ក្រុមកូដករកាស៊ីណូណាហ្គាវើលដ៍ (Naga World) ចាប់ផ្ដើមធ្វើយុទ្ធនាការដាក់ញត្តិទៅកាន់ស្ថានទូតប្រទេសលោកសេរីចំនួន១៤ប្រចាំកម្ពុជា ដើម្បីជំរុញឱ្យមានដំណោះស្រាយវិវាទការងារក្នុងក្រុមហ៊ុនល្បែងមួយនេះ និងទាមទារដោះលែងតំណាងសហជីព៨នាក់ដែលត្រូវបានចាប់ឃុំខ្លួន ដោយសារសកម្មភាពការពារសិទ្ធិកម្មករ និងសហជីព។
កូដករក្រុមហ៊ុនកាស៊ីណូណាហ្គាវើលដ៍ប្រមាណ៣០នាក់ នៅព្រឹកថ្ងៃទី១៧ ខែមករានេះ បាននាំគ្នាដាក់ញត្តិនៅស្ថានទូតបារាំង អង់គ្លេស អាល្លឺម៉ង់ សិង្ហបុរី កាណាដា និងសហភាពអឺរ៉ុប ក្រោមការឃ្លាំមើលពីកម្លាំងអាជ្ញាធរជាច្រើននាក់ផងដែរ។ បើតាមខ្លឹមសារញត្តិ ក្រុមកូដករស្នើដល់ស្ថានទូតជួយអន្តរាគមន៍ឱ្យមានការដោះលែងតំណាងសហជីព៨នាក់ ឃ្លាំមើលពួកគេធ្វើកូដកម្មអហិង្សាប្រចាំថ្ងៃ និងជំរុញទៅរដ្ឋាភិបាលកម្ពុជាឱ្យពង្រឹងការគោរពសិទ្ធិមនុស្សនិងសិទ្ធិការងារ។
កូដករកាស៊ីណូណាហ្គាវើលដ៍ម្នាក់ កញ្ញា ឧកសុភ័ក្រ មូលីកា អះអាងប្រាប់អ្នកសារព័ត៌មានថា ការឃុំខ្លួននិងការចោទប្រកាន់លើតំណាងសហជីពទាំង៨នាក់នោះជារឿងអយុត្តិធម៌។ កញ្ញាបន្តថា ស្ថានទូតដែលពួកគេបានដាក់ញត្តិនោះជាប្រទេសមានការគោរពសិទ្ធិមនុស្សនិងសិទ្ធិការងារ ដែលពួកគេអាចជំរុញទៅរដ្ឋាភិបាលកម្ពុជាឱ្យអន្តរាគមន៍បន្តទៅក្រុមហ៊ុនកាស៊ីណូណាហ្គាវើលដ៍ជុំវិញសំណើរបស់ពួកគាត់។
កញ្ញា ឧកសុភ័ក្រ មូលីកា ថ្លែងថា៖ «ទូតទាំងអស់ហ្នឹង គាត់ជាប្រទេសឱ្យតម្លៃខ្ពស់ទៅលើសិទ្ធិការងារ សិទ្ធិមនុស្ស។ អ៊ីចឹងអ្វីដែលយើងទាមទារនៅក្រុមហ៊ុនណាហ្គាវើលដ៍ គឺទាមទារឱ្យមានសហជីពនៅក្នុងក្រុមហ៊ុន ដែលក្រុមហ៊ុនបានរំលោភលើសិទ្ធិការងាររបស់យើងជាខ្លាំង។ អ៊ីចឹងខ្ញុំគិតថា ស្ថានទូតទាំងអស់ហ្នឹង គាត់មិនមើលរំលងលើរឿងរបស់ពួកយើងទេ។ ហើយយើងសង្ឃឹមថា ពួកយើងនឹងទទួលបានការអន្តរាគមន៍ពីអង្គទូតទាំងអស់ហ្នឹង ខណៈដែលតំណាងរបស់ពួកខ្ញុំ៨នាក់ហ្នឹង [ត្រូវបានសមត្ថកិច្ច]ឃាត់ទាំងមិនបានប្រព្រឹត្តកំហុសអីទេ»។
បើតាមកញ្ញា ឧកសុភ័ក្រ មូលីកា គឺមន្ត្រីគ្រប់ស្ថានទូតបានទទួលយកញត្តិពីក្រុមកូដករ ហើយមន្ត្រីសហភាពអឺរ៉ុបក៏បានសន្យាថានឹងយកបញ្ហារបស់ពួកគាត់ប្រាប់ទៅរដ្ឋាភិបាលកម្ពុជាថែមទៀតផង។
កូដករកាស៊ីណូណាហ្គាវើលដ៍ម្នាក់ទៀត កញ្ញា ជីម រដ្ឋា និយាយថា ពួកគាត់នៅតែបន្តធ្វើកូដកម្មអហិង្សារហូតមានការដោះលែងតំណាងសហជីព និងមានដំណោះស្រាយវិវាទការងារ។ កញ្ញាបានទាមទារឱ្យក្រុមហ៊ុនបញ្ឈប់ការរើសអើងសហជីព និងបញ្ឈប់ការលាបពណ៌លើក្រុមកូដករថាជាក្រុមបដិវត្តពណ៌បន្តទៀត ហើយទាមទារឱ្យក្រុមហ៊ុនទទួលយកបុគ្គលិក៣៦៥នាក់ចូលធ្វើការងារវិញ។
កញ្ញាបន្ថែមថា៖ «យើងទាំងអស់គ្នាជាបុគ្គលិកណាហ្គាវើលដ៍ចេញមកកូដកម្មនេះ គ្រាន់តែទាមទារសិទ្ធិសេរីភាពកន្លែងការងារ ទាមទារឱ្យមានសហជីពនៅកន្លែងការងារ បែរជាមកលាបពណ៌ផ្សេងៗមកលើពួកយើងថា យើងបដិវត្តពណ៌ ថាយើងអញ្ចេះថាយើងអញ្ចុះ ទាំងដែលយើងបានដើរតាមនីតិវិធីច្បាប់រួចអស់ទៅហើយ បែរជានៅបន្តលាបពណ៌យើងឱ្យមហាជនយល់ច្រឡំថាយើងអាក្រក់ទៅវិញ»។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ មានប្រសាសន៍ថា ការដាក់ញត្តិរបស់ក្រុមកូដករនៅស្ថានទូតណាមួយនោះ ជាសិទ្ធិរបស់ពួកគេដោយមិនពាក់ព័ន្ធជាមួយច្បាប់ស្តីពីការងារឡើយ។ លោកបន្តថា រឿងណាត្រូវដោះស្រាយតាមផ្លូវតុលាការគួរតែដោះស្រាយតាមផ្លូវតុលាការ ហើយរឿងណាពាក់ព័ន្ធផលប្រយោជន៍ ត្រូវដោះស្រាយនៅក្រសួងការងារ ខណៈក្រសួងនៅរងចាំនិងស្វាគមន៍ជានិច្ច។
លោកបន្ថែមថា៖ «ប៉ុន្តែអ្វីដែលខ្ញុំដឹង គឺកម្ពុជាគឺជាកម្ពុជា ហើយបរទេសក៏មិនលូកដៃចូលកិច្ចការងារផ្ទៃក្នុង ដែលជាអធិបតេយ្យភាពកម្ពុជានោះដែរ។ រាល់វិវាទនៅប្រទេសណាក៏ដោយគឺតែងតែមានច្បាប់ និងនីតិវិធីដោះស្រាយករណីវិវាទនោះ។ ប្រសិនជាយើងយល់អំពីច្បាប់ និងនីតិវិធី ត្រូវដោះស្រាយករណីនីមួយៗនោះ យើងប្រហែលជាមិនពិបាកដើរវៀងផ្លូវនាំតែឆ្ងាយ ហើយអាចធ្វើឱ្យខូចប្រយោជន៍សមាជិកខ្លួននោះទេ»។
យ៉ាងណា ក្រុមអង្គការសង្គមស៊ីវិលមួយចំនួនដែលធ្វើការងារផ្នែកសិទ្ធិមនុស្សនិងសិទ្ធិការងារនៅកម្ពុជា បាននាំគ្នាធ្វើយុទ្ធនាការរាប់ចំនួនថ្ងៃនៃការជាប់ឃុំរបស់ថ្នាក់ដឹកនាំសហជីពណាហ្គាវើលដ៍ចំនួន៨នាក់ ដើម្បីទាមទារឱ្យមានការដោះលែងពួកគេមកវិញ។
អង្គការទាំងនោះលើកឡើងថា ការឃុំខ្លួននិងការចោទប្រកាន់ទៅលើថ្នាក់ដឹកនាំនិងសកម្មជនសហជីពទាំងនោះធ្វើឡើងមិនត្រឹមត្រូវនិងអយុត្តិធម៌ ត្បិតសកម្មភាពពួកគេធ្វើស្របតាមច្បាប់ និងដើម្បីសារៈប្រយោជន៍ជូនកម្មករនិយោជិតតែប៉ុណ្ណោះ។
ពាក់ព័ន្ធករណីនេះ នាយកវិទ្យាស្ថានប្រជាធិបតេយ្យកម្ពុជា លោកបណ្ឌិត ប៉ា ចន្ទរឿន មានប្រសាសន៍កាលពីថ្ងៃទី១៤ ខែមករា ថាប្រសិនបើរដ្ឋាភិបាលមិនប្រញាប់ដោះស្រាយបញ្ចប់វិវាទការងារនៅក្រុមហ៊ុនណាហ្គាវើលដ៍ ហើយបន្តធ្វើទុក្ខបុកម្នេញលើក្រុមកូដករទៀតនោះ នឹងធ្វើឱ្យប៉ះពាល់ដល់មុខមាត់កម្ពុជាលើឆាកអន្តរជាតិ ពាក់ព័ន្ធការរំលោភសិទ្ធិការងារនិងសិទ្ធិមនុស្ស។
លោកបន្ថែមថា៖ «អ៊ីចឹងបើព្រឹត្តិកាណ៍និងចំណាត់ការអវិជ្ជមានទាំងឡាយណាទៅលើក្រុមពួកគាត់ហ្នឹង វានឹងធ្វើឱ្យប៉ះពាល់ដល់កិត្តិយសកេរ្តិ៍ឈ្មោះកម្ពុជា។ ហើយបើបង្កឱ្យមានភាពរ៉ាំរ៉ៃ មានបញ្ហាកាន់តែធំទៀត នឹងធ្វើឱ្យសហគមន៍អន្តរជាតិគេមើលឃើញថា កម្ពុជាហ្នឹងនៅតែបន្តធ្វើទុក្ខបុកម្នេញទៅលើកម្មករ មានការរំលោភសិទ្ធិការងារ ស្ថានភាពសិទ្ធិមនុស្សនៅតែបន្តធ្លាក់ចុះ ដែលគេពិបាកក្នុងការធ្វើកិច្ចការងារសហប្រតិបត្តិការ និងជួយប្រទេសកម្ពុជានៅពេលខាងមុខ»។
គិតមកដល់ថ្ងៃទី១៧ ខែមករានេះ ថ្នាក់ដឹកនាំនិងសមាជិកសហជីព៨នាក់ត្រូវបានឃុំខ្លួនរយៈពេល១៨ថ្ងៃហើយ ខណៈក្រុមកូដករជាង១ ០០០នាក់បានបន្តធ្វើកូដកម្មដដែល បើទោះបីជាចំណុចដែលពួកគេទាមទារនៅមិនទាន់មានការដោះស្រាយចំណុចណាមួយក៏ដោយ។
កាលពីថ្ងៃទី៥ ខែមករានេះ ថ្នាក់ដឹកនាំនិងសកម្មជនសហជីពចំនួន៨នាក់ ក្នុងនោះមានប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ផង ត្រូវបានតុលាការសម្រេចឃុំខ្លួនបណ្ដោះអាសន្នក្រោមការចោទប្រកាន់ពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា៤៩៤ និង៤៩៥ នៃក្រមព្រហ្មទណ្ឌ ក្រោយពីពួកគេធ្វើកូដកម្មអហិង្សាទាមទារសិទ្ធិនិងលក្ខខណ្ឌការងារប្រសើរនៅក្នុងក្រុមហ៊ុនល្បែងមួយនេះ៕
