រដ្ឋមន្រ្តីការបរទេសហ្វីលីពីន បានឱ្យដឹងនៅថ្ងៃអាទិត្យម្សិលមិញថា អតីតមេដឹកនាំដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី គឺជាបុគ្គលមួយរូបដែលមិនអាចខ្វះបានក្នុងការស្ដារលទ្ធិប្រជាធិបតេយ្យរបស់ប្រទេសដែលគ្រប់គ្រងដោយរបបយោធាមួយនេះឡើងវិញ។
ជាមួយគ្នានេះ លោក Teodoro Locsin ក៏បានថ្កោលទោសករណីកាត់ទោសម្ចាស់ពានរង្វាន់ណូបែលសន្តិភាពរូបនេះ និងបានចោទប្រកាន់របបយោធាថាបានប្រើប្រាស់ប្រព័ន្ធតុលាការដើម្បីកម្ចាត់គូប្រជែងរបស់ខ្លួនផងដែរ។
ទីភ្នាក់ងារសារព័ត៌មាន Reuters បានស្រង់សម្ដីរដ្ឋមន្រ្តីការបរទេសហ្វីលីពីន ដែលបានឱ្យដឹងនៅក្នុងសេចក្ដីថ្លែងការណ៍មួយថា៖ «ខ្ញុំមានការព្រួយបារម្ភយ៉ាងខ្លាំងអំពីការឈឺចាប់របស់ប្រជាជនស៊ីវិល។ យើងក៏សូមធ្វើការអំពាវនាវដល់ថ្នាក់ដឹកនាំរបបយោធាឱ្យចូលរួមក្នុងកិច្ចសន្ទនាប្រកបដោយបរិយាបន្នមួយ និងបន្តដំណើរការផ្លាស់ប្ដូរឆ្ពោះទៅកាន់ប្រជាធិបតេយ្យឡើងវិញផងដែរ»។
ការថ្លែងរបស់លោក Teodoro Locsin ធ្វើឡើងស្របពេលដែលសមាគមប្រជាជាតិអាស៊ីអាគ្នេយ៍ (អាស៊ាន) ក៏កំពុងតែដាក់សម្ពាធលើរបបយោធាមីយ៉ាន់ម៉ា ដែលក្នុងនោះ មេដឹកនាំយោធារបស់ប្រទេសមួយនេះ កាលពីពេលកន្លងទៅ ក៏ត្រូវបានសម្រេចដកវត្តមានមិនឱ្យចូលរួមក្នុងកិច្ចប្រជុំកំពូលអាស៊ានផងដែរ។
លោក Teodoro Locsin បានបន្ថែមថា រាល់កិច្ចសន្ទនាទាំងឡាយនឹងមិនមានប្រសិទ្ធភាពនោះទេ បើគ្មានវត្តមានលោកស្រី អ៊ុងសាន ស៊ូជី។
លោកបន្តថា៖ «លោកស្រី អ៊ុងសាន ស៊ូជី ត្រូវតែមានវត្តមាន។ របបយោធាមីយ៉ាន់ម៉ាមិនគួរមានការភ័យខ្លាចអ្វីនោះទេ ខណៈដែលលោកស្រីគឺជាបុគ្គលមិនអាចខ្វះបានក្នុងការស្ដារលទ្ធិប្រជាធិបតេយ្យ»។
គួរបញ្ជាក់ថា ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្ដើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ ឆ្នាំ២០២១ និងបានផ្ដួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលជាង១ ០០០នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ៕