ក្នុងនោះ ករណីនាំចូល ២៩ នាក់ និងឆ្លងក្នុងសហគមន៍ ១៦ នាក់។
ក្រៅពីរកឃើញអ្នកឆ្លងថ្មី ក្រសួងថា ក៏មានអ្នកជំងឺចំនួន១៧នាក់បានជាសះស្បើយ ខណៈអ្នកស្លាប់ដោយសារ ជំងឺនេះ មិនមានឡើយ។
បើតាមក្រសួងសុខាភិបាលគិតត្រឹមថ្ងៃទី១៥ ខែមករា ឆ្នាំ២០២២ នេះ កម្ពុជារកឃើញអ្នកឆ្លងជំងឺកូវីដ-១៩ សរុប ១២០ ៧៧៣ នាក់ ក្នុងនោះ ករណីនាំចូល ២០ ១៣៩ នាក់ ខណៈស្លាប់ចំនួន ៣ ០១៥ នាក់ និងអ្នកជំងឺជាសះស្បើយសរុប ១១៧ ០៨៩នាក់៕