រដ្ឋបាលជលផល ប្រាប់ទៅអ្នកនេសាទទាំងអស់ក្នុងតំបន់ឆ្នេរនៃខេត្តចំនួន៤នៅកម្ពុជា ឱ្យផ្អាកជាបណ្ដោះអាសន្ននូវការនេសាទត្រីកាម៉ុង ឬត្រីប្លាធូ នារដូវពងកូន ដោយចាប់ផ្ដើមពីពាក់កណ្ដាលខែមករា រហូតដល់ចុងខែមីនា ឆ្នាំ២០២២។
ក្នុងសេចក្ដីជូនដំណឹងរបស់រដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ ដែលវីអូឌីទទួលបាននៅថ្ងៃពុធនេះ បានឱ្យដឹងថា ចាប់ពីថ្ងៃទី១៥ ខែមករា រហូតថ្ងៃទី៣១ ខែមីនា ឆ្នាំ២០២២ គឺជាអំឡុងពេលដែលត្រីកាម៉ុង ឬត្រីប្លាធូ បន្តពូជនិងពងកូន។ ក្រសួងថា ដូច្នេះដើម្បីរួមចំណែកថែរក្សានិងការពារធនធានជលផលសមុទ្រឱ្យបានគង់វង្សទៅថ្ងៃអនាគត អ្នកនេសាទទាំងអស់ក្នុងដែនសមុទ្រកម្ពុជា រួមមាន ខេត្តព្រះសីហនុ ខេត្តកោះកុង ខេត្តកំពត និងខេត្តកែប ត្រូវផ្អាកជាបណ្ដោះអាសន្ននូវការនេសាទត្រីប្រភេទនេះ។
រដ្ឋបាលជលផលសង្ឃឹមថា ប្រជាពលរដ្ឋដែលប្រកបរបរនេសាទត្រីកាម៉ុងទាំងអស់នឹងចូលរួមអនុវត្តតាមសេចក្ដីជូនដំណឹងនេះ ដើម្បីរួមចំណែកថែរក្សានិងការពារធនធានជលផលសមុទ្រឱ្យបានគង់វង្សទៅអនាគត។
របាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ដែលចេញផ្សាយកាលពីថ្ងៃទី៦ ខែមករា ឆ្នាំ២០២២ បានឱ្យដឹងថា សម្រាប់ឆ្នាំ២០២១ ផលនេសាទសមុទ្រមានចំនួន១២៥ ០០០តោន ស្មើនឹង ៩៦,១៥% នៃផែនការដែលមានចំនួន១៣០ ០០០តោន។ ផលនេសាទសមុទ្រកម្ពុជានៅឆ្នាំ២០២១ បើប្រៀបធៀបទៅនឹងឆ្នាំ២០២០ មានការកើនឡើង២ ៣០០តោន។
ប្រភពដដែលបញ្ជាក់ថា សម្រាប់បទល្មើសនេសាទកាលពីឆ្នាំ២០២១វិញ មានចំនួន២ ៩៩៩ករណី បើធៀបឆ្នាំ២០២០ មានការថយចុះ១៦៣ករណី ក្នុងនោះ បទល្មើសនេសាទទឹកសាបមានចំនួន២ ៧៦០ករណី និងបទល្មើសនេសាទសមុទ្រមានចំនួន២៣៩ករណី៕