ពលរដ្ឋជាង២០០គ្រួសារ រស់នៅស្រុកចុងកាល់ ខេត្តឧត្ដរមានជ័យ ចោទអាជ្ញាធរនិងទាហាននៅខេត្តនេះថា បានរំលោភយកដីធ្លីរបស់ពួកគេដែលបានកាន់កាប់និងអាស្រ័យផលជិត៣០ឆ្នាំ ប៉ុន្តែអាជ្ញាធរបានច្រានកាលការចោទប្រកាន់នេះ។
លោក ផៃ ស្វែ ជាប្រជាពលរដ្ឋរស់នៅឃុំចុងកាល់ ស្រុកចុងកាល់ ប្រាប់ វីអូឌី នៅថ្ងៃព្រហស្បតិ៍នេះថា ពលរដ្ឋជាង២០០គ្រួសារ ក្នុងភូមិចំនួន៤ នៃឃុំចុងកាល់ ដែលមានដីប្រហែល៥០០ហិកតា ត្រូវបានអាជ្ញាធរស្រុក និងទាហានប្រតិបត្តិការសឹករងស្រុកចុងកាល់ ដាក់គ្រឿងចក្រឈូសយកជាបន្តបន្ទាប់ ខណៈដីនោះពួកគាត់បានចូលអាស្រ័យផលនិងកាន់កាប់តាំងពីឆ្នាំ១៩៩៣។ លោកថា កាលពីថ្ងៃម្សិលមិញ ក្រុមទាហានទាំងនោះបានដាក់គ្រឿងចក្រឈូសឆាយដីធ្លីពួកគាត់ម្ដងទៀត ប៉ុន្តែត្រូវប្រជាពលរដ្ឋរារាំង។
បុរសវ័យ៥៥ឆ្នាំរូបនេះបន្តថា ជម្លោះដីធ្លីបានកើតឡើងជាច្រើនឆ្នាំមកហើយ ប៉ុន្តែបានស្ងាត់ទៅវិញមួយរយៈ ហើយទើបផ្ទុះឡើងវិញនៅដើមឆ្នាំ២០២២នេះ។
លោកបន្ថែមថា៖ «គេអះអាងថា ដីដែលយើងអាស្រ័យផលនោះជាដីរដ្ឋ ប៉ុន្តែដីនេះជាដីធ្លីប្រជាពលរដ្ឋបានអាស្រ័យផលតាំងពីឆ្នាំ១៩៩៣មក។ ដំណោះស្រាយ គឺយើងចង់ឱ្យគេចេញជាប្លង់កម្មសិទ្ធិច្បាស់លាស់ឱ្យយើង បញ្ឈប់ការធ្វើទុក្ខបុកម្នេញយើង ទុកឱ្យយើងរស់នៅបានសុខសាន្តបានតទៅមុខទៀត។ រាល់ថ្ងៃនេះ វាយកអាអិចមកកាយកន្លែងនេះកន្លែងនោះ ធ្វើឱ្យយើងលំបាកដោយសារតែវារហូត»។
លោក ថុង សាលី អាយុ៧២ឆ្នាំ ជាពលរដ្ឋម្នាក់ទៀត និយាយថា គ្រួសារលោកមានដីទំហំ៥ហិកតាប៉ុណ្ណោះសម្រាប់ធ្វើស្រែនិងដាំដំឡូងចិញ្ចឹមសមាជិកគ្រួសារ៧នាក់។ លោកថា ប្រសិនបើអាជ្ញាធរនិងក្រុមទាហានយកអស់ នោះគ្រួសារគាត់គ្មានដីសម្រាប់បង្កបង្កើនផលទៀតទេ ហើយវានឹងប៉ះពាល់ដល់ជីវភាពរស់នៅរបស់ពួកគាត់។
លោកបន្តថា ដំណោះស្រាយដែលអ្នកភូមិចង់បាន គឺសុំឱ្យអាជ្ញាធរចេញបណ្ណកម្មសិទ្ធិជូនពួកគេ និងបញ្ឈប់សកម្មភាពឈូសឆាយរំលោភយកដីអ្នកភូមិបន្តទៀត។
លោកបន្ថែមថា៖ «បើគេយកអស់ទៅ ខ្ញុំមិនដឹងជាបានអ្វីសម្រាប់បង្កបង្កើនផលទៀត។ យើងខ្ញុំខំកាប់គាស់ជាយូរឆ្នាំបានដីវាលអស់ គឺមកយកអ៊ីចឹង ខ្ញុំអស់សង្ឃឹមខ្លាំងណាស់ជាមួយអាជ្ញាធរ»។
វីអូឌី មិនអាចស្វែងរកការឆ្លើយពីតបពីតំណាងទាហានប្រតិបត្តិការសឹករងស្រុកចុងកាល់បានទេ នៅថ្ងៃទី២០ ខែមករានេះ។
អភិបាលស្រុកចុងកាល់ លោក រិទ្ធី ប៉ាក់ បានច្រានចោលការលើកឡើងរបស់ពលរដ្ឋនេះ ដោយថា ដីដែលពលរដ្ឋកំពុងអាស្រ័យផលនិងកាន់កាប់នោះបានចុះបញ្ជីជាប្លង់រឹងរបស់រដ្ឋរួចទៅហើយ ខណៈដីមួយចំនួនជាដីដែលបានកាត់ទៅឱ្យគ្រួសារកងទ័ព និងមួយចំនួនទៀតទុកសម្រាប់បែងចែកជាដីសង្គមកិច្ចសម្រាប់គ្រួសារក្រីក្រ។
អភិបាលស្រុករូបនេះបន្តថា ប្រសិនបើពលរដ្ឋកំពុងតវ៉ាជាពលរដ្ឋក្រីក្រ ពួកគេអាចដាក់ពាក្យសុំដីសង្គមកិច្ចពីអាជ្ញាធរបាន ដោយមិនត្រូវរុករានយកដីរដ្ឋយកមកធ្វើកម្មសិទ្ធិទាំងខុសច្បាប់បែបនេះឡើយ។
លោកបន្ថែមថា៖ «ប្រជាពលរដ្ឋទាំងអស់នោះ គឺគាត់បានចូលទៅអាស្រ័យផលលើដីហ្នឹង [ដីរដ្ឋ] អាជ្ញាធរកំពុងរៀបចំបែងចែកដីសង្គមកិច្ចជូនពលរដ្ឋក្រីក្រដែរ។ អ៊ីចឹងបើពួកគាត់ក្រីក្រ គាត់អាចដាក់ពាក្យសុំដីសង្គមកិច្ចបាន ប៉ុន្តែពួកគាត់ចំនួនដែលភាគតិច១ទៅ២គ្រួសារទេដែលគាត់បង្កបញ្ហាហ្នឹង ហើយមិនជាអ្នកអត់ទេ គាត់មានដីដែរ តែគាត់លក់អស់ទៅ គាត់ដើរចាប់អ៊ីចឹង»។
ពាក់ព័ន្ធករណីនេះ មន្រ្តីការពារសិទ្ធិមនុស្សសមាគមអាដហុកប្រចាំខេត្តឧត្ដរមានជ័យ លោក ស្រី ណារ៉េន មានប្រសាសន៍ថា សមាគមរបស់លោកនឹងស្រាវជ្រាវរកឯកសារនិងប្រមូលព័ត៌មានពីគ្រប់ភាគីពាក់ព័ន្ធ ដើម្បីសម្របសម្រួលឱ្យមានដំណោះស្រាយនិងបញ្ចប់វិវាទមួយនេះ។ ទោះយ៉ាងណា លោកបានទទូចដល់អាជ្ញាធរពាក់ព័ន្ធនិងប្រជាពលរដ្ឋត្រូវសម្របសម្រួលគ្នាដោះស្រាយដោយសន្តិវិធី មានតម្លាភាព និងយុត្តិធម៌។
លោកបន្ថែមថា៖ «អាជ្ញាធរនិងពលរដ្ឋត្រូវធ្វើការសម្របសម្រួលគ្នាដោះស្រាយ កុំឱ្យប្រើអំពើហិង្សាណាមួយ។ មួយទៀត ការដោះស្រាយហ្នឹងឱ្យវាមានតម្លាភាព កុំឱ្យដោះស្រាយទៅចុងក្រោយបានទៅលើឯកជននេះឯកជននោះ ដោយយកដីប្រជាពលរដ្ឋឱ្យទៅក្រុមហ៊ុនេះក្រុមហ៊ុននោះ ធ្វើឱ្យប្រជាពលរដ្ឋឈឺចាប់។ អ៊ីចឹងយើងចង់បានថា អ្នកដោះស្រាយហ្នឹងសូមកុំឱ្យមានផលប្រយោជន៍ក្នុងរឿងក្ដីនីមួយៗហ្នឹង ព្រោះកន្លងមកមានកន្លែង អ្នកទៅដោះស្រាយមានផលប្រយោជន៍ ដល់អ៊ីចឹងហើយធ្វើឱ្យប្រជាពលរដ្ឋមានការឈឺចាប់»៕
