ក្រសួងសុខាភិបាលបានសម្រេចអនុញ្ញាតឱ្យអ្នកជំងឺកូវីដ-១៩ បំប្លែងថ្មី ប្រភេទអូមីក្រុង អាចសម្រាកព្យាបាលជំងឺនៅតាមផ្ទះរៀងៗខ្លួនវិញ បន្ទាប់ពីក្រសួងបានសង្កេតឃើញថា ស្ថានភាពជំងឺនេះមិនមានសភាពធ្ងន់ធ្ងរ និងបន្ទាប់ពីមានបទបញ្ជារបស់លោកនាយករដ្ឋមន្ត្រី ហ៊ុន សែន មក។
យោងតាមសេចក្តីប្រកាសព័ត៌មាន ស្តីពី ការកែប្រែលក្ខខណ្ឌព្យាបាលអ្នកជំងឺកូវីដ-១៩ បំប្លែងថ្មី ប្រភេទអូមីក្រុង (Omicron) របស់ក្រសួងសុខាភិបាលកាលពីយប់ថ្ងៃទី២១ ខែមករា ឆ្នាំ២០២២ បានបញ្ជាក់ថា សម្រាប់ជនជាតិខ្មែរ ទាំងអ្នកដែលទើបមកពីបរទេស និងអ្នកនៅក្នុងប្រទេស ត្រូវបានអនុញ្ញាតឱ្យស្នាក់នៅព្យាបាលជំងឺនៅតាមផ្ទះ ដូចករណីអ្នកជំងឺកូវីដ-១៩ ប្រភេទអាល់ហ្វា ឬ ដែលតា ដែរ។ ប៉ុន្តែត្រូវគោរពតាមនីតិវិធីប្រតិបត្តិស្តង់ដាសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះ។ បន្ថែមលើនេះ ក្រសួងក៏បានអនុញ្ញាតឱ្យអ្នកជំងឺកូវីដ-១៩ ប្រភេទអូមីក្រុង ទាំងជនបរទេស និងជនជាតិខ្មែរ ដែលកំពុងសម្រាកព្យាបាលជំងឺនៅក្នុងមន្ទីរពេទ្យ ឬមណ្ឌលសុខភាពនានា អាចចេញទៅសម្រាកព្យាបាលជំងឺនៅតាមផ្ទះបាន ចាប់ពីយប់ថ្ងៃទី២១ ខែមករា ឆ្នាំ២០២២ តទៅ ប្រសិនបើពួកគេមានបំណង។
ចំណែកជនបរទេសទាំងអស់ដែលមានចូលមកកម្ពុជា ក៍ត្រូវបានអនុញ្ញាតឱ្យសម្រាកព្យាបាលជំងឺនៅតាមសណ្ឋាគារ ឬនិវេសនដ្ឋានរបស់ស្ថានទូត ឬទីកន្លែងដែលពួកគេជ្រើសរើសបាន ប្រសិនបើពួកគេរកឃើញមានវិជ្ជមានកូវីដ-១៩ប្រភេទ អូមីក្រុង។
សេចក្តីប្រកាសព័ត៌មាននេះ បានធ្វើឡើងបន្ទាប់ពីមានបទបញ្ជារបស់លោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន កាលពីយប់មិញនេះ បានចេញសារសំឡេងពិសេសមួយ ដោយបញ្ជាឱ្យក្រសួងពាក់ព័ន្ធកែប្រែលក្ខខណ្ឌនៃការសម្រាកព្យាបាលជំងឺកូវីដ១៩ ប្រភេទអូមីក្រុងនៅផ្ទះវិញ។ ក៏ប៉ុន្តែលោកបានបញ្ជាក់ថា ការអនុញ្ញាតឱ្យអ្នកជំងឺចេញពីមន្ទីរពេទ្យទៅសម្រាកព្យាបាលនៅតាមផ្ទះវិញនេះ មិនមែនមានន័យថា អនុញ្ញាតឱ្យអ្នកជំងឺដើរលេងតាមចិត្តនោះទេ គឺគ្រាន់តែផ្ទេរពីការព្យាបាលនៅក្នុងមន្ទីរពេទ្យ ទៅផ្ទះវិញតែប៉ុណ្ណោះ។
លោកថា៖ «ថ្ងៃនេះបន្ទាប់ពីបានតាមដានមួយរយៈនៃមេរោគបំប្លែងថ្មី អូមីក្រុង ដែលមុននេះខ្ញុំព្រះករុណាខ្ញុំ បានបញ្ជាដាច់ណាត់ឱ្យអ្នកជំងឺបំប្លែងថ្មី អូមីក្រុង ចាំបាច់ត្រូវតែចូលព្យាបាលនៅក្នុងមន្ទីរពេទ្យ [….] ប៉ុន្តែឥឡូវនេះយើងបានសង្កេតឃើញថា អូមីក្រុងទោះបីវាចម្លងលឿន ក៏ប៉ុន្តែវាមិនមែនជាជំងឺប្រភេទដ៏គ្រោះថ្នាក់នោះទេ បើប្រៀបធៀបនឹងដែលតា ប្រៀបធៀបនឹងអាល់ហ្វា ដែលយើងបានអនុញ្ញាតឱ្យព្យាបាលនៅតាមផ្ទះ នៅតាមសណ្ឋាគារ និងនៅតាមទីកន្លែងដែលម្នាក់ៗប៉ុងនោះ ឃើញថា អូមីក្រុង គឺមានសភាពស្រាលជាង»។
កាលពីថ្ងៃម្សិលមិញ កម្ពុជាបានបន្តរកឃើញករណីឆ្លងជំងឺកូវីដ-១៩ ប្រភេទបំប្លែងថ្មី «អូមីក្រុង» ចំនួន៤២នាក់ទៀត ដែលសុទ្ធតែជាប្រភេទអូមីក្រុងទាំងអស់។ ក្នុងនោះមានករណីនាំចូលពីក្រៅប្រទេសចំនួន១២នាក់ និងឆ្លងក្នុងសហគមន៍៣០នាក់។
បើតាមក្រសួងសុខាភិបាល គិតត្រឹមព្រឹកថ្ងៃសុក្រម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១២០ ៩៥៦ នាក់ ក្នុងនោះ អ្នកជំងឺព្យាបាលជាសះស្បើយចំនួន១១៧ ១៨០ នាក់ និងអ្នកស្លាប់ចំនួន៣ ០១៥ នាក់ រួមទាំងករណីនាំចូលពីក្រៅប្រទេសចំនួន២០ ២២០នាក់។ ចំណែកករណីឆ្លងអូមីក្រុងក្នុងសហគមន៍វិញ ក្រសួងថា គិតមកដល់ពេលនេះ មានចំនួនសរុប ១៥២នាក់៕
